2 Peter 2

1Nk'oku omu ihanga eri haimukiremu abarikwegira abarangi, n'abeegyesa b'ebishuba, n'omuriimwe nikwo baribaho. Baryabataasyamu bwesherekye enyegyesa y'akabi erikuhabisa, nangwa n'okwehakana Mukama waabo owaabacungwire; batyo beereetere okucwekyerera kw'ahonaaho. 2Haza baingi baryatooreza emicwe yaabo ekwatiraine n'eby'obushambani, bagayise omuhanda gw'amazima. 3Ahabw'omururu gwabo baryabatungamu amagoba nibakoresa ebigambo by'obugobya. Manya okwiha ira okusingwa orubanja kwabo tikukatuuzaga, n'okucwekyerera kwabo tikukahungiraga. 4Ruhanga tarasaasiire baamaraika abaasiisire, kureka akabanaga owa Nyamuteza, yaabata okuzimu omu mwirima ndindindi kurindirwayo okuhitsya obu baricwerwa orubanja. 5Kandi tarasaasiire nsi ya ira obu yaahimintura omwegyemure aha nsi y'abatatiina Ruhanga, kureka akarokora Noa, omurangirizi w'eby'okuhikiirira, n'abandi bantu mushanju. 6Bwanyima akacwa endembe za Sodoma na Gomora eiju, yaazicwera orubanja rw'okucwekyerera, ngu abariba batarikutiina Ruhanga bazireebereho. 7Reero yaarokora Loti ohikiriire, owaabaire ashobeirwe munonga ahabw'emicwe ekwatiraine n'eby'obushambani bw'abantu babi. 8Manya ogwo muntu ohikiriire, ebi yaareebire n'ebi yaahuriire abatwiremu nibakora ebitahikire, buri izooba bikaba bimureetera obujune bwingi omu mutima gwe omurungi. 9Reero Mukama nikwo amanya kurokora omu kwohibwa abamushongokireho, n'okurindira abatahikiriire omu kifubiro, okuhitsya aha kiro ky'okucwererwaho orubanja; 10na munonga abo abeejaramya omu mururu gw'okwetenga kubi okw'omubiri, bakagaya obushoboorozi bwa Ruhanga. Abo beegyesa abarikuhabisa baba abantu abatagira ki batiina, ababa ebyegyengye, abataitwa nshoni kujuma ab'ebitiinwa. 11Haza kunu baamaraika, nobu baraabe babakiza amaani n'obushoboorozi, tibabatabaariza mu maisho ga Nyakubaho nibabajuma. 12Kwonka abo basiisi bari nk'enyamaishwa zitaine bwengye, ezitwarwa obuhangwa bwazo, ezaazaariirwe okukwatwa n'okwitwa. Bajumiirana ebi batarikumanya, haza baryacwekyerezibwa nkazo, 13babonabone ahabw'ebibi bi baakozire. Ekibananura n'okwejaramya omu magyenyi nyomushana. N'abantu abarikuhemura kandi abarikugayisa, abeejaramya nibarya hamwe naimwe. 14Baine amaisho gaijwire obushambani, agataruha kukora ebibi. Beetereza abaine emitima etahamire. Baine emitima eyaamanyiriire kugira omururu. Ebishi n'abakyeenirwe! 15Bakateishuka omuhanda guhikire, baahaba, baatoora omuhanda gwa Balaamu mwene Beori, owaayenzire kwetungira omukimbo gw'okukora ebitahikire. 16Kwonka akateisibwa ahabw'ekibi kye, obu endogoya etagamba yaagambire nk'omuntu, ekatsina eiraro ry'ogwo murangi. 17Abo bantu ni nk'amaziba gatarimu maizi, kandi ni nk'ebicu by'orumena ebitwarwa omuyaga; omwanya gw'omwirima ndindindi gubabiikiirwe. 18Ku baba nibagamba eby'okwetunguura ebitaine muhoho, boosya abandi bantu abarangariire bati kuhunga abatuura bahabire; obwo nibabeetereza n'emibiri yaabo eruruuhira ebikwatiraine n'eby'obushambani. 19Babaraganisa ku barikwija kuba ab'obusingye, haza bo bonka bari abahuuku b'emicwe mibi. Manya kyona ekikiza omuntu emikono, aba omuhuuku waakyo. 20Ahabw'okuba ku baheza kuhunga ebihagaro by'ensi, ahabw'okumanya Mukama waitu kandi Omujuni Yesu Kristo, bagaruka babyerohamu, bibakoma kandi bibategyeka; haza omuheru gwabo ogwa bwanyima guba mubi okukira ogw'okubanza. 21Embu y'obwo, kuri bataramanyire muhanda gw'okuhikiirira, okukira okuheza kugumanya, bakaguteishuka, bakareka ebiragiro ebirikwera ebyabahairwe. 22Ekyababaireho kiri nk'enfumu y'amazima erikugira eti: Embwa egarukira ebitanaki byayo. N'endiijo nfumu eti: Empunu, ku baheza kugyozya, eyekuringa omu shaabo.

will be added

X\