2 Corinthians 5

1Nitumanya ngu eihema eri ery'omu nsi, nigwo mubiri ogu tutuuramu, ku ririkamburwa, twine ekindi kyombeko eki Ruhanga aha, niyo nju etombekirwe mikono, ey'obutwire bwona omu iguru. 2N'ekya buzima obwa hati nitutsinda, kandi nitwetenga kujwekwa ekijwaro kyaitu eky'omu iguru, 3ngu ku turaakijware, turekye kushangwa tujwaire busha. 4Manya ku tuba tukiri omuri eri ihema, tutsinda turemereirwe; ti habw'okwenda kujuurwa, kureka okwongyerwa kujwekwa, ngu ekifa kibone kumirwa amagara. 5Kandi owaatuteekateekyeire ekyo ni Ruhanga, owaatuhaire Mutima kutuhamiza. 6Nikyo tugumira omutima obutoosha; ahabw'okuba nitumanya ngu ku tuba tukiri owaitu omuri ogu mubiri, tuba turi hare na Mukama. 7Manya omu magara aga tugyendera omu kwikiriza, kutari okureeba. 8Tutuura tugumire omutima, kandi tukaayenzire haakiri okutaana n'omubiri ogu, tukaza kutuura na Mukama. 9N'ahabw'ekyo yaaba tukiri egi, nainga tutakiriho, ekyaitu n'okuteeraho kumugwisa gye. 10Manya twena turi ab'okuboneka omu maisho g'ekitebe kya Kristo eky'eiramuriro rye, buri muntu abone kuzimuurirwa ebirungi nari ebibi, nk'oku yaakozire akiine omubiri. 11N'ahabw'ekyo nk'oku turikumanya ku kihikire kutiina Mukama, nituteeraho kwikirizisa abantu; kwonka Ruhanga niwe arikumanya oku turi, kandi nyine amatsiko ngu naimwe omu mitima yaanyu nimumanya oku ndi. 12Titurikwenda kugaruka kwegamba marungi ahariimwe, kureka okubaha eby'okubeesiimisa ahabwaitu, ngu mubone kugarukamu abeehimbisa ahabw'ebirikureebwa, bitari by'omu mutima. 13Ku turaabe tuhugire omutima, tuguhugire ahabwa Ruhanga; ku turaabe tutebeekaine, tutebeekaine ahabwanyu. 14Manya rukundo ya Kristo niyo etuhuguura, ahabw'okuba nituhamya ku omwe yaafeereire boona, n'ahabw'ekyo boona bakafa. 15Kandi akabafeera boona, ngu abariho barekye kugumaho ahabwabo, kureka ahabw'ogwo owaabafeeraire akabazookyera. 16Okwiha hati titwakimanyira muntu weena mu buntu. Nobu turaabe twamanyire Kristo omu buntu, mbwenu titwakimumanya tutyo. 17N'ahabw'ekyo omuntu weena ku aba ari omuri Kristo, aba ekihangwa kisya. Ebya kare bihwaho, haza byona bihinduka bisya. 18Ebyo byona biruga ahari Ruhanga owaatwegarukanisiize omuri Kristo, akatukwatsa omurimo gw'okugarukanisa. 19Nikwo kugira ngu, Ruhanga omuri Kristo akaba naayegarukanisa ab'omu nsi, atarikubabarira bibi byabo, kandi akatukwatsa obutumwa bw'okugarukanisa. 20Reero nu turi entumwa za Kristo, Ruhanga naayehanangiririza omuriitwe. Naitwe nitubeeshengyereza omu iziina rya Kristo, mugarukane na Ruhanga. 21Kristo otakamanyaga kibi, Ruhanga akamuhindura ekibi ahabwaitu, ngu omuriwe tutungye okuhikiirira kwa Ruhanga.

will be added

X\