2 Timothy 3

1Mbwenu omanye eki: omu biro by'aha muheru, haryabaho obunaku bw'akabi. 2Manya abantu baryaba abarikwekunda, abarikururuuhira empiiha, abanyamaryo, abeetunguuzi, abajumi b'abantu, abagomera abaabazaire, entasiima, abatahikiriire, 3abataine saasi, abatarikwikaikanisibwa, ababeiherezi, abashiishagura ebyabo, enshaarizi, enyanga-birungi, 4endeebya, ebihanda, ab'ebihagi, abakunda okujarama kutari okukunda Ruhanga, 5abareebeka nk'abanyadiini, kwonka bakahakanisa obushoboorozi bwayo. Abantu nk'abo obeetantare! 6Omuribo harimu abashenshera omu maka, bakahamba abakazi bafiire omutima abaremereirwe ebibi, kandi abarikutwarwa eby'okwetenga okubi ebitari bimwe, 7abatega buri muntu okutu, kwonka batahikye ha kumanya amazima. 8Nk'oku Yanesi na Yamburesi baahakaniise Musa, n'abo bantu nikwo bahakanisa amazima nibo bantu abu obwengye bwabo bwasiisikaire, ababa ebikwangara by'okwikiriza. 9Kwonka tibarigira bu bahikire hare, ahabw'okuba obushema bwabo buryamanywa boona, nk'obw'abo bashaija babiri. 10Kwonka iwe, okakuratira okwegyesa kwangye, emitwarize yangye, eki ngyenderera omu magara gangye, okwikiriza kwangye, okugumisiriza kwangye, okukunda kwangye, n'okugumizamu kwangye; 11okuhiiganisibwa kwangye n'okubonabona kwangye. Noomanya ebyambaireho ndi Antiokiya, na Ikonio, kandi na Lusitura; oku naayemeire okwo kuhiiganisibwa! Kwonka ebyo byona Mukama akabinkiza. 12Manya boona abarikwenda kugira amagara agarimu okutiina Ruhanga, bakwataniise na Kristo Yesu, baryahiiganisibwa. 13Kwonka abantu ababi n'ababeihabeihi baryayeyongyera kuba babi, babeihabeihe abandi, kandi nabo babeihabeihwe. 14Kwonka iwe, gumira omu bi waayegire okaikiririza kimwe, noomanya owaabikwegyeise. 15Manya okwiha omu buto okamanya Ebyahandiikirwe ebirikwera, ebyakuhabwire ku okujunwa kuri omu kwikiriza Kristo Yesu. 16Ebyahandiikirwe byona bikahandiikisibwa Ruhanga, kandi biine omugasho omu kwegyesa eby'amazima, omu kuhakanisa obuhabe, omu kuhana n'omu kutendeka abantu omu by'okuhikiirira, 17ngu omuntu wa Ruhanga abone kuba ohikire, oine ebirikwetengwa kukora omurimo gwona omurungi.

will be added

X\