1 Corinthians 6

1Mbwenu omuriimwe ku haakubaho oine eki arikufa na mugyenzi we, akaayetuuma amutabaariza omu maisho g'abatahikiriire, omu mwanya gw'okumutabaariza omu maisho g'abarikwera? 2Timurikumanya ku abarikwera nibo baricwera ensi orubanja? Ensi ku muraabe niimwe murigicwera orubanja, nimuremwa kucwa emanja nkye nk'ezo? 3Timurikumanya ku turicwera baamaraika emanja? Reero kaashwa ebikwatiraine n'amagara aga! 4Mbwenu shi ku muraabe mwine emanja nk'ezo, ahabw'enki nimuzitwarira abatarikusiimwa kigombe ky'abaikiriza? 5Ekyo naakigamba kubaitsa enshoni. Nikibaasika okutabaho omunyabwengye omuriimwe kushoboorora abanyaruganda, 6kureka omunyaruganda kutabaariza omunyaruganda mugyenzi we omu maisho g'abataikiriza? 7Okutabaarizana mwenka na mwenka nikyoreka ku muremirwe. Ahabw'enki mutarikufa kushaagizibwa? Ahabw'enki mutarikufa kuryangatanisibwa? 8Kwonka niimwe murikushaagiza abandi, mukaryangatanisa nangwa n'abanyaruganda beene waanyu! 9Timurikumanya ku abatahikiriire bataritaaha mu bukama bwa Ruhanga? Murekye kwebeiha, abakora ebikwatiraine n'obushambani; abarikuramya emandwa, abashambani n'ebitingwa, 10abashuma n'abanyamururu, abasinzi n'abajumi, nobu baakuba abanyagi, tibaritaaha mu bukama bwa Ruhanga. 11Kandi bamwe omuriimwe nikwo mwabaire muri, kwonka mukoogibwa, mwayezibwa, mwaheebwa okuhikiirira omu iziina rya Mukama Yesu Kristo n'omuri Mutima wa Ruhanga waitu. 12Byona nimbiikirizibwa, kwonka ebiine omugasho ti byona. Byona nimbiikirizibwa, kwonka tinditegyekwa kintu na kimwe. 13Ebyokurya bibaho ahabw'enda, n'enda ebaho ahabw'ebyokurya, kwonka Ruhanga aryabihwerekyereza byombi, kinu na kiri. Omubiri tiguriho habwa ebikwatiraine n'obushambani, kureka ahabwa Mukama, na Mukama niwe mukama waagwo. 14Reero Ruhanga owaazoire Mukama waitu omu bafiire, naitwe aryatuzoora n'amaani ge. 15Timurikumanya ku emibiri yaanyu eri engingo za Kristo? Mbwenu shi ntware engingo za Kristo, nzihindure engingo za maraaya? Rubuuza! 16Nari shi, timurikumanya ngu oteerana na maraaya, bombi baba omubiri gumwe? Manya kikahandiikwa kiti: Ababiri baryaba omubiri gumwe. 17Kandi oteerana na Mukama aba omutima gumwe nawe. 18Mugume mwetantare ebikwatiraine n'obushambani. Ekibi ekindi kyona eki omuntu akora kiba kitaine kakwate na mubiri, kwonka oshambana akora ekibi ekishiisha omubiri gwe. 19Timurikumanya ku omubiri gwanyu guri Nyaruju ya Mutima Orikwera ori omuriimwe, ou mwahairwe Ruhanga? Manya timuriho habwanyu; 20mukagurwa n'obuguzi bwingi. N'ahabw'ekyo muhaise Ruhanga ekitiinwa omu mibiri yaanyu.

will be added

X\