1 Corinthians 1

1Nyowe Paulo, ou Ruhanga yaakunzire kweta kuba entumwa ya Kristo Yesu, hamwe na mwene waitu Sositene, 2nitubahandiikira imwe ab'ekigombe ky'abaikiriza Ruhanga ab'omuri Korinto, mwena abaayeetsirwe kuba abantu ba Ruhanga, abari abe ahabw'okukwatanisibwa na Kristo Yesu, kandi abaayetsirwe hamwe n'abarikwera boona abari hoonahoona, abahoogyera eiziina rya Mukama waitu Yesu Kristo, Mukama waabo kandi Mukama waitu. 3Nitubendeza emigisha n'obusingye ebikomooka ahari Ruhanga Tataitwe, na Mukama Yesu Kristo. 4Obutoosha ninsiima Ruhanga ahabwanyu, ahabw'embabazi zi yaabagiriire omuri Kristo Yesu, 5kureeba ngu omu miringo yoona mukahindurwa abatungi omuriwe, omuri byona ebi murikugamba n'omuri byona ebi murikumanya 6nk'ebirikuhamya Kristo oku byahamiibwe omuriimwe. 7N'ahabw'ekyo tihariho kiconco kya Mutima kyona eki mubuzirwe, mutegyereize okushuuruuka kwa Mukama waitu Yesu Kristo, 8oribahangaana okuhitsya aha muheru, mukashangwa mutaine rubanja aha kiro kya Mukama waitu Yesu Kristo. 9Ruhanga, owaabeetsire kukwatanisa n'Omwana we Yesu Kristo Mukama waitu, n'omwesigwa. 10Beene Taata, nimbeehanangiriza omu iziina rya Mukama waitu Yesu Kristo, mwena ku mwikirizana, mukareka kwecwamu, kureka mukakwatanisa mwine omutima gumwe n'ebiteekateeko bimwe. 11Manya banyaruganda, nkagambirwa ab'owa Kulowe ku mwine empaka. 12Eki ndikumanyisa n'eki: omwe omuriimwe naagira ati: Ndi owa Paulo; ondi ati: Ndi owa Apolo; ondiijo ati: Ndi owa Keefa; n'ondi ati: Ndi owa Kristo. 13Mbwenu shi, Kristo abaganisiibwemu? Ebyo imwe, Paulo arababambiirwe aha musharaba? Nari shi mukabatizibwa omu iziina rya Paulo? 14Ninsiima Ruhanga ahabw'okuba tindabatiize n'omwe omuriimwe, kureka Kurisipo na Gaayo, 15ngu omuntu weena atakaagira ngu mukabatizibwa omu iziina ryangye. 16Eego kwo, nkabatiza n'ab'eka ya Sitefana. Okwihaho abo, tindikumanya yaaba hariho ondiijo ou ndabatiize. 17Manya Kristo tarantumire kubatiza, kureka okurangirira Amakuru Marungi, ntarikugambisa bigambo by'obwengye bw'abagambi barungi, ngu omusharaba gwa Kristo gurekye kubura ensha. 18Manya ekigambo omusharaba kibeera abarikuhwerekyerera obushema, kwonka itwe abarikujunwa kitubeera amaani ga Ruhanga. 19Ahabw'okuba kikahandiikwa kiti: Ndyacwekyereza obwengye bw'abanyabwengye; n'okwetegyereza kw'abarikwetegyereza nkuhindure busha. 20Mbwenu omunyabwengye arahi? Omwegyesa w'eiteeka arahi? Omuhakani w'obusingye obu arahi? Ruhanga shi, tarahindwire obwengye bw'ensi egi obushema? 21Ahabw'okuba omu bwengye bwa Ruhanga, ab'ensi ku baaremirwe kumumanyisibwa obwengye bwabo, Ruhanga akasiima kujuna abaikiriza naakoresa obushema obu turangirira. 22Manya Abayudaaya benda obumanyiso, n'Abaguriiki basherura obwengye. 23Kwonka itwe turangirira Kristo owaabambirwe aha musharaba, ou Abayudaaya bateerwaho entsibo, Abanyamahanga bakamweta omushema. 24Kwonka aha beetsirwe, Abayudaaya n'Abaguriiki, Kristo aba amaani ga Ruhanga n'obwengye bwa Ruhanga. 25Ahabw'okuba obushema bwa Ruhanga bukira obwengye bw'abantu, n'amaani makye ga Ruhanga gakira amaani g'abantu. 26Manya banyaruganda, mwetegyereze okwetwa kwanyu. Ti baingi omuriimwe abaine obwengye nk'emitindo y'ensi oku eri, ti baingi abaine obushoboorozi, ti baingi ab'ekitiinwa. 27Kureka Ruhanga akatoorana ebishema omu nsi kuhemura abanyabwengye, yaatoorana ebitaine maani omu nsi kuhemura ebigaine. 28Ruhanga akatoorana ebitarikwetwaho n'ebirikugaywa omu nsi, nangwa n'ebitariho, kuhindura busha ebiriho, 29ngu hatakaagira omuntu weena owaayehimbisa omu maisho ge. 30Niwe bukomooko bw'amagara gaanyu omuri Kristo Yesu, ou yaataireho kuba obwengye bwaitu, okuhikiirira kwaitu, n'okwezibwa kandi n'okucungurwa kwaitu. 31N'ahabw'ekyo, nk'oku kyahandiikirwe: Orikwehimbisa, k'ayehimbisize omuri Mukama.

will be added

X\