1 Peter 5

1Mbwenu niinyehanangiriza abakuru omuriimwe. Naanye ndi omukuru mugyenzi waabo, kareebi w'okubonabonesibwa kwa Kristo, kandi orikubarirwa omuri abo abaritunga ekitiinwa ekirishuuruurwa. 2Nimbagambira nti: Muriise obusyo bwa Ruhanga obu mwakwatsiibwe, mubureeberere mutarikugyemwa, kureka mwekundiire, nk'oku Ruhanga arikubendeza; mutarikuburiisa nk'abaguririirwe, kureka mubwiniire omuhimbo. 3Mutaritegyekyesa eikama abu mwakwatsiibwe, kureka mube eky'okureeberwaho obwo busyo. 4Reero Omuriisa omukuru ku ariboneka, muryaheebwa ekirunga ky'ekitiinwa ekitarikuhunduuka. 5Naimwe abato, mworobere abakuru. Mbwenu mwena, muhereezane, omuntu na mugyenzi we, nimwebundika, ahabw'okuba ekyahandiikirwe nikigira kiti: Ruhanga ayangira abeetunguura, kwonka abeebundika abaha omugisha. 6N'ahabw'ekyo mwebundikye ahansi y'omukono gwa Ruhanga ogw'amaani, abone kubatunguura obunaku bwahika. 7Ebyanyu byona ebibashobeire mubimwegyekyerere, ahabw'okuba naabataho omutima. 8Mugume nimwebarira kandi nimureeba. Manya Sitaane omuzigu waanyu naazengyerere nk'entare erikutsinda, neesherura ou eraashonshomere. 9Mumwangire, muhamiire omu kwikiriza kwanyu, nimumanya abanyaruganda abari omu nsi yoona nabo ku bahikwaho okubonbona nk'okwanyu. 10Reero ku muriheza kubonabonesibwaho akaanya kakye, Ruhanga ow'embabazi zoona, owaabeeteire ekitiinwa kye ekitahwaho omuri Kristo, aryabagaruraho, abahamye kandi abagumye. 11Ogwo abe niwe yaategyeka ebiro byona! Amiina. 12Naabahandiikira nincwera hagufu, nimpandiikisa Silivaano, ou ndikweta omunyaruganda omwesigwa. Nimbeehanangiriza kandi nimbahamiza ku ebyo biri embabazi za Ruhanga ez'amazima; haza mube nizo mwahamiramu. 13Ekigombe ky'abaikiriza eky'omuri Babulooni, nakyo ekyatoorainwe Ruhanga, nikibaramutsya. N'omwana wangye Mariko naabaramutsya. 14Muramutsyane n'okunywegyerana okurikwera. Imwe mwena abari omuri Kristo, mugume n'obusingye!

will be added

X\