1 Corinthians 14

1Mwitanire rukundo, mwetengye munonga ebiconco bya Mutima, munomuno eky'okuranga. 2Ahabw'okuba ogambira omu rurimi, tagambira bantu, kureka agambira Ruhanga. Tihariho omwetegyereza; eby'amabanga ebi agamba abigambisibwa Mutima. 3Kwonka ogwo oranga, agambira abantu eby'okubombeka n'okubateera omuhimbo n'okubahuumuriza. 4Ogambira omu rurimi eyehamya wenka; kwonka oranga ahangaana ekigombe ky'abaikiriza. 5Mwena nkaayenzire ku mugambira omu ndimi, kwonka okukiraho nkaayenzire ku muranga. Ahabw'okuba omurangi akira ogambira omu ndimi, kureka haagira owaazishoboorora, ngu ekigombe ky'abaikiriza kibone kwombekwa. 6Mbwenu, banyaruganda, ku naakwija owaanyu ningambira omu ndimi nkaabagasira ki naaba ntabagambiire ebi nshuuruuriirwe, nari ebi ndikumanya, nari ebi ndikuranga, nainga ebi ndikwegyesa? 7Nangwa n'ebitaine magara ebiteerwa bikagamba, nk'esheegu nari ekidongo, ku biba bitataaniise maraka gaabyo, omuntu amanya ata ekyateerwa? 8N'enzamba ku yaakugamba eiraka ritarikwetegyerezibwa, n'oha owaakweteekateeka kuza aha rugamba? 9Naimwe nikwo kiri. Ku murikugambira omu rurimi orutarikwetegyerezibwa, omuntu naabaasa ata kumanya ekyagambwa? Manya nimuba nimushusha nk'abarikugambira omuyaga. 10N'ekya buzima hariho endimi nyingi omu nsi, kandi tihariho na rumwe orutagira ki rurikumanyisa. 11Kwonka ku nkuba ntarikumanya eki orwo rurimi rurikumanyisa, biri ndi omunyamahanga ahari ogwo orikugamba, kandi nawe n'omunyamahanga ahariinye. 12Naimwe nu nk'oku murikwitanira kutunga ebiconco bya Mutima, mwezirikire kutunga ebiconco ebirikweshumbyaho kwombeka ekigombe ky'abaikiriza. 13N'ahabw'ekyo orikugambira omu rurimi ashemereire kushaba Ruhanga, abone kubaasa kurushoboorora. 14Manya ku nshabira omu rurimi, omutima gwangye gushaba, kwonka obwengye bwangye bugumira aho butyo. 15Mbwenu shi ngire nta? Niinyija kushabisa omutima, kandi nshabise n'obwengye. Niinyija kweshongoza omutima, kandi nyeshongoze n'obwengye. 16Kyaba kitari ekyo, ku orikusiima noogambisibwa Mutima, omuntu otarikushoboorokyerwa eki orikugamba, naabaasa ata kugira ati: Amiina, aha ki waasiimira? 17N'ekya buzima nooba osiimire gye Ruhanga, kwonka ondiijo tarikugasirwa. 18Ninsiima Ruhanga ahabw'okuba mwena nimbakiza kugambira omu ndimi. 19Kwonka omu ruteerane nkaayenzire kugambisa obwengye bwangye ebigambo bitaano, mbone kugasira abandi, okukira okugambira omu rurimi ebigambo kakumi. 20Beene Taata, mutaba abaana omu bwengye, kureka mube abeereere omu bibi; kwonka omu bwengye mube bakuru. 21Omu iteeka kikahandiikwa kiti: Ndyagambira eri ihanga, ningambisa abantu b'endimi zitari zaaryo n'eminwa y'Abanyamahanga, nangwa nabwo obwo tibarimpurikiza nikwo Mukama arikugira. 22N'ahabw'ekyo endimi ziba akamanyiso ti habw'abaikiriza, kureka ahabw'abatari baikiriza. Haza oburangi bwo tibuba habw'abatari baikiriza, kureka ahabw'abaikiriza. 23Mbwenu nu, ekigombe ky'abaikiriza ku kyakuteerana, boona baagambira omu ndimi, haza abatari b'abaabo nari abatari baikiriza baataahamu, tibakaagira bati: Beitu shi mugwire eiraro? 24Kwonka boona ku baakuba nibaranga, haza otari mwikiriza nari otari munyakigombe yaataahamu, boona baamwemeza kandi boona baamucwera orubanja, 25enaama ze z'omu mutima zikaashuuruuka. Haza obwo ajuumara ahansi, aramya Ruhanga kandi agamba butunu ati: Buzimazima Ruhanga ari omuriimwe. 26Beene taata, mbwenu bibe bita? Ku muteerana, omwe aba aine ekyeshongoro, ondi eky'okwegyesa, ondi eki ashuuruuriirwe, ondiijo okugambira omu rurimi, nari ondiijo eby'okurushoboorora. Haza ebyo byona bigume bikorwe ahabw'okwombeka ekigombe ky'abaikiriza. 27Ku haraabeho orikugambira omu rurimi, ka babe babiri bonka, nari barekye kurenga ahari bashatu, kandi nibaihaihana; haza hagire owaabishoboorora. 28Kwonka ku haraabe hatariho w'okushoboorora, ka buri omwe acecekye omuri orwo ruteerane, ayegambire kandi agambire Ruhanga. 29K'abarangi bagambe babiri nari bashatu, reero abandi bagyeragyeranise ebyagambwa. 30Omwe omu bari aho ku yaakushuuruurirwa, owaaba naagamba ahuname. 31Manya mwena nimubaasa kuranga nimwihaihana, boona babone kwega n'okuteerwa omuhimbo. 32Kandi emitima y'abarangi etegyekwa abarangi. 33Ahabw'okuba Ruhanga taba Ruhanga w'omujuyango, kureka ow'obusingye. Nk'oku kiri omu bigombe byona eby'abarikwera, 34abakazi omu nteerane bagume bahuname. Ahabw'okuba tibarikwikirizibwa kugamba, kureka okuguma beeceererekire nk'oku eiteeka ririkuragiira. 35Ku baraabe baine eki barikwenda kumanya, bakibuurize baibabo omuka. Ahabw'okuba n'eky'enshoni omukazi kugambira omu ruteerane. 36Mbwenu shi ekigambo kya Ruhanga niimwe kyakomookireho, nari niimwe kyahikireho mwenka? 37Ku haraabe hariho omuntu weena orikweteekateekaho ngu n'omurangi ogambisibwa Mutima, amanye ku ebi naabahandiikira biri ekiragiro kya Mukama. 38Omuntu weena eki ku araabe atarikukiikiriza, nawe tarikwikirizibwa. 39N'ahabw'ekyo banyaruganda, mwetengye munonga ekiconco ky'okuranga, kandi mutazibira okugambira omu ndimi; 40kwonka byona bigume bikorwe gye omu buteeka.

will be added

X\