Romantena 7

1Me tebia, ɛ popou ɛ gyeŋ Mosesi mmaraase ŋan. Te ɛ gyeŋ mↄ nideli nyi, akpaa walaŋ kyaa na ↄ sia na te mmaraase ŋan ne di doŋ ↄ dↄↄ. 2Ɛ yela dɛɛ mo mena nombii kei maa na alo yalale. Akpaa ↄ baale nyiŋa ↄ kyaa keŋ ↄ ta yeŋa ta ya nɛ, na alo ŋon doe ↄ baale ŋonaŋ tɛɛ. Mↄna akpaa ↄ baale ŋonaŋ da yem na alo ŋon te nyiŋ ↄ wose lee mmaraase ŋan tɛɛ, nawolo nyi yale mmaraa bɛɛ tekaa bake e bela ya. 3Mena dↄↄ nyi akpaa ↄ baale ŋon ta yeŋa ta ya te alo ŋon de bɛɛ e gyu ke yala baale wↄle nɛ, na ↄ ta lee ↄ baale wↄle baa. Te akpaa ↄ baale ŋon da yem te alo ŋon de gyu ke yala baale wↄle nɛ, kenaŋ na ↄ te lee ↄ baale wↄle ya nawolo nyi yale mmaraa keŋ bɛɛ tekaa bake e bela ya. 4Me tebia, mena yaa doo fa ɛmɛɛ mↄ nɛ. Debaŋ keŋ ɛ be lɛɛ Kristo di nɛ, na yɛɛ yaa ŋgba ɛmɛɛ na e yeŋa la nɛ. Keŋ ɛmɛɛ na Kristo be yɛɛ dokoloŋ ↄ yeŋ man dↄↄ, mmaraase ŋan ba tekaa dana doŋ ɛ dↄↄ bela ya. Mena dↄↄ ɛ yɛɛ walaŋ wↄle ŋon Wurubuarɛ be gyuusu e lee yeŋ man nɛ wui, na ɛ ke nyiŋ yɛɛ nombia kpaakpaa fa Wurubuarɛ. 5Nawolo nyi debaŋ keŋ de doo de dinↄↄ bene keŋ man nɛ, na mmaraase ŋan yela da moo da wose do abↄↄ kumɛɛ ŋan daa gbagba ne gyae nyi dɛɛ yɛɛ nɛ man nideli. Nafↄ mena abↄↄ kumɛɛ kɛŋa deŋ moo yeŋ bo kↄna daa, na daa na Wurubuarɛ nsana ke tira kekpaakekpaa. 6Mↄna nɛnɛɛ dↄↄ Wurubuarɛ te yeli mmaraase ŋan nafↄ ŋɛɛ bake daa nɛ, ba tekaa dana doŋ de dↄↄ bela ya. Te keŋ daa na Yesu Kristo be yɛɛ dokoloŋ ↄ yeŋ man dↄↄ, de ta tekaa yɛɛ mmaraase ŋan nafↄ ŋɛɛ bake daa nɛ gbeŋawↄ bela ya. Mena dↄↄ de te nyiŋ da wose dɛɛ som Wurubuarɛ lee gbɛɛ wↄle keŋ ↄ feliŋ ŋon ba wola daa nɛ man. Ka te yɛɛ gbɛɛ bene keŋ Mosesi mmaraase ŋan ba wola daa nɛ ya. 7Nɛnɛɛ sena yaa dɛɛ yako baa? Dɛɛ yako baa nyi mmaraase ŋan yɛɛ kolo kum ke? Korakora na mena ya. Mmaraase ŋan yele la te ma gyeŋa dukum. Nafↄ akpaa mmaraase ŋenaŋ deŋ te yako nyi, "Na yeli n sia keyɛɛ ŋolo kolo ya nɛ," nafↄ mↄↄ gyeŋ nyi sia keyɛɛ ŋolo kolo dↄↄ yɛɛ dukum ke ya. 8Mↄna mena mmaraa kei yele la te sibii keyɛɛ kum kamasɛ nyiŋa gbɛɛ kaa gyoo me maŋ. Nyi mmaraase deŋ be kyaa ya nɛ, nafↄ dukum be dana yele ya. 9Debaŋ keŋ nafↄ mↄↄ gyeŋ mmaraase ŋan ya nɛ, na yɛɛ maŋ ŋgba dukum kamasɛ be doo me maŋ ya nɛ. Mↄna nɛnɛɛ keŋ mↄↄ kaa gyeŋ mmaraase ŋenaŋ nɛ te me naawↄ nyi me yɛɛ dukumyɛɛre e, te ma dukum dↄↄ daa na Wurubuarɛ nsana gyae ke tira kekpaa. Kei nawolo baa nyi Wurubuarɛ siaman na, me yɛɛ ŋgba walaŋ ŋon ↄ ba yem nɛ. 10Mena dↄↄ me naawↄ nyi mmaraase ŋan nafↄ ŋe gyae ke fa maŋ nyeedoŋ nɛ, ŋa moo yeŋ bo kↄna maŋ. 11Nawolo