1 Corinthians 15

1Beene Taata, ka mbaijutsye Amakuru Marungi agu naabarangiriire mukagaikiriza, kandi agu muhamiiremu, 2haza agabajuna mwaba mugagumize nk'oku naagabarangiriire kitari ekyo, biri mukaikiririza busha. 3Manya nkabahitsyaho ekintu kikuru naanye eki naahairwe, ekirikugira ngu Kristo akafa ahabw'ebibi byaitu nk'Ebyahandiikirwe oku birikugira, 4akaziikwa kandi akazooka omu bafiire aha kiro kya kashatu, nk'Ebyahandiikirwe oku birikugira, 5reero ngu akabonekyera Keefa, bwanyima eikumi na babiri. 6Yaagaruka yaabonekyera abanyaruganda abarikweshumba ahari magana ataano omu bunaku bumwe; baingi aharibo bakiriho, nobu abandi baraabe bafiire. 7Reero yaabonekyera Yakobo, na bwanyima entumwa zoona. 8Kandi aha muheru gwa boona, yaabonekyera naanye akatoroogo. 9Ahabw'okuba niinye rwabutontori rw'entumwa, otashemereire kwetwa ntumwa, ahabw'okuba nkahiiganisa ekigombe ky'abaikiriza Ruhanga. 10Kwonka ahabw'embabazi za Ruhanga, oku ndi nikwo ndi, kandi embabazi zi yangiriire tizirabaire za busha. Nangwa nkakora munonga okukira ezo ntumwa zoona; kwonka tiinye, kureka embabazi za Ruhanga eziinyemamu. 11Yaaba nyowe, yaaba ezo ntumwa, nikwo turangirira, kandi naimwe mukaikiriza. 12Mbwenu Kristo ku araabe naarangirirwa ngu akazooka omu bafiire, bamwe omuriimwe nibabaasa bata kugira ngu tihariho kuzooka kw'abafiire? 13Ku haraabe hatariho kuzooka kw'abafiire, biri Kristo tarazoirwe mu bafiire; 14na Kristo ku araabe atarazoirwe mu bafiire, biri okurangirira kwaitu n'okwa busha, n'okwikiriza kwanyu n'okwa busha. 15Nangwa naitwe nituba turi baakareeba ba Ruhanga ab'ebishuba, ahabw'okuba tukahamya ku Ruhanga yaazoire Kristo omu bafiire ou atarazoire, ku kiraabe kiri eky'amazima ngu abafa tibazooka. 16Abafa ku baraabe batazooka, biri Kristo tarazoirwe mu bafiire. 17Na Kristo ku araabe atarazoirwe mu bafiire, biri okwikiriza kwanyu n'okwa busha kandi mukiri omu bibi byanyu. 18Reero nu n'abaagwejegyereire omuri Kristo bakahwerekyerera. 19Kuri Kristo tumwinemu amatsiko g'okutugasira omu magara aga gonka, tukaabaire ab'okugirirwa esaasi okukira abandi boona. 20Kwonka omu mazima Kristo akaba omuganuro gw'okuzoorwa omu bafiire, kuhamiza abaagwejegyeire nabo ku barizoorwa omu bafiire. 21Manya nk'oku okufa kwareetsirwe omuntu omwe, n'okuzooka kw'abafiire nikwo kwareetsirwe omuntu omwe. 22Kandi nk'oku boona abaine akarande na Adamu bafa, nikwo boona abaine akarande na Kristo bariba abahuriire. 23Kwonka buri omwe omu rubu rwe; Kristo niwe muganuro; bwanyima ku ariija, abe bakurateho. 24Reero emperu eryarugaho ehikye, akwatse Ruhanga Ishe obukama, yaaheza kumaraho obutegyeki bwona n'obushoboorozi bwona n'amaani goona. 25Ahabw'okuba Kristo n'ow'okutegyeka, okuhitsya obu ariribatiirira abazigu be boona. 26Haza omuzigu orihereeruka kucwekyerezibwa ni rufu. 27Manya Ruhanga akamuha kutegyekyera byona ahansi y'ebigyere bye. Kwonka nobu kirikugirwa kiti: Ebintu byona bikamuheebwa kubitegyeka, nikimanywa ku ogwo owaabimuhaire kubitegyeka byona atarikubarirwamu. 28Ebintu byona ku biriheza kuteebwa omu butegyeki bwe, na Mwana ekiti aryategyekwa owaabimutegyekyeise; haza Ruhanga abone kuba byona omuri boona. 29Ku kiraabe kitari kityo, abantu bagasirwa ki, ku babatizibwa ahabw'abafiire? Abafiire ku baraabe batazooka n'akakye, ahabw'enki abantu babatizibwa ahabw'abo abafiire? 