1 Eky'okubanza kya byona, nimbeehanangiriza ku mushabira abantu boona, nimubeeshengyerereza, nimubatonganira, nimubasiimira, 2 kandi nimushabira abagabe n'abandi boona abaine emyanya mikuru, tubone kubukaara twine obusingye, nitutiina Ruhanga kandi nitutwaza gye omu buryo bwona. 3 Ekyo ni kirungi kandi nikisiimwa omu maisho ga Ruhanga Omujuni waitu, 4 oyenda abantu boona ku bajunwa bakamanya amazima. 5 Manya Ruhanga n'omwe, kandi omuteeranizi otuura ahagati ya Ruhanga n'abantu nawe n'omwe. Niwe muntu Kristo Yesu, 6 owaayehaireyo kuba encungurano y'abantu boona; haza ekyo akakihamya omu bunaku bwakyo obuhikire. 7 Nikyo naateereirweho kuba entumwa kandi omwegyesa w'Abanyamahanga, nimbarangirira eby'okwikiriza n'eby'amazima ningamba amazima, ntarikubeiha. 8 N'ahabw'ekyo niinyenda abashaija omu myanya yoona ku baguma bakashaba baimukize emikono eyezire, bataine kiniga nari entongane. 9 Kandi niinyenda abakazi ku baguma nibeehunda beerinzire, batarikurengyesereza, bajwaire ebijwaro ebibashemereire, batarikutsiba ishokye, nari okushagika eby'ezaabu nari eruuru, nainga ebijwaro by'obuguzi bwingi; 10 kureka beehunde ebikorwa birungi, nk'oku kishemereire abakazi abanyadiini. 11 Omu kwegyesibwa, omukazi agume ahuname acureire. 12 Tindikwikiriza mukazi kwegyesa, nari kugira obushoboorozi aha bashaija; ashemereire kuguma acecekire. 13 Manya Adamu niwe yaabandize kuhangwa, hakakurataho Eva; 14 kandi Adamu tiwe yaabeihabeihirwe, kureka omukazi niwe yaabeihabeihirwe, akagwa omu kibi. 15 Kwonka omukazi omu kuzaara abaana aryajunwa, yaaba agumiizemu naikiriza aine rukundo, ari orikwera kandi aine emitwarize mirungi.
