Romantena 16

1Mɛɛ lese de deesi Kristo alo Foobe maa wola ŋon nyi ↄ yɛɛ walaŋ ŋon ↄ ne yee Wurubuarɛ nideli. Foobe kei yɛɛ kegyia e Kristotena baŋ be kyaa Kenkiria donↄↄ man nɛ man. 2Nyi ↄ kↄŋ ɛ gyaŋ na ɛ lɛɛ e lee de Gbeŋgyoo Yesu yele man na ɛ ke kyↄ e lee gbɛɛ kamasɛ man, ŋgba mena keŋ kaboena nyi Kristotena baa kyↄ dↄŋa nɛ. Nawolo nyi ŋon gbagba mↄ te kyↄ balaŋ burum, te ↄ te kyↄ maŋ gbagba mↄ. 3Ɛ do Pirisila na Akuila nↄↄ fa maŋ, nawolo nyi be yɛɛ me tebiawↄ te daa na wↄ pou ne yɛɛ na Kristo Yesu tom keŋ. 4Ba moo ba wose fa yeŋ lee me dↄↄ. Mena dↄↄ mɛɛ do wↄ nↄↄ nideli. Na maŋ maageŋ na do na wↄ nↄↄ ya, mↄna Kristotena baŋ ba te yɛɛ Gyudatenawↄ ya nɛ mↄ na do wↄ nↄↄ. 5Ɛ do Kristotena baŋ bɛɛ gyaŋee ba dekpaŋalaŋ man nɛ nↄↄ fa maŋ. Ɛ do me gyoo gyaagyi Epanetuse nↄↄ fa maŋ. Ŋon yɛna walaŋ ŋon ↄ be taŋgbɛɛ lɛɛ Kristo di Esia tɛɛle man. 6Ɛ do Mɛɛre ŋon ↄ be naa diyem nideli ɛ dↄↄ nɛ nↄↄ fa maŋ. 7Ɛ do Andoronikuse na Gyuniase nↄↄ fa maŋ. Be yɛɛ Gyudatenawↄ ŋgba maŋ nɛ, te daa na wↄ pou te be kyaŋawↄ tↄ deni see. Be yɛɛ balaŋ baŋ Kristo kpilala baŋ pou ne bu wↄ nideli, te be taŋgbɛɛ maŋ lɛɛ Kristo di gba. 8Ɛ do Ampeliatuse nↄↄ fa maŋ. Ↄ yɛɛ me gyoo gyaagyi e lee Kristo dↄↄ. 9Ɛ do de gyoo Ubanuse ŋon daa na e pou ne yɛɛ tom Kristo man nɛ, na de dↄↄ kpaakpaa Setakise nↄↄ fa maŋ. 10Ɛ do Apelese nↄↄ fa maŋ. Ↄ ta lese wola nideli nyi ↄ seŋɛɛ Kristo nombia ŋan man nideli. Ɛ do balaŋ baŋ pou bↄↄ lee Aristobuluse dekpaŋalaŋ man nɛ nↄↄ fa maŋ. 11Ɛ do Herodiↄn nↄↄ fa maŋ. Ŋon mↄ yɛɛ Gyuda baale e ŋgba maŋ nɛ. Ɛ do Kristotena baŋ be kyaa Nasisuse dekpaŋalaŋ man nɛ nↄↄ fa maŋ. 12Ɛ do Tirifena na Tirifosa nↄↄ fa maŋ. Be yɛɛ ala baŋ bↄↄ kyaŋ ba wose yɛɛ de Gbeŋgyoo Kristo tom keŋ. Ɛ do me gyoo gyaagyi Pɛɛsi nↄↄ fa maŋ. Ŋon mↄ yɛɛ alo ŋon ↄ be yɛɛ tom dinaa fa de Gbeŋgyoo. 13Ɛ do Rufuse na ↄ naa ŋon ↄ ba mo maŋ yɛɛ ↄ bu nɛ nↄↄ fa maŋ. Rufuse yɛɛ de Gbeŋgyoo Kristo tobaale ŋon ↄ yele ba lee nideli. 