1 Timothy 1

1Nyowe Paulo, entumwa ya Kristo ahabw'okuragiira kwa Ruhanga Omujuni waitu n'okwa Kristo Yesu matsiko gaitu, 2ninkuramutsya iwe Timoteeho, omwana wangye buzima omu kwikiriza; ninkwendeza emigisha n'embabazi n'obusingye ebikomooka ahari Ruhanga Taata, na Kristo Yesu Mukama waitu. 3Obu naabaire ninza Makedoniya, nkakwehanangiriza kuguma Efeso, ngu obone kuteisa abantu bamwe, barekye kwegyesa enyegyesa endi. 4Obagambire barekyere aho kuhugira aha nfumu engunjano, n'okutondoora akarande k'oruzaaro rwa baishenkurubo ebitaine bugarukiro. Manya okutondoora okwo, omu mwanya gw'okutendeka abantu ebya Ruhanga ebiri omu kwikiriza, kuzaarukwamu empaka zonka. 5Haza kunu eki turikugyenderera omu bi turikuragiira, ni rukundo erikuruga omu mutima gushemeire kandi ogutarikweshinja, n'okwikiriza okutarimu buryarya. 6Kwonka abantu bamwe ahabw'okuteishuka ebyo, bakahabira omu mpaka zitaine mugasho. 7Nibenda kuba abeegyesa b'eiteeka, batarikwetegyereza bi barikugamba n'ebi barikuhamya. 8Mbwenu itwe nitumanya eiteeka ku riri rirungi, omuntu yaaba naarikoresa omu buteeka. 9Tushemereire kwetegyereza ku eiteeka ritaratairweho ahabw'abahikiriire, kureka ahabw'abagomi n'abatahurira, abatari bashongore ahari Ruhanga n'abasiisi, ahabw'abatari barikwera n'abahagaza ebya Ruhanga; ahabw'abaita baishebo n'abaita baanyinabo n'ahabw'abaitsi b'abandi bantu; 10ahabw'abashambani, abashambana bonka na bonka, n'abaiba abantu kubaguza, ahabw'ababeihi n'abarahizi b'ebishuba, n'ekindi kyona ekirikuhakanisa enyegyesa ehikire. 11Egyo niyo nyegyesa erikwikirizana n'Amakuru Marungi ag'ekitiinwa aga Ruhanga ohimbisibwa, agu naakwatsiibwe. 12Ninsiima Yesu Kristo Mukama waitu owampaire amaani g'okumuheereza, ahabw'okuba niwe yansiimire ku ndi omwesigwa, akantooranira ogwo murimo. 13Nobu ndaabe ira naamurogotsireho, nkamuhiiganisa kandi nkamujuma, kwonka akangirira embabazi, ahabw'okuba ebyo nkabikoresa obutamanya ntakaikiriize. 14Bwanyima Mukama waitu yangirira embabazi nyingi, hamwe n'okwikiriza na rukundo ebi tutungira omuri Kristo Yesu. 15Ekigambo ekyo n'eky'okwesigwa kandi kishemereire kwikirizibwa, ekirikugira kiti: Kristo Yesu akaija omu nsi kujuna abasiisi, haza omuribo niinye rurangaanwa. 16Kwonka eki naagiririirwe embabazi n'eki, ngu Yesu Kristo ayorekyere omuriinye omusiisi rurangaanwa, okugumisiriza kwe okutaine bugarukiro, haza mbone kuba eky'okureeberwaho abarimwikiriza, bakatunga amagara agatahwaho. 17Omugabe w'ebiro n'ebiro, Ruhanga otafa, otareebwa kandi omwe wenka, ahimbisibwe kandi aheebwe ekitiinwa obusingye n'obusingye. Amiina. 18Mwana wangye Timoteeho, ebi naakwehanangiriza ebyo ni nk'ebi abarangi baakugambireho, ngu ku biraakwezirikise, obone kurwana orugamba rurungi, 19ohamize okwikiriza n'omutima gutarikweshinja. Manya ahabw'okutenda kugira ogwo mutima murungi, abantu bamwe bakarohamya okwikiriza kwabo; 20omuribo ni Himenaayo na Alekisandero, abu naarekuriire Sitaane ngu bakaayega okutarogota.

will be added

X\