1 Akpaa nnɛ te nombia kɛŋa doo na, na sena yaa dɛɛ yako baa? Kaboena nyi dɛɛ dↄↄ da dukum keyɛɛ man na Wurubuarɛ bɛrɛɛ keŋ ka bo yaa? 2 Korakora, be kↄŋ mena ya. Nawolo nyi da te wↄŋ da wose lee dukum keyɛɛ man. Mena dↄↄ tekaboena nyi dɛɛ bese gyu ke kyaa da dukum keyɛɛ man bela ya. 3 Debaŋ keŋ bↄↄ sↄ daa Wurubuarɛ loŋ te daa na Yesu Kristo be yɛɛ dokoloŋ nɛ, na ɛ ba gyeŋ nyi da te yɛɛ dokoloŋ baa lee ↄ yeŋ keŋ man yee? 4 Ba ke sↄ daa Wurubuarɛ loŋ keŋ nɛ, na yɛɛ yaa ŋgba daa na Yesu Kristo yeŋa la te be wuu daa na e nɛ, nawolo nyi daa na e te yɛɛ dokoloŋ. Mena dↄↄ ŋgba mena keŋ de kya Wurubuarɛ ba mo ↄ gyoorobiiri doŋ keŋ gyuusu Yesu Kristo lee woya man fa e nyeedoŋ nɛ, mena te kaboena nyi daa mↄ dɛɛ kyaa dinↄↄ wↄle man. 5 Nawolo nyi akpaa daa na Yesu te yɛɛ dokoloŋ lee ↄ yeŋ man na, kenaŋ na Wurubuarɛ waa gyuusu daa mↄ lee yeŋ man ŋgba mena keŋ ↄ be gyuusu Yesu lee yeŋ man nɛ. 6 Da gyeŋ nyi debaŋ keŋ bↄↄ gyↄ e mataa ↄpaŋdaŋ keŋ dↄↄ te ↄ ba yem nɛ, na ŋon Yesu na de dinↄↄ bene keŋ yaa be gyↄↄwↄ ko nɛ. Kei te yeli doŋ keŋ nombiakumɛɛ dana de dↄↄ nɛ nↄↄ ta yem, keŋ de ta tekaa yɛɛ nombiakumɛɛ gbeŋawↄ bela ya. 7 Nawolo nyi akpaa ŋolo da yem na, ↄ te tira ↄ wose lee nombiakumɛɛ keyɛɛ man. 8 Nyi akpaa daa na Kristo ta yem na, kenaŋ na dɛɛ lɛɛ di nyi daa na e mↄ dɛɛ kyaa nyeedoŋ man. 9 Da gyeŋ nyi Wurubuarɛ gyuusuna Yesu Kristo lee yeŋ man, te ↄ be gyae waa yeŋ bela ya. Nawolo nyi yeŋ ba tekaa dana doŋ ↄ dↄↄ bela ya. 10 Yeŋ keŋ ↄ ba yem nɛ, ↄ yeŋae karatetee dokoloŋ na waa ko nombiakumɛɛ nↄↄ. Mena dↄↄ nɛnɛɛ keŋ ↄ kyaa nyeedoŋ man nɛ, ↄ kyae fa Wurubuarɛ. 11 Mena ke mↄ te kaboena nyi yaa kɛɛ ɛ wose nyi ɛmɛɛ mↄ yeŋae na ɛ ka ko nombiakumɛɛ nↄↄ, te nɛnɛɛ ɛ kyae fa Wurubuarɛ. Nawolo nyi ɛmɛɛ na Kristo Yesu te yɛɛ dokoloŋ. 12 Mena dↄↄ ɛ na tekaa yela nombiakumɛɛ kedi doŋ ɛ wosenaane keŋ gyae ka yeŋ nɛ dↄↄ, na ɛ ke sila abↄↄ kumɛɛ ŋan ɛmɛɛ gbagba ne gyae tɛɛle kei dↄↄ nɛ ya. 13 Ɛ na mo ɛ wosenaane yenaŋ daale fa nombiakumɛɛ keyɛɛ ya. Mↄna ɛ mo ɛ wose fa Wurubuarɛ ŋgba balaŋ baŋ bↄↄ lese wↄ lee yeŋ man kↄŋ nyeedoŋ man nɛ. Ɛ mo