Romantena 14

1Ɛ lɛɛ walaŋ ŋon ↄ be dana doŋ ↄ Kristo kelɛɛdi man ya nɛ do ɛ man. Mↄna ɛ na yeli ɛ konↄↄ man nombia ŋan dↄↄ walaŋ kamasɛ seŋɛɛ nɛ, ka mo kewↄŋee kↄŋ ya nsana ya. 2Ŋolo kyaa na lee ↄ Kristo kelɛɛdi dↄↄ ↄ ne lɛɛ di nyi waa tale di kpene kamasɛ. Ŋolo mↄ kelɛɛdi be dana doŋ ya mena dↄↄ ŋon ne di faareŋ weenɛɛ kaageŋ bo. 3Gbɛɛ be doo nyi walaŋ ŋon ↄ ne di kpene kamasɛ nɛ, waa kɛɛ ↄ wose nyi ↄ dei kela walaŋ ŋon ↄ ne di faareŋ weenɛɛ nɛ ya. Mena mↄ te walaŋ ŋon ↄ ne di faareŋ weenɛɛ nɛ, na bu walaŋ ŋon ↄ ne di kpene kamasɛ nɛ fↄↄ ya. Nawolo nyi Wurubuarɛ ne lɛɛ be popou do. 4Nyaŋ yɛna amↄte keŋ n ke tale bu ŋolo tobaale yaa wa alebu fↄↄ? Walaŋ ŋonaŋ ↄ gbeŋgyoo waageŋ ne gyae la waa tale naa nyi ↄ seŋɛɛ nideli yaa ↄ ba seŋɛɛ nideli ya. Te waa tale seŋ nideli nawolo nyi de Gbeŋgyoo Wurubuarɛ dana doŋ keŋ waa tale yela waa seŋ nideli. 5Ŋolo waa tale yako nyi wee daale kela weeya akaŋ ŋan, te ŋolo mↄ gyaŋ na weeya ŋan pou yɛɛ kyɛɛkyɛɛ. Nombia kɛŋa man na, kaboena nyi walaŋ kamasɛ waa lɛɛ ↄ wui keŋ dↄↄ ↄ seŋɛɛ nɛ do nideli. 6Nyi akpaa ŋolo da lese wee daale see nyi keŋ kela na weeya akaŋ ŋan na, ↄ ne yɛɛ mena bo na waa mo lese Wurubuarɛ yele. Te akpaa ŋolo mↄ ne di kpene kamasɛ na, ↄ ne di ke bo na waa mo lese Wurubuarɛ yele. Nawolo nyi ↄ ne fane fa Wurubuarɛ karaŋ lee weenɛɛ ŋenaŋ dↄↄ pɛte ↄ ne dii. Walaŋ ŋon mↄ ↄ ne di faareŋ kaageŋ bo nɛ, ŋon mↄ ne di ŋa bo na waa mo lese Wurubuarɛ yele. Nawolo nyi ŋon mↄ ne fane fa Wurubuarɛ karaŋ pɛte ↄ ne dii. 7Da ke kyaa kei, yeŋ man o nyeedoŋ man o, ŋolo be kyaa fa ↄ wose ya. 8Nyi akpaa de kyaa na, de kyae fa de Gbeŋgyoo Yesu Kristo. Mena mↄ te akpaa da yem na, da yeŋae fa de Gbeŋgyoo Yesu Kristo. Mena dↄↄ nyi de kyae na de sia o, da yeŋae o, de yɛɛ de Gbeŋgyoo Yesu Kristo wui. 9Kei dↄↄ te Kristo yeŋawↄ te ↄ foŋawↄ lee yeŋ man. Na ke yela waa nyiŋ bese balaŋ baŋ be kyaa na be sia, na baŋ bↄↄ yekee nɛ pou Gbeŋgyoo. 10Mena dↄↄ tekaboena nyi ŋolo waa bu ↄ dↄↄ fↄↄ yaa waa kɛɛ ↄ wose nyi ↄ dei kela ↄ dↄↄ ya. Nawolo nyi de popou dɛɛ kaa seŋ Wurubuarɛ siaman na waa di de nombia. 11Nawolo nyi Wurubuarɛ nombia aŋmaraseŋ see ŋan ne yako nyiaa, "De Gbeŋgyoo kpa, 'Maŋ nyiŋa me kyaa nɛ, walaŋ kamasɛ waa kaa buŋ me siaman na waa toro yako nyi maŋ yɛna Wurubuarɛ.' " 12Lee mena dↄↄ de man walaŋ kamasɛ waa kaa tↄlɛɛ ↄ nↄↄwoya fa Wurubuarɛ. 