Romantena 2

1Nyaŋ walaŋ ŋon n ne bu n dↄↄ fↄↄ nɛ, n be dana daale n ke yako ya nawolo nyi nyaŋ mↄ n ne yɛɛ nombiakumɛɛ ŋan ↄtenate ne yɛɛ nɛ. Mena dↄↄ nyi akpaa n bu ŋolo fↄↄ na, nyaŋ gbagba n wose yaa n buu fↄↄ nɛ. 2Da gyeŋ nyi Wurubuarɛ de di mena balaŋ kɛwↄ nombia te ↄ bu wↄ fↄↄ na, na ke doo na ke gbɛɛ. 3Mena dↄↄ akpaa nyaŋ deniwalaŋ n bu ŋolo fↄↄ lee nombiakumɛɛ ŋan nyaŋ gbagba mↄ ne yɛɛ nɛ dↄↄ nɛ, wulaa gyeŋ nyi Wurubuarɛ mↄ waa bu neŋ fↄↄ. N be gyae n ke tale lee Wurubuarɛ nyiŋmaa man ya. 4Wurubuarɛ ta lese ↄ wↄe na ↄ konↄↄ keŋ ↄ dana nɛ wola neŋ kekpaa, mↄna n ta mo ŋa yɛɛ kolo ya. Yaa n ba gyeŋ nyi Wurubuarɛ lese ↄ wↄe baa wola neŋ na ke yela n ke kyɛɛkee nya agyueŋ lee n gbɛɛneŋ kumɛɛ man, na n ke kↄŋ ↄ gyaŋ yee? 5Mↄna n dana konↄↄyuŋ na deŋele doŋ. Mena dↄↄ n deŋele kewↄŋ keŋ ne wuku kpu, te ke doo kɛɛ daa neŋ kelii wee keŋ Wurubuarɛ waa mo baŋ di balaŋ nombia nɛ. Mena wee kenaŋ te waa wↄŋ n deŋele. Wee kenaŋ te balaŋ baa naa mena keŋ Wurubuarɛ ne di ↄ nombia na ke gbɛɛ nɛ. 6Nawolo nyi Wurubuarɛ waa tↄ walaŋ kamasɛ kom ŋgba mena keŋ ↄtenate be yɛɛ nɛ. 7Baale ta mo be loo gyakaa nyi baa nyiŋ gyoorobiiri na yele na nyeedoŋ keŋ ka dokoso be kyaa ya nɛ. Mena dↄↄ bee nyiŋ konↄↄ te bɛɛ yɛɛ nombia kpaakpaa weeya pou man. Baŋ te Wurubuarɛ waa fa nyeedoŋ kekpaakekpaa keŋ. 8Mↄna balaŋ baŋ lee sibii dↄↄ te bↄↄ bɛɛ anokoare keŋ gyu ke sila nombiakumɛɛ nɛ, Wurubuarɛ baŋ kum na ↄ deŋele kewↄŋ keŋ gyae ke kↄŋ be dↄↄ na baa naa diyem nideli. 9Wurubuarɛ waa yela kaale na kayeyɛɛ ke kↄŋ balaŋ baŋ pou bɛɛ yɛɛ nombiakumɛɛ nɛ dↄↄ. Ke gyae ke fiasɛɛ bo lee Gyudatena dↄↄ, pɛna ke kↄŋ balaŋ baŋ ba te yɛɛ Gyudatenawↄ ya nɛ mↄ dↄↄ. 10Mↄna Wurubuarɛ waa yela balaŋ baŋ bɛɛ yɛɛ nombia kpaakpaa nɛ ke nyiŋ gyoorobiiri na yele na wosefɛɛreŋ. Keŋ mↄ gyae ke fiasɛɛ bo lee Gyudatena dↄↄ, pɛna ke kↄŋ balaŋ baŋ ba te yɛɛ Gyudatenawↄ ya nɛ mↄ dↄↄ. 11Nawolo nyi Wurubuarɛ ne di ↄ nombia na ke gbɛɛ keŋ ↄ bɛɛ kɛɛ walaŋ siaman ya. 12Balaŋ baŋ ba te yɛɛ Gyudatenawↄ ya nɛ, bↄↄ gyeŋ Mosesi mmaraase ŋan ya. Mena dↄↄ akpaa be yɛɛ nombiakumɛɛ na, na Mosesi mmaraase ŋenaŋ te Wurubuarɛ waa mo di be nombia ya. Mↄna deŋele kewↄŋ keŋ baa nyiŋ lee be nombiakumɛɛ keyɛɛ dↄↄ nɛ yɛna yeŋ kekpaa keŋ. Te Gyudatena dↄↄ akpaa be yɛɛ nombiakumɛɛ na, Mosesi mmaraase ŋan te Wurubuarɛ waa mo di be nombia. Nawolo nyi baŋ dↄↄ ba gyeŋ mmaraase ŋenaŋ. 13Nawolo nyi na balaŋ baŋ ba gyeŋ Mosesi mmaraase ŋan nɛ gbɛɛneŋ tenɛɛ la Wurubuarɛ siaman ya. Mↄna balaŋ baŋ bee di mmaraase ŋenaŋ dↄↄ nɛ, baŋ gbɛɛneŋ tenɛɛ la Wurubuarɛ siaman. 