2 Timothy 4

1Ninkwehanangiririza omu maisho ga Ruhanga na Kristo Yesu, oricwera abahuriire n'abafiire orubanja, kandi ahabw'okugaruka kwe n'obukama bwe, 2guma orangirire ekigambo n'omuhimbo, omu bunaku obushemereire n'obutashemereire. Ohane, oteise kandi oyehanangirize otarikwekanasha omu kugumisiriza n'omu kwegyesa. 3Ahabw'okuba obunaku buryahika, obu abantu baryanga kuhurira enyegyesa y'amazima, kwonka ahabw'okugira amatu garikubaryaryata, baryayerundaanira ababeegyesa ebi barikwenda. 4Amatu baryagahenderemu ebiti, ngu barekye kuhurira eby'amazima, bahabire omu kuhurira ebiteekyerezo ebigunzirwe. 5Kwonka iwe, guma otuurize, oyemere okubonabonesibwa, okore omurimo gw'omurangirizi w'Amakuru Marungi, ohikize kimwe obuheereza bwawe. 6Manya nyowe ndi haihi kutambwa nk'empongano y'ebyokunywa eshukwa aha itambiro; obunaku bwangye bw'okuruga omu nsi buhikire. 7Ndwaine orugamba rurungi, empaka z'okwiruka nziherize, ndinzire okwikiriza. 8Eki ntsigaize n'okutunga ekirunga ky'okuhikiirira eki mbiikiirwe, eki Mukama, omuramuzi ohikiriire, arimpa ahari ekyo Kiro, kandi tiinye nyenka, kureka na boona abakunda okugaruka kwe. 9Teeraho kwija juba ahi ndi. 10Manya Demasi, ahabw'okukunda eby'ensi egi, akantsigaho, yaaza Tesalonika; Keresensi yaaza Galatiya na Tito yaaza Dalumatiya. 11Luka wenka niwe ntsigaire nawe. Ihayo Mariko, oije nawe, ahabw'okuba nangasira munonga omu murimo gw'obuheereza. 12Tukiko nkamutuma Efeso. 13Omu kwija onyijanire omunagiro gu naatsigire Turoa owa Karipo. Ondeetere n'ebitabo, munomuno eby'emizingo y'empu. 14Alekisandero, omuheesi w'emiringa, akankora kubi munonga; Mukama niwe arimuzimuurira ebi yaakozire. 15Naiwe omwerinde, ahabw'okuba akarwanisa munonga eby'obutumwa bwaitu. 16Omu kwetonganira kwangye okw'okubanza, tihaine wandwaineho, boona bakampungaho. Nkaabaasibwa ki bareka kukiturwa! 17Kwonka Mukama akandwanaho, yampangaana kurangirira ekigambo omu bwijwire, ngu Abanyamahanga boona babone kukihurira. Ntyo naashahurwa omu kanwa k'entare. 18Mukama aryaguma ankize akabi koona, kandi anjune, ndugyeho mpikye omu bukama bwe obw'omu iguru. Aheebwe ekitiinwa ebiro byona. Amiina. 19Ndamukiza Purisika na Akwila, n'ab'omu ka ya Onesiforo. 20Eraasito akatsigara Korinto, kandi Turofimo nkamutsiga Mileeto arwaire. 21Teeraho nk'oku orikubaasa kwija ebiro by'embeho bitakahikire. Eubulo na Pudensi na Liino na Kalaudiya n'abanyaruganda boona nibakuramutsya. 22Mukama agume naiwe. Embabazi za Ruhanga zigume naimwe.

will be added

X\