1 Corinthians 10

1Banyaruganda niinyenda mumanye ku baatataitwe boona baasangiirwe ekicu; ku boona baarabire omu Nyanja; 2ku boona baabatiriziibwe omuri ekyo kicu n'omuri Musa; 3ku boona baariire aha kyokurya kimwe eky'omutima, 4bakanywa aha kyokunywa kimwe eky'omutima. Manya boona bakanywa ekirikuruga omu rukiri rw'amagara orwabaire rubakurata, haza orwo rukiri akaba ari Kristo. 5Kwonka abaingi omuribo Ruhanga tarabasiimire; nikyo baahwerekyerereire omu ihamba. 6Ebyo byona bikaba biri eky'okureeberaho, ngu turekye kwetenga ebibi nkabo oku baabyetengire. 7Murekye kuba abaramya ebishushani, nka bamwe omuribo oku baabiramize; nk'oku kyahandiikirwe kiti: Abantu bakashutama kurya n'okunywa, kandi baimuka kuzina. 8Turekye kukora ebikwatiraine n'obushambani, nk'abamwe omuribo oku baabikozire, haza hakafa abantu obukumi bubiri n'enkumi ishatu eizooba rimwe. 9Turekye kugyeza Mukama, nk'abamwe omuribo oku baamugyerize, bakaitwa enjoka. 10Turekye kwetomboita, nk'abamwe omuribo oku baayetomboitsire, bakamarwaho omucwekyerezi. 11Mbwenu ebyo byona bikababaho kuba eky'okureeberaho, kandi bikahandiikwa kutuhabura, itwe abariho omu busingye obu obw'aha muheru. 12N'ahabw'ekyo orikuteekateeka ngu ayemereire, ayerinde atagwa. 13Tihariho kyosyo ekirabahikireho ekitashangwa mu bantu. Manya Ruhanga n'omwesigwa, taribareka mukoohibwa ebi mutarikubaasa; kwonka omuri okwo kwohibwa aryabateeraho oburyo bw'okukira, ngu mubaase kukwemera. 14N'ahabw'ekyo, bagyenzi bangye abakundwa, mwetantare okuramya ebishushani. 15Nimbagambira nk'abaine obwengye, naimwe mwetegyereze eki ndikugamba. 16Ekikopo ky'omugisha eki tusiimira Ruhanga, tikwo kukwatanisiza omu shagama ya Kristo? Omugaati ogu tucwamu, tikwo kukwatanisiza omu mubiri gwa Kristo? 17Manya omugaati guba gumwe, naitwe nobu turi baingi, turi omubiri gumwe, ahabw'okuba twena tubagana ahari ogwo mugaati gumwe. 18Mureebere aha mitwarize y'Abaisiraeli: abarya ebitambirwe, tibo bakwatanisiza aha itambiro? 19Mbwenu ngambe ki? Ngire nti ebihongyeirwe ebishushani n'ekintu, nari shi ebishushani n'ekintu? 20Ngabusha! Kureka nimmanyisa ku ebi abakaafiiri batamba, babihongyera emandwa, atari Ruhanga. Tindikwenda ku mukwatanisa n'emandwa. 21Timurikubaasa kunywa aha kikopo kya Mukama, kandi mukanywa n'ahaky'emandwa. Timurikubaasa kubagana ahaby'aha meeza ya Mukama, kandi mukabagana n'aha by'ey'emandwa. 22Mbwenu nitwenda kwitsa Mukama eihari? Hoona shi nitumukiza amaani? 23Byona nibiikirizibwa, kwonka ebiine omugasho ti byona. Byona nibiikirizibwa, kwonka ebikuza ti byona. 24Omuntu weena agume arekye kweyendeza, kureka ayendeze mutaahi we. 25Kyona ekigurwa omu itundiro ry'enyama, mugume mukirye mutaine ki murikwekyenga. 26Ahabw'okuba ensi n'eya Mukama na byona ebigirimu. 27Omu batarikwikiriza, ku harigira owaabeeta aha bugyenyi, mwasiima kuzayo, kyona eki baribareetera mukirye mutaine ki murikwekyenga. 28Kwonka ku haribaho owaabagira ati: Eki kihongyeirwe emandwa; mutarikirya ahabw'ogwo owaabamanyisa n'ahabw'okushinjwa-- 29eki ndikugamba n'okushinjwa okwe, kutari okwawe. Mbwenu ahabw'enki obugabe bwangye nibutegyekwa okushinjwa kw'omu mutima gw'ondiijo? 30Ku ndaabe ndya ninsiima, ahabw'enki abantu bampaahuuza ahabw'eki naasiimira? 31N'ahabw'ekyo yaaba nimurya nari nimunywa, nainga mwine eki murikukora kyona, mubikore ahabw'okuhaisa Ruhanga ekitiinwa. 32Mutarigwisa kubi Abayudaaya nari Abaguriiki, nainga ekigombe ky'abaikiriza Ruhanga, 33nkaanye oku nteeraho kugwisa gye abantu boona omuri byona ebi nkora, ntarikusherura by'okwegasira nyenka, kureka eby'okugasira abaingi ngu babone kujunwa.

will be added

X\