ɛ wose pou fa Wurubuarɛ na waa mo ŋon yɛɛ kpene keŋ dei te ke doo na ke gbɛɛ nɛ. 14 Tekaboena nyi nombiakumɛɛ dee di doŋ ɛ dↄↄ bela ya, nawolo nyi ɛ ba tekaa ɛ doo Mosesi mmaraase ŋan tɛɛ ya, mↄna nɛnɛɛ dↄↄ ɛ dↄŋ bo Wurubuarɛ bɛrɛɛ keŋ man. 15 Mena dↄↄ nɛnɛɛ keŋ de dↄŋ Wurubuarɛ bɛrɛɛ keŋ man, te dↄↄ tekaa doo mmaraase ŋan tɛɛ ya nɛ, na kaboena nyi dɛɛ gyakaa nombiakumɛɛ keyɛɛ dↄↄ bela yaa? Korakora, be doo mena ya. 16 Ɛ ba gyeŋ nyi akpaa n mo n wose fa ŋolo te n na som e te n ne yɛɛ ↄ kegyaebii na, na n ta bese ↄ gbeŋi yee? Kei na wolo baa nyi akpaa n yeli dukum da mo neŋ yɛɛ ↄ gbeŋi na, yeŋ ne sila la. Mↄna nyi n mo n wose fa Wurubuarɛ te n ne tei ↄ dei ŋgba ↄ gbeŋi nɛ, waa yela n nombia ka tenee ↄ siaman. 17 Mↄna dɛɛ do Wurubuarɛ nↄↄ nawolo nyi debaŋ daale na, nafↄ ɛ yɛɛ nombiakumɛɛ gbeŋawↄ. Te nɛnɛɛ dↄↄ ɛ ta mo ɛ konↄↄ pou ɛ silana Wurubuarɛ gbɛɛneŋ ŋan bↄↄ wola ŋon nɛ. 18 Wurubuarɛ te yeli ɛ ta lese ɛ wose lee nombiakumɛɛ keyɛɛ man, te ɛ kaa bese Wurubuarɛ gbeŋa na ɛ ke tale yɛɛ nombia ŋan tenɛɛ ↄ siaman. 19 Ɛ nombia man kenyii dana doŋ kyomii, mena dↄↄ te ma moo nombii kei mɛɛ maa na deniwalaŋ kekyaabii man nɛ. Gyaŋgba keŋ na ɛ moo ɛ wose pou besena gbeŋa fa nombia nkaraŋkaraŋ na nombiakumɛɛ keyɛɛ. Mena mↄ te kaboena nyi nɛnɛɛ yaa mo ɛ wose bese Wurubuarɛ gbeŋa, na ɛ ke tale yɛɛ nombia ŋan ŋe doo na ŋe gbɛɛ na ɛ ka bese balaŋ baŋ ayimɛɛ be doo ba wose man ya kelii ↄto. 20 Debaŋ keŋ ɛ yɛɛ nombiakumɛɛ gbeŋawↄ nɛ, na ɛ be famenɛ na abↄↄ ŋan ŋa tenɛɛ Wurubuarɛ siaman nɛ keyɛɛ ya. 21 Debaŋ keŋ ɛ be yɛɛ nombiakumɛɛ ŋan gyɛŋ kei ŋe dana ŋon desɛŋ nɛ, woŋ tↄnↄↄ te ɛ nyiŋawↄ lee ŋe man? Mena nombia ŋenaŋ tↄnↄↄ yɛna yeŋ. 22 Mↄna nɛnɛɛ Wurubuarɛ te yeli ɛ ta lese ɛ wose lee nombiakumɛɛ keyɛɛ man te ɛ bese ↄ gbeŋa. Kpene keŋ ɛ ke nyiŋ lee ke man yɛna nyi, ɛ ke kyaa dinↄↄ kpaakpaate keŋ ayimɛɛ be doo ke man ya nɛ man na ɛ ke nyiŋ nyeedoŋ kekpaa. 23 Nawolo nyi kpene keŋ n ke nyiŋ lee nombiakumɛɛ keyɛɛ man yɛna yeŋ, mↄna walaŋ ŋon ↄ lɛɛ de Gbeŋgyoo Yesu Kristo di na, kpene keŋ Wurubuarɛ waa fa yɛna nyeedoŋ kekpaakekpaa keŋ.
