1 Corinthians 16

1Mbwenu aha bikwatiraine n'okurundaanira abarikwera eby'okubakwatsa, mutwaze nk'oku naaragiire ebigombe by'abaikiriza eby'omuri Galatiya. 2Buri kiro ky'okubanza omu wiiki, ibara muntu omuriimwe agire eki yaiha aha bi atungire, akibiikye nk'oku kiraamubaasikire, haza eby'okurundaana birekye kukorwa obu nyizire. 3Reero ku ndiija, ndyayohereza abu muriba musiimire omu baruha kutwara ekiconco kyanyu Yerusalemu. 4Ku kirireebeka ngu kishemereire naanye kuzayo, ndyagyenda nabo. 5Ndyabazindukira naaheza kuraba Makedoniya, ahabw'okuba niinyenda kurabayo. 6Kandi shana nkaaguma naimwe, nangwa mmarirayo ebiro by'embeho, haza munkwatsa kugumizamu orugyendo rwangye ei ndaaze yoona. 7Manya hati tindikwenda kubareeba nk'orikubarabaho kusha, kureka nyine amatsiko g'okumara naimwe ebiro, Mukama akunzire. 8Kwonka ndyaguma Efeso okuhitsya ahari Pentekooti, 9ahabw'okuba ntungire omugisha muhango kukorayo omurimo gw'omugasho, nobu haraabe hariyo baingi abatarikuunyendeza. 10Timoteeho ku ariija okwo, mumwehitsye, abone kuguma naimwe atetuurukire, ahabw'okuba naakora omurimo gwa Mukama nkaanye. 11N'ahabw'ekyo hatagira owaamugaya. Mumukwatse, agumizemu orugyendo rwe n'obusingye, abone kugaruka ahi ndi; ahabw'okuba mmutegyereize hamwe n'abanyaruganda. 12Aha bya mwene Taata Apolo, nkamwehanangiriza munonga kubataayaayira hamwe n'abanyaruganda abandi; kwonka buzimazima tarasiimire kwija okwo obwa hati, kureka aryaija yaatunga omwanya. 13Mugume nimureeba, muhamire omu kwikiriza, mube emanzi, mube ab'amaani. 14Byona ebi muraakore, mubikorese rukundo. 15Mbwenu beene Taata, nimumanya ku ab'eka ya Sitefana nibo baabandize kuhinduka omuri Akaiya, kandi bakeehayo kuheereza abarikwera. 16Nimbeehanangiriza munonga ku mworobera abantu nk'abo na buri weena orikwehenenga naakora nabo. 17Nkashemererwa obu Sitefana na Forutunaato na Akaiko baija, ahabw'okuba bakakora eki mwakukozire muriho; 18banduhuura omutima, naimwe baagubaruhuura. Abantu nk'abo mubahe ekitiinwa. 19Ebigombe by'abaikiriza b'omuri Asiya nibibaramutsya. Akwila na Purisika hamwe n'ekigombe ky'abaikiriza eky'omu nju yaabo nibabaramutsya munonga omuri Mukama. 20Abanyaruganda boona nibabaramutsya. Muramukanisane okunywegyerana okurikwera. 21Endamutsyo egi, nyowe Paulo, naagyehandiikira n'omukono gwangye. 22Ku haraabe hariho otarikukunda Mukama akyeenwe. Ai Mukama waitu ija! 23Embabazi za Mukama Yesu zigume naimwe! 24Mwena nimbakunda omuri Kristo Yesu! Amiina.

will be added

X\