1 Corinthians 9

1Tindi ow'obusingye? Tindi entumwa? Tindareebire Yesu Mukama waitu? Timuri ebyana by'omurimo gwangye omuri Mukama? 2Nobu ndaabe ntari ntumwa aha bandi, kwonka shi ahariimwe nikwo ndi, ahabw'okuba niimwe ky'okuhamizaho eky'obutumwa bwangye omuri Mukama. 3Oku nikwo kwetonganira kwangye aha barikumpakanisa: 4itwe shi, tituri b'okuheebwa ebyokurya n'ebyokunywa? 5Nituzibirwa kugyenda n'omukazi munyaanyaitwe, nk'ezindi ntumwa na barumuna ba Mukama na Keefa oku bagira? 6Nari shi niinye nyenka na Barinaba abarikuragiirwa kukora eby'okwetunga? 7N'oha oza aha rugamba, akeegurira eby'okumukwatsa? N'oha obyara emizaabibu omu musiri, atarye bijuma byayo? N'oha oriisa obusyo, atanywe mate gaabwo? 8Mbwenu ebyo nimbigamba nk'omuntu-nyabuntu, nari shi eiteeka tikwo rigira? 9Manya kikahandiikwa omu iteeka rya Musa kiti: Otariboha akanwa k'endaaho neejunga enjuma. Endaaho shi Ruhanga nizo arikusaasibwa? 10Buzimazima tiitwe arikugambaho? Manya kikahandiikwa ahabwaitu, ahabw'okuba omuhingi ahinga aine amatsiko, n'omuhuuzi ahuura aine amatsiko g'okubagana aha bishaarwirwe. 11Itwe ku turaabe twababibiremu ebirungi by'omutima, nimugira ngu kiremeire munonga kubagyeshamu eby'okuhwera omubiri? 12Abandi ku baraabe babatungaho ebi babenza, kaashwa itwe? Kwonka itwe titurakoreise obwo bushoboorozi, kureka twemera byona, ngu tutakaateera aha mutwe Amakuru Marungi ga Kristo. 13Timurikumanya abaheereza omuri Nyaruju ya Ruhanga ku nimwo baiha ebyokurya, n'abaheereza aha itambiro ku babagana aha bitambiirweho? 14Na Mukama waitu nikwo yaaragiire, ngu abarangirira Amakuru Marungi batungwe eby'Amakuru Marungi. 15Kwonka nyowe tinkakoresaga obwo bushoboorozi, kandi eki tinaakihandiika ngu mbone kutunga eby'okunkwatsa nk'ebyo. Haakiri nfe, okukira omuntu weena okuunyaka ekirikuunyesiimisa. 16Manya ku ndangirira Amakuru Marungi, ekyo tikiinyesiimisa; ahabw'okuba ningyemeserezibwa kukikora. Ninkaitwe enaku ku naakuba ntarangiriire Makuru Marungi! 17Manya ekyo ku ndikukikora nyekundiire, nintunga ebihembo. Kwonka ku ndikuba nteekundiire, nimba nkwatsiibwe omurimo ogu ndaagire eki naagutungaho. 18Mbwenu obwo ebihembo byangye ni biba biri biiha? Nigwo mugisha gw'okurangiririra busha Amakuru Marungi, ntarikukoresa bushoboorozi bwangye bwona oburikuunyikirizibwa omu Makuru Marungi. 19Nobu ndaabe ntarikutegyekwa muntu weena, nkeehindura omuhuuku ahari boona, ngu mbone kuhindura baingi. 20Aha Bayudaaya nkatwaza nk'Omuyudaaya; aha barikutegyekwa eiteeka nkaba nk'orikutegyekwa eiteeka, nyowe nobu ndaabe ntarikutegyekwa, iteeka kwonka ngu mbone kuhindura abarikutegyekwa iteeka. 21Aha batarikutegyekwa iteeka, nkaba nk'otarikutegyekwa iteeka, kutari kugira ngu tindikworobera iteeka rya Ruhanga, ahabw'okuba nintegyekwa eiteeka rya Kristo ngu mbone kuhindura abatategyekwa iteeka. 22Aha bataine maani nkaba nk'otaine maani, ngu mbone kuhindura abataine maani. Ahari boona nkeehindura byona, ngu omu buryo bwona mbone kurokora bamwe. 23Ebyo byona mbikora ahabw'Amakuru Marungi, ngu mbone kubagana aha migisha yaago. 24Timurikumanya ngu omu mpaka z'okwiruka, boona abairuka bahigana, kwonka oheebwa ekihembo ku aba omwe? Naimwe nu mwirukye mutyo mubone kukitunga. 25Manya omuzaani weena orikuhakana ayerinda omuri byona. Haza ekyo bakikora kutunga ekirunga ekirikusiisikara, kwonka itwe twitanira ekitarikusiisikara. 26Nangwa naanye nikwo nyiruka ntyo ntarikwirukira eryo; nikwo nteera entomi, ntari nk'orikuteera busha, 27kureka nyasha omubiri gwangye ngu ngutegyekye, nyentsya ku ndiba naaherize kurangirira abandi, ndekye kubarwa ntahikire.

will be added

X\