1 Peter 3

1Naimwe bakazi 'mwe, mworobere baabaroimwe, ngu abamwe omuribo, nobu baraabe batarikwikiriza kigambo kya Ruhanga, bahindurwe emitwarize y'abakazi baabo, banu bataine ki babagambiire, 2kureka baareeba emicwe yaanyu eshemeire kandi erimu okutiina Ruhanga. 3Okwecuma kwanyu kurekye kuba okw'okweshemeza aharuguru: nimutsiba eishokye, nimwehunda eby'ezaabu, nimujwara ebiragaize aha bigyere. 4Kureka okwo kwecuma kube okw'omunda omu mitima yaanyu okw'eihunde eritarikusiisikara, ery'omutima omucureezi kandi ogutuurize, ogw'obuguzi bwingi omu maisho ga Ruhanga. 5N'abakazi aba ira abarikwera, abaabaire bata amatsiko omuri Ruhanga, bakaba beecuma batyo kandi boorobera baibabo, 6nka Saara oku yaabaire ayorobera Aburahamu naamweta mukama we. Naimwe hati muri bahara be mwaba nimukora gye, mutaine kintu kyona ekirikubatiinisa. 7Naimwe bashaija 'mwe, mutuure n'abakazi baanyu mubainiire omwete, nimubaha ekitiinwa; nimumanya ku bari enyabya zitagumire, kandi ku bari abahunguzi hamwe naimwe b'engabirano ya Ruhanga ey'amagara, okushaba kwanyu kubone kutateerwa ha mutwe. 8Eky'aha muheru, mwena mugire omutima gumwe, mugirirane esaasi na rukundo y'enyina-emwe, mugire omutima gw'embabazi kandi omucureezi. 9Mutarigarurirana ebibi nari okujumiirana, kureka mugume mushabirane emigisha. Manya ekyo nikyo Ruhanga yaabeeteire, ngu mubone kutunga emigisha. 10Ahabw'okuba ekyahandiikirwe nikigira kiti: Orikweyendeza amagara n'okugira omuraaro murungi, azibire orurime rwe kugamba ebibi, n'akanwa ke kugamba eby'obugobya. 11Ayetantare ebibi, akore ebirungi, asherure obusingye kandi abwitanire. 12Manya Mukama ata amaisho aha bahikiriire, kandi amatu ge agatega okushaba kwabo. Kwonka enkozi z'ebibi aziteera ekitsyori. 13Mbwenu n'oha owaakubakora kubi, mwaba mwine omuhimbo gw'okukora ebirungi? 14Ku mwakuba nimubonabonesibwa ahabw'okuhikiirira, nimuba mwine omugisha. Mutaritiina okukangisa kw'abantu, nobu kwakuba okwemereza omutima; 15kureka omu mitima yaanyu, mugume muhe Kristo ekitiinwa, abe Mukama waanyu. Obutoosha mugume mweteekateekire kushoboororera omuntu weena owaakubabuuza eby'amatsiko agu mugira. 16Kwonka ekyo mukikore n'obucureezi nimuha Ruhanga ekitiinwa. Mugume mwine omutima gutarikweshinja; haza abarikugamba kubi aha mitwarize yaanyu mirungi ei mwine omuri Kristo, ku baraabajume, bahemukye. 17Haakiri mubonabonesibwe nimuturwa okukora ebirungi, Ruhanga yaaba akisiimire, okukira okuturwa okukora ebibi. 18Manya Kristo akafa rimwe ahabw'ebibi byaitu yaaheza, ari ohikiriire ahabw'abatahikiriire, ngu abone kutuhitsya ahari Ruhanga, owaitsirwe omu mubiri, akahindurwa ohuriire omu mutima. 19Omuri ogwo mutima nimwo yaagyendeire, akarangirira emitima y'abaafiire eyaabaire eri omu kihome. 20Nibo ira abataroorobire, obu Ruhanga yaagumisiriza ategyereize omu biro bya Noa, obu emeeri yaabaire neekorwa, ei abantu bakye munaana baakiriiremu amaizi. 21Mbwenu ago maizi gakaba gari ekyeshusha ky'okubatizibwa okurikubajuna imwe omu biro ebi. Okubatizibwa okwo tikuba kwozya nziro ha mubiri, kureka kuba okuhoogyera Ruhanga n'omutima gwezire, kukahaisa okujunwa ahabw'okuzooka kwa Yesu Kristo. 22Niwe ogwo owaagiire omu iguru, kandi ori aha rubaju rwa Ruhanga orwa buryo, naategyeka baamaraika n'ab'obushoboorozi n'ab'amaani.

will be added

X\