1 Timothy 3

1Ekigambo eki n'eky'amazima. Omuntu weena ku ayetenga ngu abe omureeberezi, biri ayetengire omurimo murungi. 2Mbwenu omureeberezi ashemereire kutagira kintu kyona eki arikuhaahuuzibwa; abe oshweire omukazi omwe, abe orikwerinda, orikwetegyereza, otarikugaywa efura, orikurahukirwa kwegyesa. 3Arekye kuba omusinzi, ow'omwaga, kureka omucureezi, atari ntongani nari enkunzi y'empiiha. 4Ashemereire kuba orikubaasa kutegyeka eka ye, abaana be nibamworobera kandi nibamuha ekitiinwa omu miringo yoona. 5Mbwenu omuntu otarikubaasa kutegyeka eka ye, naabaasa ata kureeberera ekigombe ky'abaikiriza Ruhanga? 6Tashemereire kuba omuntu ohindukire Omukristo juba, atakaagira amaryo, akeetunguura, akasingwa orubanja orwasingire Sitaane. 7Ekindi, ashemereire kuba omuntu orikugambwa gye ab'aheeru, batakaamucamura, akagwa omu mutego gwa Sitaane. 8Abahwezi nabo bashemereire kuba abahikire, abatari b'endimi ibiri, abatari bantabo yaago, abataine mururu gw'okutunga. 9Bashemereire kurinda eibanga ry'okwikiriza n'omutima murungi; 10kandi bashemereire kubanza kugyezibwa, bakyeyoreka bataine ki barikuhaahuuzibwa, bakabona kuheereza bari abahwezi. 11Abahwezikazi nabo bashemereire kuba abahikire, abatarikubeiherera bandi, kureka abari abeerinzi kandi abeesigwa omuri byona. 12Abahwezi babe buri omwe oshweire omukazi omwe, kandi babe abarikubaasa kutegyeka gye abaana baabo n'eka yaabo; 13ahabw'okuba abaheereza gye bari abahwezi beetungira eiziina rirungi, kandi bagira obwesigye bwingi oburikuhamya okwikiriza oku baine omuri Kristo Yesu. 14Nyine amatsiko g'okwija owaanyu juba; kwonka ebi naabikuhandiikira ngu 15ku ndaabe naakyerereirwe, omanye oku abantu bashemereire kutwaza omu nju ya Ruhanga. Niryo iramizo rya Ruhanga ohuriire, enyomyo kandi obuhamizo obw'amazima. 16Ahatari kubangaanisa, eibanga ry'ediini yaitu ni rikuru buzima, eririkugira riti: Akoorekwa aine omubiri, yaahamibwa Mutima ku ahikiriire, yaareebwa baamaraika, yaarangirirwa omu mahanga, yaikirizibwa ab'omu nsi, yaatwarwa omu iguru n'ekitiinwa.

will be added

X\