14Ɛ do Asinkirituse na Felegↄn na Hemise na Patorobase na Hɛmase na Kristotena baŋ pou be kyaa kpu na wↄ nɛ nↄↄ fa maŋ. 15Ɛ do Filologuse na Gyulia na Neruse na ↄ deesi na Olimpase na Kristotena baŋ pou be kyaa kpu na wↄ nɛ nↄↄ fa maŋ. 16Ɛ pukaa dↄŋa, na ɛ ka do dↄŋa nↄↄ na gyoŋ. Kristotena akpii akpii ŋan pou na do ŋon nↄↄ. 17Me tebia, mɛɛ waase ŋon nyi ɛ kɛɛ nideli na ɛ ka gyene balaŋ baŋ be kpuɛ na ŋon te bɛɛ wↄlɛɛ ya nsana nɛ. Mena balaŋ benaŋ ne yeli baale ne yale ba kelɛɛdi man, te be nombia ŋan bɛɛ wolo nɛ mↄ yɛɛ kpoo lee ŋan mↄↄ wola ŋon nɛ man. Ɛ lese ɛ wose lee mena balaŋ benaŋ man. 18Nawolo nyi mena balaŋ kɛwↄ bɛɛ som de Gbeŋgyoo Kristo ya, mↄna bɛɛ gyae baŋ gbagba deeli bo. Be dↄŋɛɛ bɛɛ mo nↄↄman yeliŋ na nↄↄwoya gyoŋ nyiŋan mo beo balaŋ baŋ bↄↄ gyeŋ daale ya nɛ. 19Ɛmɛɛ dↄↄ balaŋ pou te nyii mena keŋ ɛ ba mo ɛ wose fa Kristo nɛ, mena dↄↄ dana maŋ gyoŋ nideli. Mↄna mɛɛ gyae ɛ ka gyeŋ nyansa na ɛ ka gyeŋ nombia ŋan ŋe dei, na ɛ ka lese ɛ wose lee dukum keyɛɛ man. 20Be gyae ke kyare ya Wurubuarɛ ŋon ↄ yɛɛ wosefɛɛreŋ pou Gbeŋgyoo e nɛ, waa yela ɛ ke sakatee ↄbↄnsam ɛ nawↄↄ tɛɛ. De Gbeŋgyoo Yesu waa mo ↄ bɛrɛɛ boele ŋon. 21Me dↄↄ Timoti ŋon daa na e ne yɛɛ tom dokoloŋ nɛ na do ŋon nↄↄ. Mena ke mↄ te Lusiuse na Gyasↄn na Sosipata baŋ be yɛɛ me tebia Gyudatenawↄ nɛ mↄ na do ŋon nↄↄ. 22Maŋ Tɛtiyuse ŋon mↄↄ ŋmarase tↄne kei fa Pↄↄl nɛ, mↄ na do ŋon nↄↄ lee de Gbeŋgyoo Kristo yele man. 23Me denite Gayose mↄ na do ŋon nↄↄ. Ↄ dekpaŋalaŋ man te daa Kristotena baŋ pou de kyaa kɛbo nɛ ne gyaŋee. Erasituse ŋon ↄ ne kɛɛ donↄↄ kei kↄba dↄↄ nɛ, na de dↄↄ Kuatuse mↄ na do ŋon nↄↄ. 24De Gbeŋgyoo Yesu Kristo waa mo ↄ bɛrɛɛ boele ɛ popou na waa seŋ ɛ wↄle. Amɛn. 25Ɛ yela dɛɛ lese Wurubuarɛ yele. Ŋon ne tale la yela ɛ ne tale seŋ keŋkeŋ ɛ kelɛɛdi man, lee Yesu Kristo nyeedoŋ nombia ŋan mↄↄ kolosi fa ŋon nɛ dↄↄ. Nafↄ anokoare nombii kei yɛɛ nombii aweeseŋ ke, mↄna nɛnɛɛ dↄↄ Wurubuarɛ te yeli de ta gyeŋ ke. 26Nɛnɛɛ dↄↄ nombii kei ta tekaa yɛɛ nombii aweeseŋ ya. Wurubuarɛ te yeli wa akpeŋkpeŋgyↄↄra te ŋmarase anokoare nombii kei see. Te Wurubuarɛ ŋon mↄ ↄ kyaa kekpaakekpaa nɛ te yeli ba te kolosi nombii kei fa tɛɛle kei dↄↄ balaŋ pou, na baa lɛɛ e di na baa ta ↄ gbɛɛneŋ dↄↄ. 27Ɛ yela dɛɛ ta de Gbeŋgyoo Yesu Kristo dↄↄ na dɛɛ lese Wurubuarɛ yele kekpaakekpaa. Nawolo nyi ŋon waageŋ kooŋ yɛna nyansa pou nyee. Amɛn.

will be added

X\