2 Corinthians 13

1Ogu n'omurundi gwa kashatu ogu ndaiziremu owaanyu kubareeba; manya kikahandiikwa kiti: Buri rubanja rushemereire kuhamibwa obujurizi bwa baamushinja bashatu nari babiri. 2Nkateisa abaakozire ebibi bwabiso kandi n'abandi boona. Na mbwenu nobu ntariho, nimbateisa omu ruzinduko rwangye rwa kabiri, nti: Ku ndiija obundi, tindibasaasira 3ahabw'okuba mutuura nimwenda eky'okuhamizaho ku Kristo agambira omuriinye. Kristo ogwo tabatwaza na maani makye, kureka aba ow'amaani omuriimwe. 4Manya nobu yaabambirwe aha musharaba ari ow'amaani makye, kwonka aba ohuriire ahabw'amaani ga Ruhanga. Naitwe turi ab'amaani makye omuriwe, kwonka omu mitwarize yaitu naimwe turyaba abahuriire hamwe nawe ahabw'amaani ga Ruhanga. 5Mweshwijume, mureebe yaaba mukihamiire omu kwikiriza. Mwegyeze mwenka. Hari timurikumanya ku Yesu Kristo ari omuriimwe? kureka biri muremirwe ekyo kigyezo! 6Nyine amatsiko ngu nimwija kumanya ku tutararemirwe. 7Kwonka nitushaba Ruhanga ngu murekye kushiisha-- tikugira ngu tureebekye nk'abaasingwire ekigyezo, kureka ngu imwe mukore ekihikire, itwe nobu turaabe nitushusha nk'abaremirwe. 8Ahabw'okuba titubaasa kukora ekintu kyona ekihakanisa amazima, kureka ekigarwanirira. 9Manya itwe nitushemererwa twaba turi ab'amaani makye, kwonka imwe mukaba ab'amaani. Eki turikushaba, n'okwenda ngu mube abahikiire kimwe. 10Ebi naabibahandiikira ntari hamwe naimwe, ngu ku ndiija, ndekye kuba ow'omwaga omu kukoresa obushoboorozi obu Mukama yampaire kubombeka, kutari kubakambura. 11Beene Taata, eky'aha muheru, mugumeho. Mwitanire okuba abahikiire kimwe. Mwete aha bi ndikubeehanangiriza, mugire omutima gumwe, mugume n'obusingye, na Ruhanga okomookwaho rukundo n'obusingye, aryaguma naimwe. 12Muramukanisane okunywegyerana okurikwera. Abarikwera boona nibabaramutya. 13Embabazi za Mukama Yesu Kristo, n'okukunda kwa Ruhanga, n'okukwatanisa kwa Mutima Orikwera bigume naimwe mwena.

will be added

X\