2 Thessalonians 2

1Mbwenu, beene Taata, nitwenda kubagambira aha bikwatiraine n'okwija kwa Mukama waitu Yesu Kristo, n'oku turiteeranwa kumubugana. Nitubeeshengyereza, 2mutarahuka kuhuruutuka omutima, nari okuhahaazibwa, yaaba oburangi, nari enkuru, nainga ebaruha, ebirikugambwa ngu birugire ahariitwe, kuhamya ku Ekiro kya Mukama kyahika. 3Hatagira owaababeihabeiha omu muringo gwona; ahabw'okuba ekyo Kiro tikirihika, obugomi butakabandize kubaho, n'ekyegyengye kitakabonekire. Niwe muntu w'okuhwerekyerera, 4ohakanisa ekyeetwa Ruhanga kyona nari ekiramibwa, akakyetunguuraho akasingama omuri Nyaruju ya Ruhanga, naayeyeta Ruhanga. 5Timurikwijuka, obu naabaire nkibaine, ekyo ku naakibagambiire? 6Mbwenu nimumanya ekizibiire ebyo kubaho; n'ahabw'okuba obunaku bwe tibukahikire. 7Manya enaama y'obugomi yaaherize kucumwa, kwonka ekyo eky'okwenda kubaho, tikiribaho okuhitsya obu ogwo ariihwaho. 8Haza obwo nibwo omubi arishuuruurwa, kandi Mukama Yesu akamwitsa omwitsyo gurikuruga omu kanwa ke, akamucwekyerezesa okuboneka kwe n'okwija kwe. 9Ekyo kyegyengye kiryaija kireetsirwe Sitaane, kiine amaani maingi n'obumanyiso n'eby'okutangaaza eby'ebishuba. 10Reero abariba bari ab'okuhwerekyerera, ahabw'okwanga kukunda amazima bakajunwa, baryahabisibwa kubi. 11Nikyo Ruhanga aribooherereza ekirikuhabisa eky'amaani, ngu baikirize eby'ebishuba. 12Mpaho boona abataraikiriize mazima, bakashemerererwa okutahikiirira, babone kusingwa orubanja. 13Beene Taata abakundwa Mukama, itwe tushemereire kusiima Ruhanga obutoosha ahabwanyu, ahabw'okuba Ruhanga ogwo akabatoorana kuba ab'okubanza kuhinduka, ngu mujunwe nimwezibwa Mutima kandi nimwikiriza amazima. 14Ekyo akakibeetera naakoresa Amakuru Marungi agu twabareeteire, ngu mubone kutunga ekitiinwa kya Mukama waitu Yesu Kristo. 15N'ahabw'ekyo, beene Taata, mwemerere muhamire, kandi mugumiize kimwe emitwarize ei twabeegyeise, yaaba omu bi twabagambiire nari omu bi twabahandiikiire. 16Mbwenu Mukama waitu Yesu Kristo wenka, na Ruhanga Tataitwe owaatukunzire, akatuha okuhuumuzibwa okutahwaho n'amatsiko marungi ahabw'embabazi ze, 17abahuumuze kandi abagumye omu birungi byona ebi mukora n'ebi mugamba.

will be added

X\