1 Corinthians 3

1Mbwenu beene Taata, nyowe tindabaasize kubagambira nk'abantu abarikutegyekwa Mutima, kureka nk'abarikutegyekwa omubiri, kandi nk'abeereere abaikiriize Kristo juba. 2Nkabagaburira amate, bitari byokurya bigumire, ahabw'okuba mukaba mutakabibaasize; nangwa na hati timukabibaasize, 3ahabw'okuba mukiri ab'omubiri. Mbwenu shi omuriimwe, ku haraabe hakirimu eihari n'empaka, biri timuri ab'omubiri, abarikutwaza nk'abantu nyabuntu? 4Hari omwe ku arikugira ati: Ndi owa Paulo; ondiijo ati: Ndi owa Apolo; biri obwo timuri abantu nyabuntu? 5Mbwenu Apolo ni ki? Na Paulo ni ki? Ka n'abaheereza abaabareeteire kwikiriza, nka buri omwe oku Mukama yaamuteekateekyeire. 6Manya nyowe nkabyara, Apolo yaitirira, kwonka Ruhanga niwe yaabikurize. 7N'ahabw'ekyo obyara nari oitirira ti kintu, kureka Ruhanga obikuza. 8Obyara n'oitirira nibaingana, kandi buri omwe aryaheebwa ebihembo nk'oku yaakozire. 9Manya itwe turi abakwataniise nitukorera Ruhanga. Imwe muri omusiri gwa Ruhanga, muri ekyombeko kye. 10Nk'omurimo ogu Ruhanga yantumire kukora oku guri, nk'omwombeki omunyabwengye nkataho omusingi, ondiijo yaagwombekyeraho. Buri omwe ayerinde oku araagwombekyereho. 11Manya tihariho n'omwe obaasa kutaho ogundi musingi, kureka ogwo ogwatairweho, niwe Yesu Kristo. 12Mbwenu ahari ogwo musingi, omuntu ayombekyesaho ezaabu, efeeza, amabaare g'obuguzi bwingi, ebiti, obunyaatsi, nari embuba. 13Kwonka omurimo gwa buri muntu guryareebeka aha kiro ki Mukama arigworekyeraho. Manya omuriro gw'ahari ekyo Kiro guryayerura omurimo gwa buri muntu, gugugyeze kandi gworekye nk'oku guri. 14Ou ekyombeko kye kyayombekirwe ahari ogwo musingi ogurigumaho, aryaheebwa ebihembo. 15Ou ekyombeko kye kirisya, kikayonga, aryafeerwa; nobu we arijunwa, kwonka kuri nk'okuraba omu muriro. 16Timurikumanya ku muri Nyaruju ya Ruhanga, kandi Mutima wa Ruhanga ku atuura omuriimwe? 17Weena oricwekyereza Nyaruju ya Ruhanga, Ruhanga aryamucwekyereza. Ahabw'okuba Nyaruju ya Ruhanga neeyera, kandi Nyaruju egyo niimwe. 18Hatagira owaayebeiha: omuriimwe ku haraabe harimu orikweteekateekaho kuba omunyabwengye omu muringo gw'ensi egi, ayegire omushema, abone kuba ow'obwengye. 19Manya obwengye bw'omu nsi egi, ahari Ruhanga buba obushema. Ahabw'okuba kikahandiikwa kiti: Ruhanga akwatira abanyabwengye omu mengye gaabo; 20kandi kiti: Mukama amanya ku ebiteekateeko by'abanyabwengye bitagira muhoho. 21N'ahabw'ekyo hatarigira owaayehimbisa ahabw'abantu. Manya ebintu byona n'ebyanyu: 22yaaba Paulo, yaaba Apolo nari Keefa, yaaba nsi, yaaba magara nari rufu; yaaba biriho nari ebiribaho, byona n'ebyanyu; 23naimwe muri aba Kristo, na Kristo n'owa Ruhanga.

will be added

X\