14Balaŋ baŋ ba te yɛɛ Gyudatenawↄ ya nɛ, bↄↄ gyeŋ Mosesi mmaraase ŋan ya. Mↄna akpaa nyi baŋ gbagba konↄↄ man nombia na wola wↄ nyi baa yɛɛ kpene keŋ mmaraase ŋan na wolo nɛ, kenaŋ nawolo baa nyi mmaraase ŋan doo be konↄↄse man. 15Be nombia ŋan bɛɛ yɛɛ nɛ nawolo baa nyi ba gyeŋ nombia ŋan Mosesi mmaraase ŋan na wolo nyi baa yɛɛ nɛ be konↄↄse man. Mena keŋ be yɛɛ kolo kum yaa kolo kpaakpaate te be konↄↄ man nombia ne yɛɛ wↄ nɛ mↄ ne di adansɛɛ kpu. Nawolo nyi ŋaale man na ne yɛɛ wↄ nyi mena nombia ayɛɛsa kɛŋa be dei ya, mena dↄↄ be wↄe bɛɛ fɛɛ wↄ ya. Debaŋ ŋaale man mↄ na be konↄↄ man nombia na wola wↄ nyi be nombia ayɛɛsa kɛŋa doo na ke gbɛɛ. Kenaŋ na be wↄe ne fɛɛ wↄ. 16Mena yaa Kristo nombia kpaakpaa ŋan me dↄŋɛɛ mee kolosi nɛ na wolo. Nombia ŋenaŋ na wolo baa nyiaa, wee daale Wurubuarɛ waa ta Yesu Kristo dↄↄ di balaŋ nombia ŋan bɛɛ yɛɛ weese nɛ na waa bu wↄ fↄↄ. 17Nɛnɛɛ nyaŋ kpa n yɛɛ Gyuda baale e te n na mo n wose lↄ Mosesi mmaraase ŋan dↄↄ, mena dↄↄ n ne gyina n wose adido nyi n gyeŋ Wurubuarɛ nideli. 18Nyaŋ kpa n gyeŋ Wurubuarɛ kegyaebii nawolo nyi Mosesi mmaraase ŋan na wola na neŋ nombia ŋan ŋe doo na ŋe gbɛɛ nɛ. 19Nyaŋ kpa nyaŋ dↄŋɛɛ la siayɛlɛɛsatena siaman, te n kpa nyaŋ yɛna kanea fa balaŋ baŋ be doo ditiŋtɛɛ man nɛ. 20Nyaŋ kpa nyaŋ yɛna walaŋ ŋon n na wola ayiŋtena na balaŋ baŋ bↄↄ gyeŋ daale ya nɛ nombia. N ne gyↄ n konↄↄ nyi lee Mosesi mmaraase ŋan dↄↄ n gyeŋ kpene kamasɛ na nombia ŋan pou ŋe doo na ŋe gbɛɛ nɛ. 21Nyaŋ ŋon n kpa n na wola balaŋ nombia nɛ, weera dↄↄ te n be tale wola n wose ya? N ne yako balaŋ nyi be na ŋmɛɛle ya mↄna nyaŋ gbagba ne ŋmɛɛle. 22N ne yako balaŋ nyi be na lee be wɛɛla yaa be baala wↄle ya, mↄna nyaŋ gbagba ne yɛɛ mena. Nyaŋ kpa balaŋ na som bɛɛneŋ ya, mↄna nyaŋ dↄŋ bɛɛneŋ denɛɛ man n ne ŋmɛɛle. 23N na wola n wose lee Mosesi mmaraase ŋan dↄↄ, mↄna n bee di ŋe dↄↄ ya. Lee mena dↄↄ n na do Wurubuarɛ desɛŋ. 24Wurubuarɛ nombia aŋmaraseŋ see ŋan ne yako nyiaa, lee ɛmɛɛ Gyudatena nombia ayɛɛsa dↄↄ balaŋ baŋ ba te yɛɛ Gyudatenawↄ ya nɛ ne kolosi mmusuo nombia tia Wurubuarɛ. 25Akpaa n ne di Mosesi mmaraase ŋan dↄↄ nɛ, kenaŋ na n baala wose kekara keŋ dana tↄnↄↄ. Mↄna akpaa n bee di Mosesi mmaraase ŋan dↄↄ ya nɛ, kenaŋ na n baala wose kekara keŋ yɛɛ yakaa. Kenaŋ na yɛɛ yaa ŋgba n te kara n baala wose gba ya nɛ. 26Nyi akpaa ŋolo te kara ↄ baala wose ya te ↄ ne di Mosesi mmaraase ŋan dↄↄ nɛ, Wurubuarɛ siaman na yɛɛ yaa ŋgba ↄtenate kara ↄ baala wose baa nɛ. 27Nyaŋ Gyuda baale, n gyeŋ mmaraase ŋan nawolo nyi be ŋmarase ŋa bo see neŋ te be kara n baala wose mↄ, mↄna n bee di ŋe dↄↄ ya. Mena dↄↄ walaŋ ŋon ↄ te kara ↄ baala wose ya te ↄ ne di mmaraase ŋan dↄↄ nɛ, waa bu neŋ fↄↄ. 28Nawolo nyi te yɛɛ nyi keŋ ŋolo ne yɛɛ Gyudatena abↄↄ ayɛɛsa dↄↄ te ↄtenate yɛɛ Gyuda baale e ya. Te na baala wose mↄ kekara kaageŋ na wola la nyi ŋolo yɛɛ Gyuda baale gbagba e ya. 29Akpaa nyi ŋolo yɛɛ Gyuda baale gbagba e na, ↄ konↄↄ man na wola la. Te baala wose kekara gbagba mↄ yɛɛ konↄↄ man nombia ŋa. Wurubuarɛ feliŋ ŋon ne kyɛɛkee na ↄtenate konↄↄ. Ka te yɛɛ nyi mmaraase ŋan bↄↄ ŋmarase see nɛ dↄↄ kedi ya. Mena walaŋ ŋonaŋ nɛ, Wurubuarɛ na lese na ↄ yele. Te yɛɛ denibalaŋ ya.

will be added

X\