13Mena dↄↄ ɛ yela dee tina dↄŋa fↄↄ kebu yela. Mↄna kaboena bo nyi dɛɛ kɛɛ nyi dↄↄ yɛɛ kolo na ke yela ŋolo ke yɛɛ dukum ya. 14Me ka bese Kristo baale kei dↄↄ nɛ, ma te naa nyi weenɛɛ kamasɛ be kyaa keŋ ke yɛɛ kolo kum ke ya. Mↄna akpaa Kristo baale ŋolo de lɛɛ weenɛɛ ŋaale do nyi ke yɛɛ kolo anekↄlaŋ ke na, na ↄtenate gyaŋ te ke yɛɛ kolo anekↄlaŋ. 15Nyi akpaa n weenɛɛ ŋaale kedi de yeli n dↄↄ ŋolo wose te fɛɛ e ya nɛ, kenaŋ na n nombia ayɛɛsa bɛɛ wola balaŋ kegyae ya. Na yeli n weenɛɛ ŋaale kedi ke yela n dↄↄ ŋolo ke yala ↄ kelɛɛdi man ya. Nawolo nyi ŋon mↄ dↄↄ te Kristo yeŋawↄ. 16Mena dↄↄ na yeli kpene keŋ nyaŋ ne kɛɛ ke nyi ke dei nɛ, ka bese kolo kum balaŋ siaman ya. 17Nawolo nyi Wurubuarɛ gyoori keŋ nɛ, ka te yɛɛ kedi na kenyↄↄ nombia ŋaageŋ ya. Mↄna ke yɛɛ keŋ nyi walaŋ waa yɛɛ kpene keŋ tenɛɛ Wurubuarɛ siaman, na waa yɛɛ kpene keŋ gyae ka mo wosefɛɛreŋ kↄŋ ŋon na ↄ dↄↄ nsana, na dee di gyoŋ keŋ Wurubuarɛ feliŋ ŋon ne fa daa nɛ. 18Walaŋ kamasɛ ŋon ↄ som Kristo lee mena gbɛɛ kei man nɛ, ↄ nombia na gyoo Wurubuarɛ sia. Mena walaŋ ŋonaŋ mↄ te balaŋ na lese ↄ yele. 19Mena dↄↄ debaŋ kamasɛ na ɛ yela dɛɛ mo de loo gyakaa abↄↄ ŋan gyae ka mo wosefɛɛreŋ kↄŋ, te ŋɛɛ do daa doŋ da kelɛɛdi man nɛ dↄↄ. 20Na yeli weenɛɛ ŋan nyaŋ ke di nɛ, ke wↄlɛɛ Wurubuarɛ tom ya. Gbɛɛ doo nyi dɛɛ tale di weenɛɛ kamasɛ, mↄna akpaa weenɛɛ ŋan nyaŋ kedi nɛ ne gyae la ke yela ŋolo ke yala ↄ kelɛɛdi man na, kenaŋ na na di ŋa korakora ya. 21Nawolo nyi akpaa ŋolo de bɛɛ naane ketao, yaa ↄ bɛɛ soloŋ kenyↄↄ yaa ↄ bɛɛ kpene kamasɛ keŋ gyae ke yela ↄ dↄↄ ŋolo ke yala ↄ kelɛɛdi man na, keŋ gba dei la kela. 22Mena dↄↄ kpene kamasɛ keŋ n ne lɛɛ di lee mena nombia kɛŋa man na, yela ke doo ɛmɛɛ na n Wurubuarɛ nsana. Walaŋ ŋon ↄ konↄↄ man nombia bee bu e fↄↄ lee abↄↄ ŋan ŋon gbagba be lɛɛ ŋa do nɛ man ya na, ŋon na nyeebam. 23Mↄna akpaa ŋolo de di kolo keŋ ↄ konↄↄ man nombia ta tenee e ya nɛ, kenaŋ na Wurubuarɛ waa bu e fↄↄ. Nawolo nyi ↄtenate te lɛɛ Wurubuarɛ di lee kpene kenaŋ keyɛɛ man ya. Te kpene kamasɛ keŋ ŋolo te lɛɛ Wurubuarɛ di lee ka keyɛɛ man ya nɛ, na ke yɛɛ dukum ke.

will be added

X\