1 Timothy 6

1Abo boona abari omu nkomo y'obuhuuku bagume bamanye ku bashemereire kuha bakama baabo ekitiinwa, eiziina rya Ruhanga n'enyegyesa yaitu bitakaacamurwa. 2Abahuuku abaine bakama baabo abaikiriza, tibashemereire kwanga kubaha ekitiinwa, ngu niho bari abanyaruganda. Nangwa bashemereire kukizaho kubaheereza gye, ahabw'okuba abo abarikugasirwa obuheereza bwabo, n'abaikiriza kandi n'abakundwa. Ebyo guma obibeegyese kandi obibeehanangirize. 3Omuntu weena oryegyesa okundi, atarikwikirizana na bigambo ebihikire ebya Mukama waitu Yesu Kristo, n'enyegyesa ekwatiraine n'okutiina Ruhanga, 4biri naayetunguuzibwa amaryo, ataine ki arikumanya. Aba arwaire akanju k'okururuuhira empaka, n'okuhakana aha bigambo ebirugwamu eihari, entongane, okubeihererana, okuteekateekyerana kubi, 5n'okutonganira busha. Haza ebyo byona bikorwa abantu abasiisikaire obwengye, abatakiine mazima, abateekateeka ngu okutiina Ruhanga kuba oburyo bw'okwetungira amagoba. 6Kwonka okushongoka ahari Ruhanga okurimu okumarwa kwine amagoba maingi. 7Manya tituraijaine kintu mu nsi, kandi titurikubaasa kutwara kintu nitugirugamu. 8Haza ku turaabe twine ebyokurya n'eby'okujwara, ebyo bitumare. 9Kwonka abaruruuhira okutunga, bagwa omu kwohibwa n'omu mutego n'omu byetengo bingi ebitarimu bwengye, kandi eby'akabi ebirohamya abantu omu kuconcoboza n'omu kuhwerekyerera. 10Manya okururuuhira empiiha kuba obukomooko bw'ebibi byona, ahabw'okuba ahabw'okururuuha okwo, bamwe barahabire bakaruga omu kwikiriza, bakeeshogoitesa enaku nyingi. 11Mbwenu iwe omuntu wa Ruhanga, ebyo ogume obyetantare, okuratire okuhikiirira, okutiina Ruhanga, okwikiriza, okukunda, okugumisiriza, n'okutwaza mpora. 12Rwana orugamba rurungi orw'okwikiriza, ohamye amagara agatahwaho, agu waayeteirwe obu waayatura gye noohiga omu maisho ga baakareebi baingi. 13Ninkwehanangiriza omu maisho ga Ruhanga oha ebintu byona amagara, n'omu maisho ga Kristo Yesu owaahamize naagamba gye butunu omu maisho ga Pontio Pilaato, 14ku orinda eki naakuragiira, otaine kamogo kandi otarikuhaahuuzibwa, okuhitsya aha kuboneka kwa Mukama waitu Yesu Kristo. 15Okwo kuboneka, Ruhanga aryakworeka omu bunaku bwakwo. Niwe mutegyeki wenka ohimbisibwa, Omugabe w'abagabe, Mukama w'abakama. 16We wenka niwe aba otafa, kandi otuura omu mushana ogutahikwa. Tihariho muntu weena oramureebire, kandi tihariho oribaasa kumureeba. Ekitiinwa n'obutegyeki obutarihwaho bibe ebye. Amiina. 17Yehanangirize abatungi b'omu nsi egi, barekye kwetunguura nari kuta amatsiko gaabo aha butungi obutarikwesigwa, kureka bagate ahari Ruhanga otutungisa ebintu byona atarikubariirira, ngu bitunanure. 18Bashemereire kukora gye, bakaba abatungi omu birungi ebi barikukora, babe abagabi kandi efura. 19Batyo beebiikire eitungo eriribabeera obuhamizo burungi omu biro ebiriija, bakabona kugumya amagara nyakabara. 20Iwe Timoteeho, guma orinde eki waakwatsiibwe. Yetantare ebigaaniiro by'okuregyeta eby'abatatiina Ruhanga, n'empaka ezi beeta okumanya. 21Haza bamwe ku baayesiimiraine okwo kumanya, baateishuka okwikiriza. Embabazi za Ruhanga zigume naimwe!

will be added

X\