Romantena 8

1Me tebia, nɛnɛɛ dↄↄ balaŋ baŋ pou baŋ na Yesu Kristo be yɛɛ dokoloŋ nɛ, Wurubuarɛ be gyae waa bu wↄ fↄↄ bela ya. 2Nawolo nyi lee Yesu Kristo dↄↄ Wurubuarɛ feliŋ ŋon ta lese daa lee dukum na yeŋ man te ↄ faa daa nyeedoŋ wↄle. 3Mosesi mmaraase ŋan te tale lese daa lee dukum man ya, nawolo nyi de dinↄↄ kum keŋ doo de man nɛ te yeli dɛɛ tale di mmaraase ŋan dↄↄ ya. Mↄna Wurubuarɛ tɛɛwↄ gbɛɛ wↄle daale dↄↄ lɛɛ da nyee. Gbɛɛ kenaŋ yɛna nyi ↄ kpila ŋon gbagba ↄ bu kↄŋ de gyaŋ ŋgba deniwalaŋ nɛ, te ↄ wosenaane mↄ yɛɛ ŋgba walaŋ kamasɛ wui keŋ dukum doo ke man nɛ. Nombiakumɛɛ dↄↄ te Wurubuarɛ kpila ↄ bu ŋon nyi waa kↄŋ, te ŋon kaa moona balaŋ pou nombiakumɛɛ seele. Keŋ Wurubuarɛ be yeli ↄ bu ŋon be kaa yem dↄↄ, ↄ ta lese wola nyi dukum be dana doŋ denibalaŋ dↄↄ bela ya. 4Wurubuarɛ yɛɛ ke mena na ke yela daa baŋ dↄↄ tekaa doo dinↄↄ kum keŋ man ya te dee sila Wurubuarɛ feliŋ ŋon nɛ, ke nyiŋ tale yɛɛ nombia ŋan ŋa tenɛɛ Wurubuarɛ siaman ŋgba mena keŋ mmaraase ŋan na wolo nɛ. 5Nawolo nyi balaŋ baŋ be sɛɛ be doo be dinↄↄ kum keŋ man nɛ, be loo gyakaa bo abↄↄ kumɛɛ ŋan baŋ gbagba ne gyae nyi baa yɛɛ tɛɛle kei dↄↄ nɛ dↄↄ. Mↄna balaŋ baŋ be silana Wurubuarɛ feliŋ ŋon nɛ, be loo gyakaa bo kpene keŋ Wurubuarɛ feliŋ ŋon ne gyae nyi baa yɛɛ nɛ dↄↄ. 6Walaŋ ŋon ↄ mo ↄ loo gyakaa abↄↄ kumɛɛ ŋan ŋon gbagba ne gyae nɛ dↄↄ nɛ, na mo yeŋ bo kↄna e. Te walaŋ ŋon ↄ mo ↄ loo gyakaa Wurubuarɛ feliŋ ŋon dↄↄ nɛ, na mo nyeedoŋ na wosefɛɛreŋ bo kↄna e. 7Mena dↄↄ akpaa ŋolo da mo ↄ loo gyakaa abↄↄ kumɛɛ ŋan ŋon gbagba ne gyae nɛ dↄↄ nɛ, na mena walaŋ ŋonaŋ ne kↄla Wurubuarɛ. Nawolo nyi ↄ bee di Wurubuarɛ mmaraase ŋan dↄↄ ya, te ↄ be gyae waa tale di ŋe dↄↄ mↄ ya. 8Balaŋ baŋ bɛɛ yɛɛ abↄↄ kumɛɛ ŋan baŋ gbagba ne gyae nɛ, be nombia be gyae ke tale gyoo Wurubuarɛ sia ya. 9Mↄna ɛmɛɛ dↄↄ nyi akpaa Wurubuarɛ feliŋ ŋon doo ɛ man nɛ, na ɛ ba tekaa doo ɛ dinↄↄ bene keŋ man ya. Ɛ silana kpene keŋ Wurubuarɛ feliŋ ŋon ne gyae nyi yaa yɛɛ nɛ bo. Akpaa Wurubuarɛ feliŋ ŋon be doo ŋolo man ya nɛ, na ↄtenate te yɛɛ Kristo walaŋ e ya. 10Te akpaa Kristo doo ɛ man na, keŋ na keŋ ɛ ka yeŋ lee nombiakumɛɛ keyɛɛ dↄↄ koraŋ nɛ, Wurubuarɛ feliŋ ŋon waa yela ɛ ke nyiŋ nyeedoŋ bela. Nawolo nyi lee Kristo dↄↄ ɛ gbɛɛneŋ ta tenɛɛ Wurubuarɛ siaman. 