2 Timothy 2

1Mbwenu nu, mwana wangye, guma ohamire noobangirwa amaani agari omuri Kristo Yesu. 2Ebi waahuriire ningambira omu maisho ga baakareebi baingi, bikwatse abantu abeesigwa abaribaasa nabo kubyegyesa abandi. 3Nk'oku ori omuserukare murungi wa Kristo Yesu, yemera eby'okubonabona kwawe. 4Manya tihariho muserukare ori aha rugamba, oyetaasya omu mirabanamu y'abantu b'obutoosha, ahabw'okuba ekiba kimuri aha mutima, n'okugwisa gye owaamuhandiikire kuba omuserukare. 5Omuzaani orikuhakana taheebwa kirunga yaaba atazaine naakuratira ebiragiro. 6Omuhingi oteeganda niwe ashemerera kutunga omuganuro gw'ebi ayerize. 7Ta omutima aha ki ndikugamba, haza Mukama naija kukuha okushoboorokyerwa byona. 8Ijuka Yesu Kristo, n'okuzooka kwe omu bafiire, n'okuba mwijukuru wa Daudi, nk'Amakuru Marungi agu ndangirira oku garikugira. 9Ahabw'ago Makuru Marungi, nikyo ndikubonabonera mbohesiibwe enjegyere nk'enkozi y'ebibi. Kwonka ekigambo kya Ruhanga kyo tikibohirwe. 10N'ahabw'ekyo niinyemera byona ahabw'abatoorainwe, ngu nabo babone kutunga okujunwa n'ekitiinwa ekitahwaho ebiri omuri Kristo Yesu. 11Ekigambo eki n'eky'okwesigwa ekirikugira kiti: ku turaabe twafiire hamwe nawe, biri turyaba abahuriire hamwe nawe. 12Ku turikugumisiriza hamwe nawe, biri turyategyeka hamwe nawe. Ku turikumwoga, nawe aryatwoga. 13Ku turaabe tutari beesigwa, we naaguma ari omwesigwa ahabw'okuba we tabaasa kwehakanisa. 14Ebi ogume obibaijutsye noobeehanangiriza omu maisho ga Mukama, kwerinda okuhakana aha bigambo okutaine mugasho, kureka okuhwerekyereza abakuhurira. 15Teeraho kusiimwa Ruhanga, ori omukozi otarikwitwa nshoni ahabw'ebi orikukora, kandi orikwegyesa gye ekigambo ky'amazima. 16Guma oyetantare okuregyeta okurimu okutatiina Ruhanga, ahabw'okuba nikwongyera kureetera abantu okutamutiina. 17Ebigambo byabo biryataniirira nk'ekookoro. Omuribo harimu Himenaayo ne Fileeto 18abaateishukire amazima, bakagira ngu okuzooka omu bafiire kwaherize kubaho, batyo bakacuranzya okwikiriza kw'abamwe. 19Kwonka omusingi ogu Ruhanga yaataireho guhamire, haza guriho akamanyiso. Nibyo bigambo ebirikugira biti: Mukama amanya abe Kandi biti: Weena oyatura eiziina rya Mukama arugye omu bibi. 20Omuri nyaruju y'omuntu tihabamu bintu bya zaabu na feeza byonka, kureka habamu n'eby'ebiti n'eby'eibumba. Ebimwe bikoresibwa emirimo y'ekitiinwa, n'ebindi etari y'ekitiinwa. 21Omuntu ku aryeyozyaho ebibi ebyo byona, aryaba ekintu ky'okukoresa eky'omutaano, ahabw'okuba naaba ayehaire mukama we kandi amwiniire omugasho, ashemeire kukoresibwa omurimo gwona omurungi. 22N'ahabw'ekyo guma oyetantare okwetenga okubi okw'eminyeeto, okuratire okuhikiirira, okwikiriza, okukunda n'obusingye, hamwe n'abo abahoogyera Mukama baine omutima gwezire. 23Otariikiriza kwetaasya omu mpaka z'obushema ezitaine buryo; ahabw'okuba noomanya ku zirugwamu entongane. 24Haza omuheereza wa Mukama tashemereire kuba entongani kureka okugirira buri muntu embabazi, ari omwegyesa w'engoga, orikugumisiriza, 25kandi orikuhana n'obucureezi abarikumuhakanisa, ngu shana Ruhanga akaabaha okwegarukamu, bamanya amazima, 26babona kuruga omu mutego gwa Sitaane, ogu abakwatiise kubakoresa ebi arikwenda.

will be added

X\