Tituse 2

1Nyaŋ dↄↄ wola wↄ anokoare nombia ŋan ne kyaa na Wurubuarɛ nombia ŋan nɛ. 2Wola baala kegyiise baŋ nyi baa yela be sia kedoo tɛɛle man. Baa yɛɛ balaŋ baŋ obuo doo ba wose man, na baa gyeŋ ba wose katela. Wola wↄ na baa lɛɛ anokoare nombia ŋan di, na baa gyae balaŋ lee be konↄↄse man na baa nyiŋ konↄↄ seŋ ba kelɛɛdi keŋ man nideli. 3Mena mↄ te wola ala kegyiise baŋ nyi baa kyaa ŋgba balaŋ baŋ bee yee Wurubuarɛ nɛ. Be na yɛɛ balaŋ baŋ bee kolosi balaŋ wose man nombia ya, te be na yɛɛ soloŋnyↄↄra ya. Mↄna kaboena bo nyi baa wola nombia kpaakpaa. 4Nyi akpaa be yɛɛ mena na, baa tale wola alebia mↄ na baa gyae be baala na be bia nombia, 5na baa gyeŋ ba wose katela keŋ bↄↄ wↄlɛɛ ba wose ya. Na baa yɛɛ ala yalala kpaakpaa nyibaŋ baŋ bɛɛ yɛɛ deeli, te bɛɛ yↄkↄse ba wose fa be baala. Dekↄŋ mena na, ŋolo be gyae waa nyiŋ nombiikum daale kolosi lee Wurubuarɛ nombia ŋan wose man ya. 6Mena ke te do tewulɛɛ mↄ kakyeŋ na baa tale di ba wose dↄↄ. 7Kaboena nyi nya yɛɛ nombia kpaakpaa abↄↄ pou man na balaŋ kena na baa kasee neŋ. N nombia kawola man na yela balaŋ kena nya anokoare na n sibiiyam. 8Kolosi nombia ŋan ŋe doo na ŋe gbɛɛ nɛ, na balaŋ baŋ bɛɛ koro seŋ tia neŋ nɛ be nyiŋ nombiikum daale yako lee n wose man ya. Na desɛŋ ke nyiŋ kyaŋ wↄ nawolo nyi bↄↄ gyae baa nyiŋ nombiikum daale kolosi lee da wose man ya. 9Wola tewulɛɛ na alebia nyi baa yↄkↄse ba wose fa be gbeŋgyoona lee kpene kamasɛ man, na baa yɛɛ kpene keŋ gyae ka gyoo be gbeŋgyoona baŋ sia. Be na kolosi na be gbeŋgyoona baŋ kyɛɛkyɛɛ ya. 10Be na ŋmɛɛle be gbeŋgyoona baŋ kolo ya. Mↄna baa yɛɛ kpene keŋ gyae ke yela be gbeŋgyoona baŋ ke lɛɛ wↄ di nideli. Na be nombia ayɛɛsa pou ke yela da nyeelɛɛre Wurubuarɛ nombia ŋan bɛɛ wolo nɛ kegyↄ balaŋ loo. 11Nawolo nyi Wurubuarɛ ta lese ↄ bɛrɛɛ keŋ gyae ke yela balaŋ ke nyiŋ nyeedoŋ nɛ wola balaŋ pou. 12Wurubuarɛ bɛrɛɛ kenaŋ na wola daa mena keŋ dee tina tɛɛle kei dↄↄ nombia, na gbɛɛneŋ ŋan ŋa te yɛɛ Wurubuarɛ gbɛɛneŋ ya nɛ kesila yela. Na dɛɛ tale di da wose dↄↄ na de gbɛɛneŋ mↄ ka tenee Wurubuarɛ siaman, na dɛɛ kyaa tɛɛle kei dↄↄ Wurubuarɛ kegyaebii man. 13Ɛ yela dɛɛ yɛɛ mena debaŋ keŋ de kyaa dɛɛ daa Wurubuarɛ na da nyeelɛɛre Yesu Kristo kabese kↄŋ ↄ gyoorobiiri man keŋ dↄↄ de loo gyakaa nɛ. 14Yesu moona ↄ wose fa nyi baa ko na waa mo tↄ da nyeeman kom lɛɛ daa lee de nombiakumɛɛ pou man. Na dɛɛ bese balaŋ baŋ de yɛɛ ŋon waageŋ wui, na waa desina daa na dɛɛ tale yɛɛ abↄↄ kpaakpaa. 15Mo n doŋ pou wola wↄ mena abↄↄ kɛŋa. Do baŋ bɛɛ yↄkↄse nɛ kakyeŋ, na n ka lese baŋ mↄ bɛɛ yɛɛ nombiakumɛɛ nɛ nombiakumɛɛ si wↄ. Na yela be man ŋolo ke kɛɛ neŋ nyi n yɛɛ bu e ya.

will be added

X\