2 Corinthians 1

1Nyowe Paulo, ou Ruhanga yaasiimire kuba entumwa ya Kristo Yesu, na Timoteeho mwene waitu, nituhandiikira ekigombe ky'abaikiriza Ruhanga eky'omuri Korinto, hamwe n'abarikwera boona ab'omuri Akaiya yoona. 2Nitubendeza emigisha n'obusingye ebya Ruhanga Tataitwe, na Mukama Yesu Kristo. 3Ruhanga kandi Ishe wa Mukama waitu Yesu Kristo, Taata ow'embabazi kandi Ruhanga ow'okugumibwa kwona, ahimbisibwe. 4Niwe ogwo otugumya turi omu busaasi bwaitu bwona, ngu naitwe tubone kugumya abari omu busaasi bw'omuringo gwona, nitubagumya n'ebyo ebi Ruhanga yaatugumiise. 5Manya nk'oku okubonabona kwa Kristo kushaagaana omuriitwe, n'okuhuumurizibwa kwaitu omuri Kristo nikwo kushaagaana. 6Ku tureeba enaku, tuzireeba ngu imwe muhuumurizibwe kandi mujunwe. Reero ku tuhuumurizibwa, kiba kityo ngu naimwe muhuumurizibwe okuhuumurizibwa oku mutunga, nimwemera enaku ezi tureeba. 7Nikyo tubainiiremu amatsiko gahamire; ahabw'okuba nitumanya ngu nk'oku mukwatanisa naitwe omu kubonabona kwaitu, nikwo muribagana naitwe omu kugumibwa kwaitu. 8Beene Taata, titurikwenda ngu mutamanya enaku zi twareebeire omuri Asiya. Manya zikatwita munonga, okukira oku twakubaasize kuzeemera; twarugaho twahwera kimwe amatsiko g'okukira. 9Buzimazima tukateekateeka ngu tucwereirwe orubanja rw'okufa. Ekyo kikabaho kutureetera okuteeyesiga, kureka okwesiga Ruhanga ozoora abafiire. 10Niwe yaatujunire omu kabi kahango katyo k'okufa, kandi aryatujuna: niwe twineho amatsiko ku ariguma naatujuna. 11Naimwe mugume mutuhwere nimutushabira, ngu omugisha ogu twahairwe ahabw'okushaba kw'abaingi, baingi bagusiimire Ruhanga ahabwaitu. 12Manya okwesiima kwaitu nikwo oku, nituhamya omu mitima yaitu, ku omu nsi omu, na munomuno ahariimwe, twagizire emitwarize erikwera kandi ey'amazima ahari Ruhanga, etari y'obwengye bw'ab'ensi, kureka eruga omu mbabazi za Ruhanga. 13Ahabw'okuba titubahandiikira kindi, kureka ebyo ebi murikubaasa kushoma mukeetegyereza. Nyine amatsiko ngu muryamanyira kimwe, 14nk'oku mubaire mwamanyireho ekicweka; kandi ngu muryatwehimbisisa, nk'oku turibeehimbisisa, aha Kiro kya Mukama Yesu. 15Ahabw'ago matsiko, nkenda kuba niimwe naabanza kutaayaayira, ngu mubone kushemererwa kabiri. 16Nkenda kubataayaayira ninza Makedoniya, kandi mbarabeho nindugayo, ngu naimwe mubone kunshendekyereza ninza Buyudaaya. 17Obu naayenda kukora ekyo, nimugira ngu nkaba nimpindahinduka? Ngu ku nteekateeka kugira eki naakora, nkikora nk'omuntu w'ensi orahukirwa kugira ati: Eego, kandi handi hakye, ati: Ngaaha? 18Nindahira Ruhanga ow'amazima, ku ekigambo kyaitu kitakabaga Eego, na Ngaaha. 19Ahabw'okuba Omwana wa Ruhanga Yesu Kristo, ou Silivaano na Timoteeho naanye twabarangiriire, takabaga Eego na Ngaaha; kureka omuriwe obutoosha ni Eego. 20Manya byona ebi Ruhanga yaaraganiise biba Eego omuriwe. Nikyo tugirira omuriwe tuti: Amiina, kuhaisa Ruhanga ogwo ekitiinwa. 21Ruhanga niwe atuhamya hamwe naimwe ku twine amagara omuri Kristo, kandi niwe yaatutooraine, 22akatutaho akamanyiso ke, haza akatuha Mutima we omu mitima yaitu, kuba omukwato ogurikutuhamiza ebi atubiikiire. 23Kwonka Ruhanga niwe mujurizi wangye ekyanzibiire kugaruka Korinto n'okubasaasira, 24kutari kugira ngu nitwenda kutegyekyesa okwikiriza kwanyu eikama, kureka okuba abarikukwatanisa naimwe ngu mushemererwe, ahabw'okuba mutuura muri abahamire omu kwikiriza kwanyu.

will be added

X\