nyi lee mmaraase ŋenaŋ dↄↄ, te dukum nyiŋa gbɛɛ beo maŋ yela me nyiŋa yeŋ. 12Mmaraase ŋan gbagba dↄↄ, ŋe popou lee Wurubuarɛ gyaŋ. Ŋe doo na ŋe gbɛɛ te ŋe dei mↄ. Dukum kamasɛ be doo ŋe man ya. 13Na kei nawolo baa nyi mmaraase ŋan ŋe dei nɛ, yele la te me nyiŋa yeŋ? Korakora, be doo mena ya. Dukum yele la te me nyiŋa yeŋ. Dukum tɛe mmaraase ŋan ŋe dei nɛ dↄↄ te ŋe yela me nyiŋa yeŋ, na ke yela balaŋ kena mena keŋ dukum doo. Mena dↄↄ lee mmaraase ŋan dↄↄ, te dukum lese ka wose wola nyi kↄ dei korakora ya. 14Da gyeŋ nyi mmaraase ŋan dei nawolo nyi ŋe tɛe Wurubuarɛ feliŋ ŋon dↄↄ kↄŋ, mↄna maŋ dↄↄ me yɛɛ deniwalaŋ yakaate e, te nombiakumɛɛ te wulu ma nyee. Mena dↄↄ me ta bese gbeŋi fa dukum. 15Maŋ gbagba bee nyii nombia ŋan mɛɛ yɛɛ nɛ man ya. Nawolo nyi nombia ŋan mɛɛ gyae nyi maa yɛɛ nɛ mↄↄ ne yɛɛ ŋa ya, te ŋan mↄↄ ne gyae nyi maa yɛɛ ya nɛ ŋan te mɛɛ yɛɛ. 16Te akpaa nyi abↄↄ ŋan mↄↄ ne gyae nyi maa yɛɛ ya nɛ te mɛɛ yɛɛ na, kenaŋ na mɛɛ lɛɛ ke do nyi mmaraase ŋan dei. 17Kedoo kei nɛ, te yɛɛ maŋ gbagba ne yɛɛ na nombia kɛŋa ya. Dukum doŋ keŋ ne di me dↄↄ nɛ, keŋ ne yele la te mɛɛ yɛɛ mena nombia ŋenaŋ. 18Ma gyeŋ nyi debaŋ keŋ me doo me dukum dinↄↄ kei man nɛ, kolo kpaakpaa kamasɛ be doo me man ya. Nawolo nyi mɛɛ gyae nyi maa yɛɛ nombia kpaakpaa, mↄna mↄↄ ne tale yɛɛ ŋa ya. 19Nombia kpaakpaa ŋan mɛɛ gyae nyi maa yɛɛ nɛ mↄↄ ne tale maa yɛɛ ŋa ya, mↄna nombiakumɛɛ ŋan mↄↄ ne gyae nyi maa yɛɛ ya nɛ, ŋan te me gyakaa mɛɛ yɛɛ. 20Akpaa nyi nombia ŋan mↄↄ ne gyae nyi maa yɛɛ ya nɛ te me gyakaa mɛɛ yɛɛ na, kenaŋ na te yɛɛ nyi maŋ gbagba ne yɛɛ na ŋa ya. Mↄna dukum doŋ keŋ ne di me dↄↄ nɛ, ne yele la te mɛɛ yɛɛ mena nombia ŋenaŋ. 21Mena dↄↄ ma te naa nyi dukum doŋ keŋ ne diina me dↄↄ. Nawolo nyi akpaa mɛɛ gyae nyi maa yɛɛ kolo kpaakpaa na, ka te ka lee kolo kum dↄↄ. 22Maŋ gbagba me konↄↄ man na, nafↄ mɛɛ gyae nideli nyi maa di Wurubuarɛ mmaraase ŋan dↄↄ. 23Mↄna mɛɛ naa nyi mmaraa wↄle daale keŋ kↄↄ ne kyaa na Wurubuarɛ mmaraase ŋan ya nɛ ne yoo na dↄŋa me man. Mena mmaraa kum kei te yeli nombiakumɛɛ ta gyoo me man di ma nyee pou. 24Me nombia dana waraŋase nideli. Amↄte ne gyae la waa lese maŋ lee mena dinↄↄ kum keŋ doo me man, te ke dana maŋ kee gyu yeŋ man nɛ man? 25Mɛɛ fa Wurubuarɛ karaŋ, nawolo nyi ŋon ne gyae la waa ta de Gbeŋgyoo Yesu Kristo dↄↄ na waa lɛɛ maŋ lee mena dinↄↄ kei man. Nombia atuŋaŋ maŋ yaa. Maŋ gbagba me konↄↄ man na mɛɛ gyae nyi maa di Wurubuarɛ mmaraase ŋan dↄↄ, mↄna dinↄↄ kum keŋ doo me man nɛ dↄↄ me ta bese dukum gbeŋi.

will be added

X\