2 Corinthians 10

1Nyowe Paulo ou mugira ngu nyehumbaarika ndi hamwe naimwe, kwonka ngu mba ow'amaani ahariimwe mbari hare nimbeeshengyereza ahabw'obucureezi n'okutwaza gye ebya Kristo. 2Nimbashaba, ngu ku ndiba mbaine, ndekye kuba ow'okugambisa amaani, agu nkukoreise aha bantu bamwe abatuteekateekaho kubi, ngu nitutwaza nk'ab'ensi. 3Nobu turi abantu nk'abandi, kwonka titurwana nk'ab'ensi. 4Manya eby'okurwanisa byaitu eby'orugamba ti biba by'ab'ensi, kureka bigira amaani ga Ruhanga kusheenyagura ebigo. 5Tumaraho empaka na ibara kintu kyona ekyetunguura kuhakanisa okumanya Ruhanga; kandi nitugomoora buri kiteekateeko kworobera Kristo. 6Ku muraaheze kworobera kimwe, tweteekateekire kufubira ekyeetwa obugomi kyona. 7Naimwe mukireebe. Omuntu ku araabe naahamya ngu n'owa Kristo, aijukye ku naitwe turi aba Kristo nkawe. 8Manya nobu naakurengyesereza kwehimbisa ahabw'obushoboorozi bu Mukama yaatuhaire kubombeka, kutari kubakambura, tikikaanyitsa nshoni. 9Nyowe tinkaayenzire kushusha nk'orikubatiinisa n'amabaruha. 10Ahabw'okuba nibagira bati: Amabaruha ge gagumire kandi n'ag'amaani; kwonka omu kyemerero n'ow'amaani makye, kandi emigambire ye neegaywa. 11Abari nk'abo bamanye ngu ebi tugambira omu baruha tutariho, nibyo tukora turiho. 12Itwe titurikwenda kwebarira omu barikwehimbisa, nari kweringaaniza nabo. Manya bo ku beegyeragyeranisa, baayeringaanisa bonka na bonka, beeshanga bataine ki barikumanya. 13Kwonka itwe titurikwija kwehimbisa tutaine bugarukiro, kureka nitugumira aha rugyero oru Ruhanga yaatuteeraireho kuhika n'ahariimwe. 14Titurikurenga rugyero orwo nk'abatarabahikireho. Manya niitwe twabandize kuteera omuhanda gwona tukaija owaanyu, tubareeteire Amakuru Marungi ga Kristo. 15Titurikwehimbisiza ha bi abandi baakoreire omu byanga bitari byaitu, kwonka twine amatsiko, ngu ei okwikiriza kwanyu kurigarukira kukanya, niyo omurimo gwaitu omuriimwe gurigarukira kuhanguha. 16Obwo nibwo turirangirira Amakuru Marungi omu bindi byanga ebiiriireyo, tutarikwehimbisa habw'omurimo oguherize kukorwa omu kyanga ky'ondi. 17Mbwenu orikwehimbisa, ayehimbisize omuri Mukama. 18Manya omuntu orikwegamba marungi tiwe arikwikirizibwa, kureka ogwo orikusiimwa Mukama.

will be added

X\