Tituse 1

1Tↄne kei lee maŋ Wurubuarɛ tobaale Pↄↄl ŋon me yɛɛ Yesu Kristo kpilale e nɛ gyaŋ. Wurubuarɛ lesena maŋ nyi me kaa kyↄ balaŋ baŋ ŋon Wurubuarɛ gbagba ba lese wↄ see fa ↄ wose nɛ, na baa seŋ ba kelɛɛdi man keŋkeŋ na maa wola wↄ Wurubuarɛ nombia ŋan ŋe doo na ŋe gbɛɛ nɛ, na baa gyeŋ ŋa kpu nideli. Nombia kɛŋa kagyeŋ ne gyae la ke tale yela balaŋ ke yɛɛ Wurubuarɛ kegyaebii. 2Kei gyae ke yela baa nyiŋ nyeedoŋ kekpaa keŋ dↄↄ de loo gyakaa nɛ. Wurubuarɛ ŋon ↄ bee di dekara ya nɛ, wulaa yakowↄ see leenaŋ kewalaŋ keŋ nyi dee nyiŋ mena nyeedoŋ kekpaa kei pɛte ↄ yɛɛ kpene kamasɛ. 3Mena dↄↄ debaŋ kpaakpaate keŋ ŋon Wurubuarɛ gbagba ba see kelii nɛ, ↄ lese mena nombia kɛŋa debↄↄ. Da nyeelɛɛre Wurubuarɛ ŋon ↄ ne fa balaŋ pou nyeedoŋ nɛ, ŋon yako na mena nombia kɛŋa fa maŋ Pↄↄl nyi me kaa yako fa balaŋ pou. 4Mɛɛ ŋmarase tↄne kei mee yelee nyaŋ Tituse ŋon mↄↄ mo neŋ ŋgba me bu gbagba nɛ. Nawolo nyi Kristo te daa na neŋ pou lɛɛwↄ di. De kya Wurubuarɛ na da nyeelɛɛre Yesu Kristo baa mo be bɛrɛɛ boele neŋ na baa fa neŋ wosefɛɛreŋ. 5Kpene keŋ dↄↄ te mↄↄ tina neŋ yela Kreti tɛɛle man yɛna nyi, mɛɛ gyae na n kenyiŋ desina abↄↄ ŋan be kaa na kedesina nɛ nideli, na n ka lese kegyiise fa donↄↄ kamasɛ ŋgba mena keŋ mↄↄ wola neŋ nɛ. 6Kaboena nyi Kristotena kegyia waa yɛɛ walaŋ ŋon ↄ wose man be dana nombiikum kamasɛ ya. Ↄ wɛɛle dɛɛ yɛɛ dokoloŋ. Kaboena nyi ↄ bia mↄ baa yɛɛ balaŋ baŋ bɛɛ lɛɛ Yesu di te bee bu balaŋ, te ba wose man be dana nombiikum daale keŋ balaŋ baa naa kolosi ya. 7Lee mena keŋ kegyia seŋɛɛ la Wurubuarɛ tom keŋ siaman dↄↄ nɛ, tekaboena nyi baa nyiŋ nombiikum kamasɛ lee ↄ wose man ya. Ↄ na yɛɛ walaŋ ŋon ↄ na wola ↄ wose yaa ↄ na gyeŋ baŋ bileŋbileŋ ya. Ↄ na yɛɛ soloŋnyↄↄre yaa walaŋ ŋon ↄ ne gyae kale yaa walaŋ ŋon ↄ sia ne yɛɛ kↄba dↄↄ beiŋ ya. 8Mↄna kaboena nyi waa yɛɛ walaŋ ŋon ↄ ne lɛɛ ŋↄↄla, te ↄ ne gyae nombia kpaakpaa keyɛɛ. Kaboena nyi waa yɛɛ walaŋ ŋon ↄ gyeŋ ↄ wose katela, te ↄ nombia ayɛɛsa mↄ doo na ke gbɛɛ. Kaboena nyi waa yɛɛ walaŋ ŋon ayimɛɛ be doo ↄ man ya te ↄ ne tale di ↄ wose dↄↄ. 9Kaboena nyi waa kyaŋ Wurubuarɛ nombia ŋan ŋe doo na ŋe gbɛɛ ŋgba mena keŋ bↄↄ wolo nɛ man nideli. Kaboena nyi waa kyaŋ ŋa nideli na waa nyiŋ tale mo nyeedoŋ nombia ŋan wola balaŋ na ke gbɛɛ, na waa lese nombiakumɛɛ wolala baŋ nombiakumɛɛ si wↄ. 10Nawolo nyi balaŋ burum ta koro seŋ tia Wurubuarɛ nombia ŋan, te be dana be nombia ŋan ŋↄↄ taŋ tↄnↄↄ ya nɛ bɛɛ beo balaŋ. Tuturu na Kristotena baŋ be yɛɛ Gyudatenawↄ te be sɛɛ be dana baala wose kekara mmaraa keŋ man nɛ, ne yɛɛ na mena nombia kɛŋa. 11Kaboena nyi yaa tↄ wↄ mena nombia ŋenaŋ kawola, nawolo nyi be sɛɛ be dana nombia ŋan tekaboena nyi baa wola ya nɛ man. Kei te yeli akpaŋalaŋ akpaŋalaŋ man balaŋ burum ta yoo gbɛɛ lee kawola kpaakpaate keŋ man. Ke yɛɛ desɛŋ nombii ke, nawolo nyi kↄba kegyae dↄↄ te bɛɛ yɛɛ kɛŋa pou nɛ. 12Baŋ Kretitena benaŋ gbagba be kegyia ŋolo yako ba wose man nombia nyiaa, "Kretitena yɛɛ akɛrɛɛtenawↄ. Be dana akpanyaŋnyaŋ ŋgba wonembu kum nɛ, te be yɛɛ kebↄŋaletena na diirawↄ." 13Mena nombii keŋ ↄ be yako nɛ yɛɛ ampaŋ, mena dↄↄ faree Kristotena baŋ be kyaa Kreti tɛɛle dↄↄ nɛ nideli nyi baa kyaŋ ba Kristo kelɛɛdi keŋ man nideli. 14Na baa tina Gyudatena beneŋ nombia ŋan ŋa te yɛɛ ampaŋ ya, na balaŋ baŋ bↄↄ ne lɛɛ anokoare keŋ di ya nɛ mmaraase dↄↄ kedi yela. 15Balaŋ baŋ ayimɛɛ be doo be man ya nɛ, kpene kamasɛ dei fa wↄ. Mↄna balaŋ baŋ ayimɛɛ doo be man te bↄↄ ne lɛɛ Kristo nombia ŋan di ya nɛ dↄↄ, kolo be kyaa keŋ ke dei fa wↄ ya. Nawolo nyi nombiakumɛɛ te di ba agyueŋ na be konↄↄ man nombia pou dↄↄ, te nombiakumɛɛ keyɛɛ mↄ be dana wↄ desɛŋ ya. 16Bɛɛ gyↄ be konↄↄ yako nyi ba gyeŋ Wurubuarɛ, mↄna be nombia ayɛɛsa bɛɛ wolo nyi ba gyeŋ Wurubuarɛ ya. Be yɛɛ balaŋ kumɛɛwↄ Wurubuarɛ siaman te bↄↄ ne bu e ya. Ba tekaboena nombii kpaakpaa mↄ keyɛɛ ya.

will be added

X\