11Nyi akpaa Wurubuarɛ ŋon ↄ be gyuusu Yesu lee yeŋ man nɛ feliŋ doo ɛ man na, kenaŋ na waa ta ↄ feliŋ ŋonaŋ dↄↄ yela ɛ wosenaane kei keŋ gyae ka yeŋ nɛ ke nyiŋ nyeedoŋ wↄle bela. 12Mena dↄↄ me tebia, kpene keŋ doo fa daa yɛna nyi kaboena nyi dɛɛ yɛɛ kpene keŋ Wurubuarɛ feliŋ ŋon ne gyae. Ɛ na tekaa yela dɛɛ yɛɛ kpene keŋ de dinↄↄ kum keŋ ne gyae nɛ ya. 13Nawolo nyi akpaa ɛ yɛɛ kpene keŋ ɛ dinↄↄ kum keŋ ne gyae tɛɛle kei dↄↄ na ɛ ka yeŋ. Mↄna akpaa ɛ tɛɛ Wurubuarɛ feliŋ ŋon doŋ dↄↄ bɛɛ abↄↄ ŋan ɛmɛɛ gbagba ne gyae tɛɛle kei dↄↄ na, kenaŋ na ɛ ke nyiŋ nyeedoŋ kekpaakekpaa. 14Balaŋ baŋ bee yeli Wurubuarɛ feliŋ ŋon na wola wↄ gbɛɛ nɛ, baŋ yɛna Wurubuarɛ bia gbagba. 15Nawolo nyi na feliŋ ŋon waa yela dɛɛ bese gbeŋa na dee yee gyakoloŋ nɛ te Wurubuarɛ faa daa ya, mↄna ↄ feliŋ ŋon waa yela dɛɛ bese Wurubuarɛ bia gbagba nɛ te ↄ faa daa. Feliŋ ŋonaŋ doŋ man dↄↄ te dɛɛ tale baake Wurubuarɛ nyi "De kya Wurubuarɛ." 16Wurubuarɛ feliŋ ŋonaŋ gbagba ne diina adansɛɛ fa daa, yela dɛɛ gyem de konↄↄse man nyi de yɛɛ Wurubuarɛ bia gbagbawↄ. 17Nɛnɛɛ akpaa de yɛɛ Wurubuarɛ bia gbagbawↄ na, kenaŋ na dee kpu na Kristo nyiŋ abↄↄ ŋan Wurubuarɛ be desina see fa ↄ balaŋ nɛ. Te akpaa daa mↄ de naa diyem ŋgba mena keŋ Kristo be naa diyem nɛ na, kenaŋ na Wurubuarɛ waa yela dee kpu na Kristo di gyoori ↄ gyoorobiiri keŋ man. 18Akpaa ma to me sia kɛɛ gyoorobiiri keŋ ke doo ke daa na daa nɛ, na kaale keŋ dɛɛ kaa debaŋ kei nɛ te yɛɛ kolo ke ya. 19Tɛɛle kei na ka abↄↄ ŋan pou Wurubuarɛ be yɛɛ nɛ, sia te yɛɛ ŋɛɛ daa wee keŋ Wurubuarɛ waa lese ↄ bia gbagba baŋ wola nɛ. 20Nawolo nyi tɛɛle kei na abↄↄ ŋan pou Wurubuarɛ be yɛɛ nɛ ta koro yuŋ, mena dↄↄ ŋↄↄ gyae ke tale yɛɛ kpene keŋ Wurubuarɛ be yɛɛ ŋa nyi ŋe dɛɛ yɛɛ nɛ ya. Te yɛɛ abↄↄ ŋenaŋ gbagba kegyaebii man yaa ŋe yɛɛwↄ mena ya, mↄna Wurubuarɛ yele la te ŋe kↄŋawↄ mena. 21Mↄna kɛŋa pou wↄle na, Wurubuarɛ te fa daa loo kegyakaa nyi waa lɛɛ abↄↄ ŋenaŋ pou nyee na ŋe ke nyiŋ ŋa wose keŋ ŋↄↄ wↄlɛɛ leki ya. Na ŋan mↄ ke kpu na Wurubuarɛ bia ↄ gyoorobiiri keŋ man. 22Da gyeŋ nyi kaa lii na gyeŋ wee kei nɛ, tɛɛle kei na abↄↄ ŋan pou doo ke man nɛ na keketee ŋgba alo ŋon ↄ na doŋee nɛ. 23Na ŋan ŋaageŋ na keketee la ya. Mↄna daa baŋ dↄↄ nyiŋ Wurubuarɛ feliŋ ŋon ↄ yɛɛ kpene gyaŋgbate keŋ Wurubuarɛ ba mo fa daa nɛ, daa mↄ na keketee de konↄↄse man dɛɛ daa Wurubuarɛ ke lɛɛ da nyee lee de dinↄↄ kum kei man na waa yela dɛɛ bese ↄ bia. 24Lee mena loo kegyakaa kei dↄↄ te Wurubuarɛ lɛɛ da nyee. Nyi n loo gyakaa kpene keŋ n wulaa n dana ke nɛ dↄↄ na, kenaŋ na ka te yɛɛ loo kegyakaa ya. Nawolo nyi ŋolo be tale mo ↄ loo gyakaa kpene keŋ ↄ wulaa ↄ dana ke nɛ dↄↄ ya. 25Mↄna akpaa da mo de loo gyakaa kpene keŋ dↄↄ dana ke ya nɛ dↄↄ na, kenaŋ na dee nyiŋ konↄↄ kyaa daa ke. 26Mena mↄ te Wurubuarɛ feliŋ ŋon ne kyↄ daa de kaale man wee na wee lee da kefane man. Nawolo nyi dↄↄ gyeŋ mena keŋ dɛɛ fane na ke kaboena Wurubuarɛ kegyaebii ya. Mↄna ŋon Wurubuarɛ feliŋ ŋon ↄ doo de man nɛ, na seŋala de nawↄↄ man mo kakeketee dinaa keŋ ke taŋ keyako ya nɛ kolosi seŋ de wↄle. 27Wurubuarɛ gyeŋ kpene keŋ doo walaŋ kamasɛ konↄↄ man, te ↄ gyeŋ kpene kamasɛ keŋ mↄ doo ↄ feliŋ ŋon agyueŋ man. Nawolo nyi ↄ feliŋ ŋonaŋ seŋɛɛ la de nawↄↄ man ↄ ne fane fa daa Kristotena lee Wurubuarɛ kegyaebii man. 28Da gyeŋ nyi balaŋ baŋ bɛɛ gyae Wurubuarɛ nɛ, nyi diyem man o, yaa gyoŋ man o, Wurubuarɛ ne yeli kpene kamasɛ ne gyu nideli fa wↄ. Baŋ yɛna balaŋ baŋ ŋon Wurubuarɛ be baake wↄ, te ↄ ba mo wↄ yɛɛ ↄ bia gbagba ŋgba mena keŋ ↄ be wulaa yako see nɛ. 29Nawolo nyi balaŋ baŋ Wurubuarɛ wulaa ↄ gyeŋ nɛ, ↄ wulaa lese wↄ see na waa yela be dinↄↄ ke yɛɛ ŋgba ↄ bu ŋon wui nɛ. Na ↄ bu ŋon ke yɛɛ Wurubuarɛ bia man pou bu kegyia. 