1 Corinthians 12

1Beene Taata, ebikwatiraine n'ebiconco bya Mutima, tindikwenda ngu mutabimanya. 2Nimumanya ngu obu mwabaire mukiri abakaafiiri, mukaba muhabisibwa, mutwarwa omu bishushani ebitarikubaasa kugamba. 3N'ahabw'ekyo niinyenda ku mumanya ngu tihariho ogambisibwa Mutima wa Ruhanga owaakugira ati: Yesu naakakyeenwe! Kandi tihariho n'omwe ogira ati: Yesu ni Mukama, atakigambisiibwe Mutima Orikwera. 4Mbwenu hariho ebiconco by'emiringo etari emwe, kwonka Mutima n'omwe. 5Kandi hariho obuheereza bw'emiringo etari emwe, kwonka Mukama n'omwe. 6Hariho n'okukora kw'emiringo etari emwe, kwonka Ruhanga n'omwe okoresa byona omuri boona. 7Buri omwe areebekyerwamu Mutima ahabw'okugasira boona. 8Omwe Mutima amugambisa eby'obwengye, ondiijo amugambisa eby'okumanya omu buryo bwa Mutima ogwo. 9Ondiijo, Mutima niwe omwe, amuha okwikiriza; ondiijo, Mutima omwe ogwo amuha ebiconco by'okukiza. 10Ondiijo Mutima amuha kukora eby'okutangaaza, ondi oburangi, ondiijo okubaasa kumanya omutaano gw'emitima. Ondiijo Mutima amuha okugambira omu miringo y'endimi, n'ondi kushoboorora amakuru g'ezo ndimi. 11Ebyo byona bikoresibwa Mutima ogwo omwe, ogabira buri muntu okwe nk'oku arikwenda. 12Mbwenu nk'oku omubiri guba gumwe gukagira engingo nyingi, haza ezo ngingo z'ogwo mubiri, nobu ziba nyingi, zikaba omubiri gumwe, na Kristo nikwo ari atyo. 13Ahabw'okuba tukabatizibwa omuri Mutima omwe, twaba omubiri gumwe yaaba Bayudaaya nari Abaguriiki; yaaba bahuuku nari ab'obusingye kandi twena twanywaisibwa ahari Mutima omwe. 14Manya omubiri tigugira rugingo rumwe kureka nyingi. 15Ekigyere ku kyakugira kiti: Ahabw'okutaba ngaro, tindi w'aha mubiri. Ekyo tikikaakihindura kutaba ky'aha mubiri. 16N'okutu ku kwakugira kuti: Ahabw'okutaba riisho, tindi w'aha mubiri. Ekyo tikikaakihindura kutaba ky'aha mubiri. 17Omubiri gwona ku gwakuba eriisho, okuhurira kukaaruga hi? Omubiri gwona ku gwakuba okutu, okukaga kukaaruga hi? 18Kwonka nk'oku kiri, Ruhanga akata engingo omu mubiri, buri rumwe omu mwanya gwarwo nk'oku yaayenzire. 19Zoona kuri zaabaire orugingo rumwe, omubiri gukaabaire hi? 20Kwonka nk'oku kiri, hariho engingo nyingi, haza kunu omubiri guri gumwe. 21Eriisho tirikaagira engaro riti: Tindikukwetenga! Nari omutwe kugira ebigyere guti: Tindikubeetenga! 22Nangwa n'engingo z'omubiri ezireebeka nk'ezitaine maani, nizo zikira kwetengwa. 23Engingo z'omubiri ezireebeka nk'ezitaine maani, nizo tukira kwetaho; n'engingo z'omubiri ezi tutataho mutima munonga, nizo tukira kuha ekitiinwa kingi. Reero engingo zaitu eziitsa enshoni, nizo tujwarira, 24eki engingo zaitu ezitaitsa enshoni ziteetenga. Nikwo Ruhanga yaatebeekaniise atyo omubiri, akaha ebicweka ebirikugaywa ekitiinwa ekirikukiraho, 25ngu omu mubiri harekye kubamu okutakwatanisa, kureka ngu ezo ngingo zigume zisaasibwane; 26orugingo rumwe rukishaasha, zoona zikasaasira hamwe; orugingo rumwe rukiheebwa ekitiinwa, zoona zikashemerererwa hamwe. 27Mbwenu naimwe muri omubiri gwa Kristo, na buri omwe n'orugingo rwagwo. 28Kandi hariho abu Ruhanga yaataire omu kigombe ky'abaikiriza: ab'okubanza n'entumwa, aba kabiri n'abarangi, aba kashatu n'abeegyesa, taho abakozi b'eby'okutangaaza, n'abaine obushoboorozi bw'okukiza, n'abahwezi n'abategyeki, n'abagambi b'endimi zitari zimwe. 29Mbwenu abo boona n'entumwa? Boona n'abarangi? Boona n'abeegyesa? Boona n'abakozi b'eby'okutangaza? 30Boona nikwo baine ebiconco by'okukiza? Boona bagambira omu ndimi? Boona bazishoboorora? 31N'ahabw'ekyo mwitanire ebiconco ebirikweshumbaho. Haza mbwenu ka mboorekye ekirikukira byona oburungi.

will be added

X\