2 Corinthians 6

1N'ahabw'ekyo nk'oku turikukorera hamwe na Ruhanga, nitubeehanangiriza okutatungira busha embabazi ze. 2Ahabw'okuba agira ati: Nkakutega okutu omu bunaku buhikire, naakuhwera aha izooba ry'okujunirwaho. Mbwenu hati nibwo bunaku obuhikire, mbwenu hati niryo izooba ry'okujunirwaho! 3Titwenda kuteeza muntu weena entsibo, ngu obuheereza bwaitu burekye kushangwamu ebishobire. 4Kureka omuri byona nitweyoreka ku turi abaheereza ba Ruhanga: omu kugumisiriza munonga, omu kubonabonesibwa, omu birikutugumira, omu bihikiirizi, 5omu kwashwa, omu kuteebwa omu bihome, omu bujagararo, omu mirimo erikurusya, omu kuraara aha kiro n'omu kwitwa enjara. 6Kandi nitweyoreka ku turi abaheereza ba Ruhanga ahabw'oburikwera, ahabw'okumanya, ahabw'okugumisiriza, ahabw'embabazi; kandi ahari Mutima Orikwera tugira rukundo etaine buryarya, 7tugamba eby'amazima, tuhangaanwa amaani ga Ruhanga, tukwaitse ebikwato by'okuhikiirira eby'okurwanisa n'eby'okwekingiza. 8Omu kuheebwa ekitiinwa n'omu kugaywa, omu kugambwaho kubi n'omu kugambwaho gye, nitutwazibwa nk'abanyabishuba, haza turi ab'amazima; 9nk'abatarikumanywa, kunu nitumanywa gye; nk'abarikufa, haza tuhuriire; nk'abafubiirwe, haza tutaitsirwe, 10nk'abari omu busaasi, kwonka abatuura bashemereirwe; nk'abooro, kwonka abarikutungisa baingi; nk'abataine kantu, kwonka abaine byona. 11Imwe Bakorinto 'mwe, twabagambira bwerure, emitima yaitu eshashaanukire. 12Tiitwe turikubakumakuma, kureka niimwe murikwekumakumisa ebi murikuteekateeka. 13Nimbagambira nk'abaana bangye, mbwenu naimwe nimutushashaanukire nk'oku twabashashaanukiire. 14Mutarikwatanisa n'abataikiriza. Mbwenu okuhikiirira kwine kakwate ki n'okutahikiirira? Nari omushana gukwatanisa guta n'omwirima? 15Nari Kristo akwatanisa ata na Beliyaali? Nainga shi omwikiriza akwatanisa ata n'otari mwikiriza? 16Nyaruju ya Ruhanga eikirizana eta n'ebishushani? Manya itwe turi Nyaruju ya Ruhanga ohuriire; nk'oku Ruhanga yaagizire ati: Ndyabatuuramu, mbagyendagyendemu. Ndyaba Ruhanga waabo, nabo babe abantu bangye. 17Kandi Mukama naagira ati: N'ahabw'ekyo mubarugyemu mwetaanise nabo Mutarikora aha kintu kyona ekihagaire. Naanye nibwo ndibaakiira. 18Ndyaba shoimwe, naimwe mube batabani bangye na bahara bangye; nikwo Mukama Rukiraboona arikugira.

will be added

X\