30Baŋ Wurubuarɛ be wulaa lese wↄ see nɛ, baŋ te ↄ baakewↄ. Te baŋ mↄ ↄ be baake wↄ nɛ, ↄ lɛɛ wↄ do nyi be gbɛɛneŋ tenɛɛ ↄ siaman. Te baŋ ↄ be lɛɛ wↄ do nyi be gbɛɛneŋ tenɛɛ ↄ siaman nɛ, baŋ te ↄ yela ba bese gyoorobia. 31Kɛŋa pou wↄle na, sena te dɛɛ yako bela? Nyi akpaa Wurubuarɛ seŋɛɛ de wↄle na, amↄte ne gyae la waa tale koro seŋ tia daa? 32Ŋolo be kyaa ya. Nawolo nyi akpaa Wurubuarɛ te bɛɛse daa ŋon gbagba ↄ bu ya, mↄna ↄ sɛɛwↄ mo e fa nyi ↄ kaa yeŋ lɛɛ da nyee na, woŋ dↄↄ te ↄ ba mo abↄↄ ŋan pou ↄ be yako see nyi waa fa daa nɛ mↄ kpu daa ya? 33Akpaa mena te doo na, amↄte ne gyae la waa tale bu balaŋ baŋ Wurubuarɛ ba lese wↄ besena ↄ balaŋ nɛ fↄↄ, keŋ nyi ŋon lɛɛ na wↄ do nyi be gbɛɛneŋ tenɛɛ ↄ siaman? 34Amↄte ne gyae la waa tale bu wↄ fↄↄ? Kristo Yesu gba be gyae waa bu wↄ fↄↄ ya, nawolo nyi ŋon yɛna walaŋ ŋon ↄ ba yem fa daa. Na yeŋ kaageŋ gba te ↄ yeŋawↄ fa daa ya, mↄna Wurubuarɛ gyuusu e lee yeŋ man te ↄ kyaa Wurubuarɛ dunoluŋ dↄↄ ↄ na sola e fa daa. 35Woŋ ne gyae la ke tale tira daa lee kegyae keŋ Kristo ne gyae daa nɛ man? Diyem kena yaa kayeyɛɛ yaa kekↄla yaa diyem kenaase yaa tanam yaa diyem yaa gyakoloŋ nombia yaa yeŋ? Kolo be kyaa keŋ gyae ke tale tira daa na Kristo nsana ya. 36Wurubuarɛ nombia aŋmaraseŋ see yakowↄ yenaŋ daale nyiaa, "Lee nyaŋ dↄↄ wee kamasɛ na bɛɛ gyae daa baa ko. Bɛɛ yɛɛ daa ŋgba namense baŋ bɛɛ wↄŋee wↄ be kaa ko nɛ." 37Abↄↄ kɛŋa pou man na dee yoo lee, lee Yesu Kristo ŋon ↄ ne gyae daa nɛ dↄↄ. 38Nawolo nyi, ma gyeŋ nideli nyi kolo na kolo be kyaa keŋ ke gyae ke tale tira daa lee kegyae keŋ Kristo ne gyae daa nɛ man ya. Yeŋ yaa nyeedoŋ yaa Wurubuarɛ kpilala yaa feliŋkumɛɛ yaa abↄↄ ŋan ŋe kyaa debaŋ kei yaa ŋan ŋe gyae ke kↄŋ wↄle wↄle nɛ yaa doŋ wↄle daale koraŋ be gyae ke tale tira daa lee Kristo kegyae keŋ man ya. 39Mena mↄ te doŋse ŋan pou ŋe kyaa adido adido, na ŋan pou ŋe doo tɛɛle ateta ateta yaa kpene kamasɛ keŋ Wurubuarɛ be yɛɛ tɛɛle kei dↄↄ nɛ, be gyae ke tale tira daa lee kegyae keŋ Wurubuarɛ be tɛɛ de Gbeŋgyoo Yesu Kristo dↄↄ gyae daa nɛ man ya.

will be added

X\