2 Corinthians 11

1Nkaayenzire mungumisiririze omu bushema bwangye obukye. Buzimazima nimungumisiririze! 2Manya mbainiire eihato nk'oku Ruhanga aribainiire; ahabw'okuba nkabaraganisa kubahingira muri nk'omugore oshugaine, orikushwerwa omushaija omwe wenka, niwe Kristo. 3Kwonka nintiina, ngu nk'oku enjoka yaabeihabeihire Eva n'obugobya bwayo, ebiteekateeko byanyu nibiija kuhabisibwa, munagye okweheera kimwe Kristo omu mazima. 4Manya ku haakubaho owaija akarangirira Yesu ondi, otari u twarangiriire, nainga ku mwakutunga Mutima ondi, otari u mwatungire, nainga ku mwakwikiriza agandi Makuru Marungi, gatari gu mwaikiriize, mukaarahuka kubiikiriza. 5Nyowe ningira ngu ezo ntumwa rugambwa tiziine ki zirikunkiza n'akakye. 6Nangwa nobu ndaabe ntari mugambi murungi, kwonka tikwo ndi omu bwengye; kandi ekyo tukakibashoboororera omu buryo bwona n'omu bintu byona. 7Mbwenu shi nkakora kubi obu naayebundika, ngu imwe mutunguukye, nkarangirira Amakuru Marungi ga Ruhanga mutaine ki mumpaire? 8Ebigombe by'abaikiriza ebindi nkabiihaho eby'okunkwatsa, ngu mbone kubahwera imwe. 9Kandi ku naabaire ntwire naimwe ndi omukyene, tindaremereire muntu weena, ahabw'okuba ebi naabaire nkyenire nkabiheebwa abanyaruganda abaarugire Makedoniya. Ntyo naayanga kubaremeerera omu buryo bwona; kandi ndyaguma nyangire. 10Nk'amazima ga Kristo oku gari omuriinye, tihariho kirinzibira kwehimbisa ahabw'ekyo omu byanga bya Akaiya. 11Ahabw'enki? Ahabw'okutabakunda? Ruhanga naamanya ku ndikubakunda. 12Kandi eki ndikukora niinyija kugumizamu ninkikora, ngu mbone kwihaho orwekwatso rw'abarikugira ngu omu butumwa bwabo obu barikwehimbisizamu, nibakora nkaitwe oku turikukora. 13Manya abantu nk'abo n'entumwa z'ebishuba, abakozi engobya, barikwehindura entumwa za Kristo. 14Kandi tikirikutangaaza, ahabw'okuba nangwa na Sitaane ayehindura maraika w'omushana. 15N'ahabw'ekyo ti ky'okutangaarira kureeba abagaragwa be nibeehindura abaheereza by'eby'okuhikiirira. Muheru yaabo eryaba nk'ebi barikukora. 16Ningaruka kugamba nti: Hatagira owaagira ngu ndi omushema; nangwa nobu mwakunteekateekaho mutyo, muunyikirize nk'omushema, naanye mbone kwehimbisaho kakye. 17Eki naaza kugamba, tindikukigambisibwa Mukama, kureka ninkigamba nk'omushema, niinyesiga ku nyine ekirikuunyehimbisisa. 18Nk'oku baingi beehimbisa ahabw'eby'ensi, naanye ka nyehimbise. 19Ahabw'okuba imwe mugumisiririza abashema mushemereirwe, haza kunu imwe muri ab'obwengye. 20Manya mugumisiririza omuntu yaabahindura abahuuku, nari yaabanyaga, nainga yaabahita, nari yaayetunguura, nainga yaabateera oruhi rw'amaisho. 21Mbwenu ka ngambe nk'oine enshoni, ku ebyo twabibaireho ab'amaani makye! Kwonka ekihimbya omuntu weena kwetunguura-- ka ngambe nk'omushema naanye-- kimpimbya kwetunguura. 22Bo n'Abaheburaayo? Naanye nikwo ndi. N'Abaisiraeli? Naanye nikwo ndi. Ni baijukuru ba Aburahamu? Naanye nikwo ndi. 23N'abaheereza ba Kristo? Naanye nikwo ndi n'okukiraho-- ka ngambe nk'omushazi-- nimbakira omu kukora munonga, nimbakira omu kuteebwa omu bihome, omu kuteerwa ebyasha bitarikubarwa, kandi kaingi mbuzire hakye kufa. 24Abayudaaya bakanteera emirundi etaano ebyasha makumi ashatu na mwenda. 25Nkateerwa enkoni kashatu, nkateerwa amabaare omurundi gumwe. Emeeri zikanfaho kashatu, naaraara omu nyanja kandi naagisiibamu. 26Omu ngyendo zangye eza kaingi, nkahikwaho akabi k'emigyera, akabi k'abanyagi, akabi ku naareeteirwe ab'eihanga ryangye, akabi ku naareeteirwe ab'eihanga ryangye, akabi ku nareeteirwe Abanyamahanga, akabi omu rurembo, akabi omu ihamba, akabi aha nyanja n'akabi k'abanyaruganda engobya. 27Omu kwehenenga n'omu kugumirwa, omu kuraara aha kiro kaingi ntagwejegyeire, omu kwitwa enjara n'eiriho, kaingi ntaine kokurya, omu kwitwa embeho ntaine ky'okwefubika. 28Kandi okwongyera ahari ebyo, buri izooba ntuura ndemereirwe okwemerereza omutima ebigombe by'abaikiriza byona. 29N'oha oba ow'amaani makye, naanye ntabe ntyo? N'oha oteezibwa entsibo, naanye ntashaashe? 30Ku ndaabe ndi ow'okwehimbisa, niinyija kwehimbisa ahabw'amaani gangye makye. 31Ruhanga Ishe wa Mukama Yesu, ohimbisibwa ebiro byona, naamanya ku ntarikubeiha. 32Reeba, omuri Damasiko, omutegyeki mukuru w'Omugabe Areta akarinda orurembo rwa Damasiko ngu ankwate. 33Kwonka bakanta omu kitukuru, bandabya omu dirisa, banshuumiza aha kisiika, naamwoga ntyo omu mikono.

will be added

X\