1 Nobu naakugamba endimi z'abantu nangwa n'eza baamaraika, kwonka ntaine rukundo, nkaaba ndi nk'ekyoma ky'omuringa ekirikurangira, nari nk'enshandaazo erikushandaaza kubi eiraka. 2 Nobu naakuba nyine ekiconco ky'oburangi, nkamanya amabanga goona, nkagira okwetegyereza kwona, kandi nobu naakuba nyine okwikiriza kwona okwakumbaasisa kuhigura enshozi, kwonka ntaine rukundo, nkaaba ntari kantu. 3 Nobu naakugabira abooro ebi nyine byona kubariisa, kandi nobu naakuhayo omubiri gwangye kwokibwa, kwonka ntaine rukundo, tikiine ki kyakungasira. 4 Rukundo egumisiriza kandi egira embabazi. Rukundo tegira ihari nari emyehimbiso; 5 teyetuguura nari okugira ekikabuko. Rukondo teyeyendeza, tegwisibwa kubi busha, tegira nziika; 6 teshemerererwa kutahikiirira, kureka eshemerererwa amazima. 7 Rukundo eyemera byona, eikiriza byona, egira amatsiko ahari byona, egumisiririza byona. 8 Rukundo tehwaho, kwonka oburangi bwo buryahwaho, endimi zirugyeho n'okumanya kuhweho. 9 Ahabw'okuba okumanya kwaitu n'okw'ekitega, n'oburangi bwaitu nabwo n'obw'ekitega; 10 kwonka okuhikiiririzibwa kimwe ku kuriija, eby'ekitega biryahwaho. 11 Obu naabaire ndi omwana, nkaba ngamba nk'omwana, nyetegyereza nk'omwana, nteekateeka nk'omwana; kwonka ku naakuzire naareka eby'obwana. 12 Manya obwa hati nitureebera omu ndeeberwamu, tutarikuhweza gye; kwonka obwo turyareebana butunu. Mbwenu nimmanyaho ekicweka, kwonka obwo ndyamanyira kimwe nk'oku Ruhanga ammanyira kimwe. 13 Mbwenu ebigumaho n'ebi byonshatu: okwikiriza n'amatsiko na rukundo; kwonka ekirikubikira ni rukundo.
