1 Peter 2

1N'ahabw'ekyo mweiheho eitima ryona n'obugobya bwona n'oburyarya n'eihari n'okubeihererana kwona. 2Nk'abeerere, mwetengye amate g'omutima agatafungwire, gabone kubakuza n'okubahitsya aha kujunwa. 3Ahabw'okuba ekyahandiikirwe nikigira kiti: Mwarorize aha burungi bwa Mukama. 4Mwije ahari ogwo eibaare erihuriire, eryayangirwe abantu, kwonka ahari Ruhanga, eryatoorainwe kandi ery'obuguzi bwingi. 5Naimwe mube nk'amabaare agahuriire, mwombekirwe kuba obutaaho bwa Mutima, abahongyerezi abarikwera, abarikuhonga ebitambo by'omutima ebirikusiimwa Ruhanga omuri Yesu Kristo. 6Manya omu Byahandiikirwe harimu ekirikugira kiti: Reeba, ninta omuri Siyooni eibaare ry'obuhamizo eritoorainwe kandi ery'obuguzi bwingi. Weena orikumwikiriza tariitwa nshoni. 7Ahariimwe abarikwikiriza, eryo ibaare n'ery'obuguzi bwingi. Kwonka aha batarikwikiriza, ekyahandiikirwe nikigira kiti: Eibaare eri abombeki baayangire, rikahinduka obuhamizo bw'enju. 8Kyongyera kiti: Ryaba eibaare eririteeza abantu entsibo, kandi orukiri oruribagwisa. Bateerwa entsibo ahabw'okuba tiboorobera kigambo, nk'oku baakiteekateekyeirwe Ruhanga. 9Kwonka imwe muri oruganda orutoorainwe, abahongyerezi b'oruganda rw'omugabe, eihanga eirikwera, abantu ba Ruhanga ab'envuma, ngu mubone kworeka butunu ebikuru ebyakozirwe Ruhanga owaabeetsire, akabaiha omu mwirima, akabataasya omu mushana gwe ogurikutangaaza. 10Ira mukaba mutari ihanga, kwonka hati muri eihanga rya Ruhanga. Ira mukaba mutakagiriirwe Ruhanga embabazi, kwonka hati muzigiriirwe. 11Bakundwa 'mwe, nimbeeshengereza nk'abari omu ihanga kandi abazaahiire omu nsi egi, ku mwetantara okwetenga okubi okw'omubiri, okurikurwanisa amagara gaanyu. 12Mugume mwine emitwarize mirungi omu Banyamahanga, reero bakiba nibenda kubagambuura ngu muri enkozi z'ebibi, bareebe ebirungi ebi mukora, bahimbise Ruhanga aha kiro eki ariiziraho. 13Ahabwa Mukama, mugume mworobere abantu boona abarikubategyeka, yaaba ari Rubambansi ahabw'okuba niwe mukuru; 14nari ari omutegyeki omukuru otumirwe Rubambansi, kufubira abarikukora kubi n'okusiima abarikukora gye. 15Manya eki Ruhanga akunda nikyo eki: ngu omu kukora gye kwanyu mwigare akanwa k'abashema abataine ki barikumanya. 16Mube abantu abaine obusingye, kwonka obusingye bwanyu obwo butaba orwekwatso rw'okukora ebibi, kureka mugume mutwaze nk'abaheereza ba Ruhanga. 17Muhe abantu boona eifubo, mukunde abanyaruganda, mutiine Ruhanga, kandi muhe Rubambansi ekitiinwa. 18Imwe abaheereza, mworobere abakama baanyu nimubaheera kimwe ekitiinwa, ti b'embabazi n'abarikutwaza gye bonka, kureka n'abanyamwaga. 19Ahabw'okuba omuntu asiimwa yaaba naagumisiriza obusaasi naijuka Ruhanga, haza obwo naaturwa busha. 20Mbwenu nimusiimwaho ki, mwaba mwemeire okuteerwa, nibabatura okukora kubi? Kwonka ku mukora ekirungi, mwayemera obusaasi obwabateebwaho ahabw'okukikora, Ruhanga naabasiima. 21Manya ekyo nikyo mwayeteirwe, ahabw'okuba na Kristo akabonabona ahabwanyu, yaabatsigira eky'okureeberaho, ngu mubone kutoora ekirari kye. 22Kristo tarakozire kibi, n'obugobya tiburareebekire mu kanwa ke. 23Ku yaajumirwe, we tiyaajuma; ku yaabonabonesiibwe, tiyaahayira; kureka akeesiga Ruhanga ocwa emanja omu bwinganisa. 24Kristo nyakabara akeekorera ebibi byaitu omu mubiri gwe aha musharaba, ngu tubone kufa aha kibi n'okuba abahuriire aha kuhikiirira. Obuhuta bwe nibwo bwabakirize. 25Manya mukaba muhabire nk'entaama, kwonka hati mukubuukiire Omuriisa kandi Omureeberezi w'amagara gaanyu.

will be added

X\