1 Corinthians 5

1Nikigambwa hoona, ku omuriimwe harimu omucwe gw'obushambani, kandi obw'omuringo ogutashangwa nangwa n'omu bakaafiiri; omushaija okushwera muka ishe. 2Haza mwehimbisa! Timushemereire kushaasha? Omuntu okozire ekyo kintu n'ow'okucuubwa. 3Nyowe nobu ndaabe ntari hamwe naimwe omu mubiri, ndi hamwe naimwe omu mutima. Kandi nk'ori naimwe, 4omu iziina rya Mukama Yesu, ogwo muntu okozire ekyo kihagaro mperize kumucwera orubanja. Ku muraateerane, naanye nimba ndi hamwe naimwe omu mutima hamwe n'amaani ga Mukama waitu Yesu, 5ogwo muntu mumurekurire Sitaane, omubiri gwe guhwerekyerere, amagara ge g'omutima gabone kujunwa aha Kiro kya Mukama Yesu. 6Okwehimbisa kwanyu tikuhikire. Timurikumanya ku akatumbisa kakye katumbisa eisyanga ryona? 7Mweihemu ekitumbisa ekya ira, mubone kuba eisyanga risya; manya timurimu kitumbisa. Ahabw'okuba, Kristo Omwana gw'Entaama gw'Okuhingurwaho kwaitu akatambwa. 8N'ahabw'ekyo ka tugume tugire omugyenzo gw'obugyenyi obwo, tutaine kitumbisa ekya ira, ekitumbisa eky'eitima n'obubi; kureka emigaati etatumbisiibwe, etarimu buryarya kandi ey'amazima. 9Nkabahandiikira omu baruha yangye ku mutashemereire kukwatanisa n'abakora eby'obushambani; 10ntarikugira ngu abashambani b'ensi egi, nari abanyamururu n'abanyagi, nainga abaramya ebitari Ruhanga, ahabw'okuba ku kyakuba kityo mukaaba ab'okuruga omu nsi. 11Kwonka eki naabahandiikiire n'okutakwatanisa na weena oyetwa omunyaruganda, ku araabe ari omushambani, omunyamururu, orikuramya emandwa, omujumi, omusinzi nari omunyagi nobu kwakuba okurya n'omuntu nk'ogwo. 12- 13Mbwenu shi n'ekyangye kucwera ab'aheeru orubanja? Ruhanga niwe arirubacwera. Kwonka shi imwe timushemereire kucwera ab'omu kigombe kyanyu orubanja? Mwihe omuriimwe ogwo muntu mubi.

will be added

X\