Romantena 13

1Kaboena nyi walaŋ kamasɛ waa yↄkↄse ↄ wose fa tɛɛle kei dↄↄ kegyiise baŋ bee di de dↄↄ nɛ, nawolo nyi kegyia ŋolo be kyaa keŋ na Wurubuarɛ see na e ya. Kegyiise baŋ be kyaa nɛ pou, Wurubuarɛ see na wↄ. 2Mena dↄↄ akpaa ŋolo da koro seŋ tia kegyiise benaŋ na, ↄ ta seŋ tia Wurubuarɛ baa. Te walaŋ ŋon waa yɛɛ mena na, Wurubuarɛ waa wↄŋ ↄ deŋele. 3Balaŋ baŋ bɛɛ yɛɛ nombia kpaakpaa nɛ, bↄↄ ne yee kegyiise ya. Nombiakumɛɛyɛɛra ne yee na kegyiise benaŋ. Akpaa n bɛɛ gyae nyi n ke yee tɛɛle kei dↄↄ kegyiise ya na, kenaŋ na yɛɛ kpene keŋ dei na baa nyiŋ kɛlɛɛ neŋ. 4Nawolo nyi kegyia ŋon bↄↄ lese e see kolo nↄↄman nɛ, ↄ yɛɛ Wurubuarɛ tobaale e keŋ ↄ ne yɛɛ ↄ tom lee nyaŋ gbagba n deeli dↄↄ. Mↄna akpaa n yɛɛ kolo kum na yela gyakoloŋ ke kyaŋ neŋ, nawolo nyi ↄ doŋ keŋ ↄ dana nɛ te yɛɛ yakaa ya. Ↄ yɛɛ Wurubuarɛ tobaale e ŋon Wurubuarɛ ne tɛɛ ↄ dↄↄ wↄŋ nombiakumɛɛyɛɛra deŋele. 5Mena dↄↄ kaboena nyi walaŋ kamasɛ waa yↄkↄse ↄ wose fa kegyiise baŋ. Te yɛɛ keŋ nyi ↄ ne yee nyi keŋ baa wↄŋ ↄ deŋele kaageŋ dↄↄ ya, mↄna keŋ ↄ gyeŋ lee ↄ konↄↄ man nyi kaboena nyi waa yɛɛ mena dↄↄ. 6Mena mↄ dↄↄ te kaboena nyi yaa tↄ lempoo nɛ. Nawolo nyi kegyiise baŋ yɛɛ Wurubuarɛ tewulɛɛwↄ te bɛɛ mo ba debaŋ pou yɛɛ tom. 7Ɛ tↄ walaŋ kamasɛ kom keŋ ɛ dana e nɛ. Akpaa ke yɛɛ lempoo ke na tↄ ke, te akpaa ke yɛɛ toto ke na tↄ ke. Akpaa ke yɛɛ obuo ke na bu wↄ, te akpaa ke yɛɛ yele kalese ke na lese ba yele. 8Ɛ na yeli kom kamasɛ ke doo ɛmɛɛ na ŋolo nsana ya. Kom keŋ kaboena nyi ke dɛɛ doo ya nsana yɛna balaŋ kegyae keŋ kaboena nyi yaa gyae dↄŋa nɛ. Nawolo nyi akpaa ŋolo ne gyae ↄ dↄↄ na, ↄ te yɛɛ kpene keŋ mmaraa keŋ ne gyae nɛ kelii ↄto. 9Nnɛ te Mosesi mmaraase ŋan ŋaale ne yako nyiaa, "Na lee n wɛɛle yaa n baale wↄle ya, na ko walaŋ ya, na ŋmɛɛle ya, na yeli n sia keyɛɛ n dↄↄ kolo ya." Kɛŋa na mmaraase akaŋ ŋan pou nyee yɛna mmaraa keŋ ne yako nyiaa, "Gyae n dↄↄ ŋgba nyaŋ gbagba n wose nɛ." 10Nyi akpaa ŋolo ne gyae ↄ dↄↄ nɛ, ↄ be gyae waa yɛɛ e nombiikum ya. Mena dↄↄ nyi n gyae n dↄↄ na, n dii mmaraase ŋan pou dↄↄ baa kelii ↄto. Nawolo nyi mmaraase ŋan pou nyee yɛna kegyae. 11Kɛŋa pou wↄle nɛ, ɛ kɛɛ debaŋ keŋ man de kyaa nɛ na ɛ kena nyi te lii debaŋ keŋ dee foŋ lee da dosoroŋ man. Nawolo nyi nɛnɛɛ da nyeekelɛɛweeya ŋan ta benaa kela debaŋ keŋ dↄↄ taŋgbɛɛ lɛɛ Kristo di nɛ. 12Teka kyomii na nelim te lam, na tɛɛ kena mↄ te lii. Mena dↄↄ ɛ yela dee tina ditiŋtɛɛ man abↄↄ keyɛɛ yela, na dɛɛ mo keŋmaŋee kegba keŋ dɛɛ mo yoo na ditiŋtɛɛ abↄↄ nɛ do. 13Ɛ yela da kekyaabii man ke yɛɛ ŋgba balaŋ baŋ be kyaa keŋmaŋee man nɛ. Ɛ na yeli dɛɛ wↄlɛɛ debaŋ gyu ke kyaa nↄↄdedii man di de nↄↄ na dɛɛ dɛɛse ya. Ɛ na yeli dɛɛ yɛɛ kafoŋ nombia na nombia nkaraŋkaraŋ ya. Ɛ na gyae kale ya, te ɛ na yɛɛ sibiikum mↄ ya. 14Mↄna ɛ yela de Gbeŋgyoo Yesu Kristo kedi ɛ nyee, na ba tekaa yela ɛ ka gyueŋ nombiakumɛɛ ŋan ɛ dinↄↄ kum keŋ ne yeli ɛ ne yɛɛ nɛ ya.

will be added

X\