30Kandi naitwe ahabw'enki twenaga omu kabi buri kaanya? 31Beene Taata, ahabw'okwesingiza oku mbainemu omuri Kristo, nindahira Kristo Yesu Mukama waitu, nyowe ku nfa buri izooba! 32Nyowe nk'omuntu nyabuntu, ku ndaabe naarwaine n'enyamaishwa omuri Efeso, nikingasira ki? Abafa ku baraabe batazooka, reero nu ka turye, ka tunywe, ahabw'okuba nyencakare turi ab'okufa. 33Murekye kubeihwabeihwa; manya ekigombe kiriisa etaabe. 34Nimuhuguukye, murekyere aho kukora ebibi. Ka mbagambire eki kubaitsa enshoni; bamwe omuriimwe tibarikumanya Ruhanga. 35Ebyo, omuntu akaabuuza ati: Abafa bazooka bata? Baryaija na mubiri nyabaki? 36Iwe mushema 'we! Manya ei obiba temera yaaba etafiire. 37Kandi ei obiba ti mubiri ogu erigira, kureka enjuma kusha, gira nk'ey'engano nari ey'ezindi njuma. 38Kwonka Ruhanga agiha omubiri nk'oku arikwenda, kandi buri muringo gw'embibo aguha omubiri ogwayo ahabwagwo. 39Manya emibiri yoona teshushana; hariho ogw'abantu, hariho ogw'enyamaishwa, hariho ogw'enyonyi, n'ogundi ogw'ebyenyanja. 40Hariho emibiri ey'omu iguru, kandi hariho n'ey'omu nsi, haza ekitiinwa eky'ey'omu nsi; haza ekitiinwa eky'ey'omu iguru kiri okwakyo, n'eky'ey'omu nsi kiri okwakyo. 41Hariho okwaka kw'eizooba n'okundi okw'okwezi kandi n'okundi okw'enyonyoozi, nangwa enyonyoozi teshushana na ngyenzi yaayo omu kwaka. 42Nikwo kiri n'aha kuzooka kw'abafiire. Omubiri guziikwa guri ogw'okujunda, guzoorwa guri ogw'okutajunda. 43Guziikwa nigunugwa, guzoorwa n'ekitiinwa. Guziikwa guhwairwemu amaani, guzoorwa gugaine. 44Guziikwa guri omubiri gw'obuntu, guzoorwa guri omubiri gw'omutima. Ku haraabe hariho omubiri gw'obuntu, biri hariho n'omubiri gw'omutima. 45Nk'oku kyahandiikirwe kiti: Adamu, omuntu w'okubanza, akahinduka omuntu oine amagara. Adamu owa bwanyima yaahinduka Mutima Rugabamagara. 46Kwonka eky'omutima tikyo kibanza, kureka habanza eky'omubiri, reero hakurataho eky'omutima. 47Omuntu w'okubanza akaruga omu itaka ry'ensi, ari omuntu w'omucuucu; omuntu owa kabiri we akaruga omu iguru. 48Owaarugire omu mucuucu nk'oku yaabaire ari, n'ab'ensi nikwo bari; kandi ow'omu iguru nk'oku ari, n'ab'eiguru nikwo bari. 49Nk'oku twine ekyeshusha ky'owaarugire omu mucuucu, nikwo turigira ekyeshusha ky'owaarugire omu iguru. 50Banyaruganda, ka mbagambire eki: abakiine omubiri n'eshagama tibabaasa kutaaha mu bukama bwa Ruhanga, nobu gwakuba omubiri ogujunda kuhika ei okutajunda kutuura. 51Mbwenu ka mbaatire eibanga. Twena titurifa, kureka twena turyahindurwa, 52omu kaanya kakye nk'ak'okuhumbya eriisho, aha nzamba y'aha muheru. Obwo enzamba eryagamba, abafiire bazoorwe batakijunda, naitwe tuhindurwe. 53Manya omubiri ogu ogujunda n'ogw'okuhinduka ogutajunda, kandi omubiri ogufa n'ogw'okuhinduka ogutafa. 54Obwo ogujunda ku gurihinduka ogutajunda, n'ogufa gwahinduka ogutafa, nibwo ekyahandiikirwe kirihikiiririra kimwe ekirikugira kiti: Rufu ekasingurwa, yaamirwa. 55Iwe Rufu, obusinguzi bwawe burahi? Iwe Rufu, oruvuri rwawe rurahi? 56Manya oruburi rwa rufu n'ekibi, kandi amaani g'ekibi n'eiteeka. 57Kwonka Ruhanga naakasingye otusinguriza omuri Mukama waitu Yesu Kristo. 58N'ahabw'ekyo, beene Taata abakundwa, muhame mutarikunyiganyiga; mugumizemu obutoosha kukora omurimo gwa Mukama, nimumanya ngu omuri Mukama okwehenenga kwanyu ti kwa busha.

will be added

X\