1 Timothy 4

1Mbwenu Mutima naagamba butunu, ngu omu biro ebya bwanyima, bamwe baryatsigisibwa okwikiriza, bahugire aha mitima erikuhabisa, n'aha nyegyesa za Sitaane. 2Abo bantu bahabisibwe oburyarya bw'ababeihi, abu emitima yaabo erikushusha oti esiriiziibwe Sitaane. 3Nibo abo abazibira abantu kushwera, n'okurya ebyokurya nanka, haza Ruhanga yaahangire ebyo byokurya kuriibwa abamwikiriza. Nibo abarikumanya amazima, bakabirya nibabimusiimira. 4Manya kyona ekyahangirwe Ruhanga kiba kirungi, kandi tihariho kizira, kyaba kyakiirwe n'okusiima. 5Ahabw'okuba nikiba ekigambo kya Ruhanga kyeeziibwe n'okushaba. 6Ebyo ku oraabishoboororere abanyaruganda, noija kuba omuheereza murungi wa Kristo Yesu, oyoroirwe ebigambo by'okwikiriza n'eby'enyegyesa nungi ei waakuratiire. 7Guma oyetantare ebigano ebigunjano, ebirimu okutatiina Ruhanga kandi eby'orwanju. Yemanyiize okutiina Ruhanga. 8Manya okwemanyiiza omu by'omubiri, nobu kuraabe kwine omugasho, kwonka okutiina Ruhanga kwine omugasho omu miringo yoona; ahabw'okuba kutureetera kugira amatsiko omu magara aga n'omu magara agariija. 9Ekyo kigambo n'eky'okwesigwa kandi kishemereire kwikiririzibwa kimwe. 10Nikyo twehenengyerera tukeezirika, ahabw'okuba amatsiko gaitu tutuura tugataire ahari Ruhanga ohuriire, oba Omujuni w'abantu boona, munomuno ow'abarikwikiriza. 11Ebyo guma obiragiire kandi obyegyese. 12Hatarigira owaakugayira obutsigazi bwawe, kureka obe eky'okureeberwaho abaikiriza omu bigambo n'omu micwe, omu kukunda, omu kwikiriza n'omu kugira omutima murungi. 13Guma oteho omutima kushomera abantu Ebyahandiikirwe, kubarangirira kandi n'okubeegyesa, okuhitsya obu ndiija. 14Otarihuga aha kiconco eki oine, eki waahairwe ahabw'eki abarangi baagambire, obu abakuru baakutaho emikono. 15Ebyo guma obikore kandi obiteho omutima, boona babone kureeba oku orikugyenda omu maisho. 16Oyerinde omu mitwarize yaawe n'omu bi orikwegyesa; haza obigumizemu, ahabw'okuba ku oraakore otyo, oryayejuna kandi ojune n'abarikukuhurira.

will be added

X\