1 Corinthians 2

1Beene Taata, obu naija owaanyu, tindaizire nindangirira eby'enaama ya Ruhanga nk'omugambi murungi kandi ow'obwengye. 2Ahabw'okuba nkamaramaza kutamanya kindi omuriimwe, kureka Yesu Kristo, ogwo owaabambirwe aha musharaba. 3Nkaba ntuura naimwe ntaine maani, kandi nyine obwoba bwingi nintetema. 4Emigambire yangye n'okurangirira kwangye bikaba bitari bigambo by'obwengye ebirikwikirizisa abantu, kureka ebirikworekyerwamu amaani ga Mutima, 5ngu okwikiriza kwanyu kuteegamira obwengye bw'abantu, kureka amaani ga Ruhanga. 6Kwonka eby'obwengye byo tubigambira abahamire omu by'omutima, obwo bwengye nobu buraabe butari bw'ab'ensi egi, nari obw'abategyeki b'ensi egi ab'okuhwaho. 7Kureka twata enaama ya Ruhanga, kandi tumanyisa obwengye bwe obusherekirwe, obu yaataireho ebintu byona bitakabaireho ahabw'okutuhaisa ekitiinwa. 8Omu bategyeki b'egi nsi, tihariho n'omwe owaabumanyire; ahabw'okuba kuri baabumanyire, tibaakubambire Mukama w'ekitiinwa aha musharaba. 9Kwonka buri nk'oku kyahandiikirwe ngu: Ebi eriisho ritakareebaga, ebi okutu kutakahuriraga, ebitakataahaga mu mutima gw'omuntu, nibyo Ruhanga yaacumiire abamukunda. 10Kandi ebyo, itwe Ruhanga akabitushuuruurira omuri Mutima. Ahabw'okuba Mutima acondooza byona, nangwa n'ebya Ruhanga ebitacodoozibwa. 11Ni muntu ki omanya ebi ondiijo arikuteekateeka, kureka omutima gwa kibiteekateeka. Na mbwenu tihariho omanya ebiteekateeko bya Ruhanga, kureka Mutima wa Ruhanga. 12Kandi itwe omutima ogu twahairwe ti gw'ensi egi, kureka tukaheebwa Mutima owaarugire ahari Ruhanga, ngu tubone kumanya ebiconco bi Ruhanga atugabira. 13Nibyo tugamba tutabyegyesiibwe bwengye bw'abantu, kureka tubyegyesiibwe Mutima, nitushoboororera abaine Mutima ogwo eby'amazima ebikwatiraine nawe. 14Omuntu nyabuntu taikiriza bya Mutima wa Ruhanga; ahabw'okuba bimubeera eby'obushema, kandi tabaasa kubyetegyereza, ahabw'okuba bishoboororwa omu buryo bwa Mutima. 15Oine Mutima ashoboorora byona, kwonka we tashoboororerwa muntu weena. 16Nk'oku kyahandiikirwe kiti: Mbwenu n'oha oramanyire ebi Mukama arikuteekateeka, haza abone kumuhabura? Kwonka itwe twine ebiteekateeko bya Kristo.

will be added

X\