1 Corinthians 11

1Muntooreze, nkaanye oku ntooreza Kristo. 2Nimbasiima ahabw'okuunyijuka omuri byona n'okugumizamu nimukuratira ebi naabeegyeise. 3Kwonka niinyenda mumanye ku Kristo aba omutwe gwa ibara mushaija, kandi ku omushaija aba omutwe gw'omukazi we, na Ruhanga ku aba omutwe gwa Kristo. 4Omushaija weena orikushaba Ruhanga, nari orikuranga ayetwekyereire, naaba ahemwire omutwe gwe. 5N'omukazi weena orikushaba Ruhanga, nari orikuranga ateetwekyereire, naaba ahemwire omutwe gwe; nikyo kimwe nk'oku omutwe gwe gwakuba gumweire. 6Omukazi ku araabe ateetwekyereire, haakiri ashare eishokye; kwonka omukazi ku kiraabe nikimuhemura okusharwa eishokye nari okutegwa, ayetwekyerere. 7Manya omushaija tashemereire kwetwekyerera, ahabw'okuba we n'ekyeshusha kya Ruhanga kandi ekitiinwa kye; kwonka omukazi we n'ekitiinwa ky'omushaija. 8Ahabw'okuba omushaija tarahangirwe naaruga omu mukazi, kureka omukazi niwe yaarugire omu mushaija. 9N'omushaija tarahangiirwe mukazi, kureka omukazi niwe yaahangiirwe omushaija. 10Omukazi nikyo ashemerereire kwetwekyerera ahabwa baamaraika. 11Nobu kiraabe kiri kityo, omuri Mukama omukazi tabaho ahatari mushaija, n'omushaija tabaho ahatari mukazi. 12Ahabw'okuba nk'oku omukazi yaahangirwe naaruga omu mushaija, n'omushaija nawe azaarwa omukazi; kandi byona biruga ahari Ruhanga. 13Naimwe mukyereebere; kihikire omukazi kushaba Ruhanga ateetwekyereire? 14Nangwa n'emicwe y'obuntu terikubeegyesa, ngu omushaija ku areka eishokye rye ryacucuza kimuhemura? 15Haza omukazi ku agira eishokye riraingwa, rimureetera okwesingiza? Ahabw'okuba eishokye rye akariheebwa kumushweka. 16Ku haraabe hariho orikwenda kukihakanisa, amanye ngu emitwarize nk'egyo titugiine, nangwa n'ebigombe by'abaikiriza Ruhanga tibigiine. 17Mbwenu ka mbahabure eki, ntarikubasiima, ahabw'okuba ku muteerana, ebirugamu ti biba birungi, kureka biba bibi. 18Eky'okubanza, ku muteerana muri ekigombe ky'abaikiriza, mpurira ngu mwebaganiisemu; haza naanye ekyo nkaakiikiriza. 19Manya okutaikirizana n'okw'okubaho, ab'amazima omuriimwe babone kumanywa. 20Ku muteerana hamwe, eki murya ti bugyenyi bwa Mukama. 21Ahabw'okuba ku muba nimurya, buri muntu arya ebyokurya bye atategyereize bandi; haza obwo omwe aine enjara n'ondi asinzire. 22Mbwenu shi, timugira maka g'okuriiramu n'okunyweramu? Nari nimugaya ekigombe ky'abaikiriza Ruhanga, mwitsa enshoni abaine ebi bakyenire? Mbagambire ki? Mbasiime? Ngaaha, omuri ekyo tindikubasiima. 23Manya eki naahairwe Mukama, naanye nikyo naabahaire ekirikugira ngu Mukama Yesu aha kiro eki yaareebeziibweho, akakwata omugaati; 24ku yaaherize kusiima yaagucwamu, yaagamba ati: Ogu n'omubiri gwangye oguraaheebweyo ahabwanyu. Mugume mukore mutyo kuunyijukiraho. 25N'ekikopo atyo, ku baaherize kurya, yaagamba ati: Ekikopo eki n'endagaano nsya ey'eshagama yangye. Mugume mukore mutyo mwaba nimuginywa kuunyijukiraho. 26Manya buri murundi ku murya ogu mugaati, mukanywa n'eki kikopo, muba nimuranga okufa kwa Mukama okuhitsya obu ariija. 27N'ahabw'ekyo omuntu weena orirya omugaati ogwo, akanywa ekikopo kya Mukama atashemereire, aryasingwa orubanja rw'okuhagaza omubiri n'eshagama ebya Mukama. 28Mbwenu, omuntu ayeshwijume, abone kurya aha mugaati ogwo n'okunywa aha kikopo ekyo. 29Ahabw'okuba orya kandi akanywa ateetaire ha mubiri gwa Mukama, aba ayeriiriire kandi ayenywereire okusingwa orubanja. 30Nikyo baingi omuriimwe baburiirwe amaani bakarwara, n'abamwe bakafa. 31Kuri twecwera orubanja omu mazima, titwakurucwereirwe. 32Kwonka ku turucwerwa Mukama, atuhana ngu turekye kusingwa orubanja hamwe n'ab'ensi. 33N'ahabw'ekyo banyaruganda, ku muraagume mwateerana kurya, mutegyerezane 34oraabe aine enjara abanze ariire omuka mutakaateerana mukakora eky'okubareetera kusingwa orubanja. Reero ebindi ndyabishoboorora naija.

will be added

X\