2 Corinthians 4

1N'ahabw'ekyo nk'oku twine obuheereza obu twakwatsiibwe ahabw'embabazi za Ruhanga, titurikucweka ntegye. 2Tukanga eby'enshoni ebikorerwa endugu, n'okugira emitwarize y'obugobya nari okugoreka ekigambo kya Ruhanga. Kureka ahabw'okugamba amazima butunu, tukaayenzire abantu boona batusiimire aha mutima omu maisho ga Ruhanga. 3Kandi Amakuru Marungi gaitu, ku garaabe nigashwekyererwa, nigashwekyererwa ahari abo bonka abarikuhwerekyerera. 4Nibo abo abataikiriza, abu ruhanga w'ensi egi yaarindagiize omutima, akababuza kureeba omushana gw'Amakuru Marungi ag'ekitiinwa kya Kristo, oba ekyeshusha kya Ruhanga. 5Manya titwerangirira twenka, kureka turangirira Yesu Kristo ku ari Mukama, naitwe ku turi abaheereza baanyu ahabwa Yesu. 6Ahabw'okuba Ruhanga owaagizire ati: Omushana ka gujwere omu mwirima, niwe yaayakiire omu mitima yaitu kutumurikira, ngu tumanye ekitiinwa kye ekireeberwa omuri Kristo. 7Kwonka eitungo eryo, itwe abariine turi enyungu z'eibumba, kworeka ku amaani agatakareebwaga gari aga Ruhanga, gatari gaitu. 8Tureebesibwa enaku embaju zoona, kwonka tituburwa bwehigiro; tushoberwa, kwonka titwehwa matsiko. 9Twine abazigu baingi, kwonka tituburwa banywani baitu. Kandi nobu obundi tusaasibwa munonga, kwonka tituhwerekyerezibwa. 10Obutoosha tugyenda twine okufa kwa Yesu omu mibiri yaitu, ngu amagara ge gabone kureebekyera omu mibiri yaitu. 11Ahabw'okuba ku tuba tukiriho, tuguma nituheebwayo kwitwa ahabwa Yesu, ngu amagara ge gabone kureebekyera omu mibiri yaitu ey'okufa. 12N'ahabw'ekyo rufu ekorera omuriitwe, kwonka amagara gakorera omuriimwe. 13Nk'oku twine omutima gw'okwikiriza nk'ogw'owaahandiikire ati: Nkaikiriza, nikyo naagambiire; naitwe nitwikiriza, nikyo turikugambira. 14Nitumanya ngu owaazoire Mukama Yesu omu bafiire, naitwe aryatuzoora hamwe na Yesu, atute omu maisho ge hamwe naimwe. 15Ahabw'okuba byona biriho ahabwanyu, ngu ei embabazi za Ruhanga ziraagarukire kukanya omu bantu, nabo niyo baraagarukire kusiima, Ruhanga akaheebwa ekitiinwa. 16N'ahabw'ekyo titwehwa matsiko. Omuntu waitu ow'aharuguru nobu araabe naagyenda naahwa aha magufa, omuntu waitu ow'omunda ahindurwa musya buri izooba. 17Manya okureebesibwa enaku oku okukye kandi okw'akaanya, nikututebeekanisiza ekitiinwa kihango ekitarihwaho kandi ekitarikwerengwa. 18Ahabw'okuba tituhanga maisho bintu ebireebeka, kureka ebitareebeka. Manya ebireebeka bihwaho, kwonka ebitareebeka tibihwaho.

will be added

X\