1 Corinthians 7

1Mbwenu aha bi mwampandiikiire, ni kirungi omushaija okutaba na mukazi. 2Kwonka ahabw'okwerinda obushambani, buri mushaija agire omukazi we, na buri mukazi agire omushaija we. 3Omushaija ashemereire kuha omukazi we eki yaamushwereire, n'omukazi nawe ashemereire kutwaza atyo iba. 4Ahabw'okuba omukazi tategyeka mubiri gwe, kureka gutegyekwa iba; n'omushaija tategyeka mubiri gwe, kureka gutegyekwa omukazi we. 5Murekye kwimana, kureka shana mwaba muragaine okumara omwanya nanka, ngu mubone kwemarira omu kushaba Ruhanga; bwanyima mugarukye kuteerana, Sitaane atakaabatega ahabw'okuremwa kwezibira. 6Eki ninkibagambira nk'orikubahabura, kutari kubaragiira. 7Nkaayenzire mwena mube nkaanye; kwonka buri omwe aine ekiconco kye ahabwe, eki yaahairwe Ruhanga; omwe okwe n'ondi okwe. 8Abatakashweraine, n'abafaakazi, ningira nti kikaabaire kirungi baguma batyo, nkaanye; 9kwonka ku baraabe batarikubaasa kwezibira, bashwerane. Ahabw'okuba embu y'okubugumwamu akarigiijo, haakiri okushwerana. 10Kandi abashweraine nimbaragiira, tiinye, kureka Mukama, nti: Omukazi tashemereire kutaana na iba, 11kwonka ku araakikore, agumire aho atashweirwe, nainga shi agarukane na iba; n'omushaija tashemereire kushenda mukazi we. 12Abandi niinye ndikubagambira, ti Mukama, nti omunyaruganda ku araabe aine omukazi otari mwikiriza, ogwo mukazi yaasiima kuguma nawe, iba tashemereire kumushenda. 13N'omukazi omunyaruganda, ku araabe aine iba otari mwikiriza, ogwo mushaija yaasiima kuguma nawe, ogwo mukazi tashemereire kutaana nawe. 14Ahabw'okuba omushaija otari mwikiriza ayezibwa ahabw'omukazi we, n'omukazi otari mwikiriza ayezibwa ahabwa iba. Ku kyakuba kitari kityo, abaana baanyu bakaabaire bari abatashemeire, kwonka hati n'abarikwera. 15Mbwenu omwe ahari bombi, otari mwikiriza, ku araabe naayenda kutaana, ataane; ahabw'okuba Ruhanga akatweta ngu tugire obusingye. 16Iwe mukazi 'we, noomanyira hi ku otarijuna baro? Iwe mushaija 'we, noomanyira hi ku otarijuna mukazi waawe? 17Buri omwe k'atwaze nk'oku Mukama yaamuteekateekyeire, omu ki Ruhanga yaamweteiremu. Ekyo ninkitaho kuba ekiragiro omu bigombe by'abaikiriza byona. 18Ku haraabe hariho owaayetsirwe yaashazirwe, arekye kwenda kweihaho okusharwa kwe. Ku haraabe hariho owaayetsirwe atakashazirwe, arekye kwenda kusharwa. 19Manya okusharwa nari okutasharwa ti kintu, kureka okukuratira ebiragiro bya Ruhanga. 20Buri omwe ashemereire kuguma nk'oku yaabaire ari obu yaayetwa. 21Ku oraabe waayetsirwe ori omuhuuku, ekyo kitakusaasa; kwonka ku oraabe noobaasa kurekurwa, orekurwe. 22Manya owaayetsirwe omuri Mukama ari omuhuuku, aba ari ou Mukama ahaire obusingye. Kandi n'owaabaire ari ow'obusingye obu yaayetwa, aba omuhuuku wa Kristo. 23Mukagurwa n'obuguzi bwingi, murekye kuba abahuuku b'abantu. 24N'ahabw'ekyo, beene Taata, buri muntu agume omu maisho ga Ruhanga nk'oku yaabaire ari obu yaayetwa. 25Aha bikwatiraine n'abatashweraine, timbiineho kiragiro kya Mukama, kureka ningamba eki ndikuteekateeka nk'omwesigwa ahabw'embabazi za Mukama. 26Kwonka ninteekateeka nti, ahabw'eby'oburemeezi ebibaho, haakiri omuntu kuguma nk'oku ari. 27Okomirwe aha mukazi? Reka nu kwenda kutaana nawe. Tokomirwe ha mukazi? Reka nu kwenda kushwera. 28Ku orikushwera, nooba otakozire kibi; n'omwishiki ku arikushwerwa, naaba atakozire kibi. Kwonka abarikushwerana baryagira omunyangararo omu nsi, kandi nkaayenzire kugubakiza. 29Banyaruganda, eki ndikugamba nikyo eki: Obunaku bwagyenda nibufunda; mbwenu okwiha hati abaine abakazi babe nk'abataine, 30n'abarikucura babe nk'abatarikucura, n'abarikushemererwa babe nk'abatarikushemererwa; abarikugura babe nk'abataine by'okugura, 31n'abarikukoresa eby'ensi babe nk'abatarikubikoresa; ahabw'okuba omuhango gw'ensi egi guhwaho. 32Niinyenda ngu murekye kwemereza omutima. Manya otaine mukazi ata omutima aha bya Mukama, oku araamugwise gye. 33Kwonka oine omukazi ayemerereza eby'ensi omutima, oku araagwise gye omukazi we; 34atyo aba kaakuri na kaakunu. Kandi omukazi otashweirwe, nari omwishiki otakashweirwe, ata omutima aha bya Mukama, oku araabe oyeeziibwe omu mubiri n'omu mutima. Kwonka omukazi oshweirwe ayemerereza eby'ensi omutima, oku araagwise gye iba. 35Ekyo naakibagambira ahabw'okubagasira. Ntarikwenda kubakoma, kureka okubooreka ebihikire, ngu mubone kwehayo mukaheereza Mukama n'omutima gumwe. 36Omushaija ku araabe naateekateeka ngu tarikutwaza gye mwishiki ou arikugamba obugyenyi, kandi atari- kubaasa kwezibira, haza kiri eky'okuba kityo, akore eki arikusiima; bashwerane-- ti kibi. 37Kwonka ohamiire kimwe omu mutima, ataine kirikumugyema kushwera, kandi orikubaasa kutegyeka omubiri gwe, yaamariirira kimwe omu mutima kureka ou arikugamba obugyenyi kuguma ari omwishiki, naaba akozire gye. 38N'ahabw'ekyo orikushwera ou arikugamba obugyenyi naakora gye, kwonka orikureka kumushwera naaba akozire gye okukiraho. 39Omukazi akomwa ahari iba obunaku bwona obu iba aba akiriho; kwonka iba ku afa, ogwo mukazi aine obusingye kushwerwa ou arikwenda, kwonka kibe omuri Mukama. 40Mbwenu nk'oku ndikureeba, ku yaakuguma nk'oku ari, akaaba gye okukiraho. Kandi ninteekateeka ngu naanye nyine Mutima wa Ruhanga.

will be added

X\