Romantena 11

1Nyi akpaa nnɛ te nombia kɛŋa doo na, ɛ yela maa bↄↄse ŋon bela nyiaa, "Wurubuarɛ bɛɛ ŋon gbagba ↄ balaŋ baŋ baa yaa?" Korakora, ↄ te bɛɛ wↄ ya. Nawolo nyi maŋ Pↄↄl gbagba yɛɛ Iserae baale e. Ma lee Aberaham duuluŋ man, te ma lee Bɛngyamɛn dekpaŋalaŋ man. 2Te yɛɛ nyi Wurubuarɛ bɛɛ ↄ balaŋ baŋ ↄ wulaa ↄ gyeŋ wↄ, te ↄ be wulaa lese wↄ see lee tɛɛle kei kewalaŋ nɛ bo ya. Ɛ tↄↄse mena keŋ Wurubuarɛ nombia aŋmaraseŋ see ŋan be yako lee Wurubuarɛ dekpeŋkpeŋgyↄↄre Elia wose man. 3Elia moo Iseraetena nombiakumɛɛ kaa see Wurubuarɛ siaman te ↄ yako e nyiaa, "Me Gbeŋgyoo, Iseraetena ta koe nya akpeŋkpeŋgyↄↄra baŋ pou te be yɛlɛɛ n kedeesa boya ŋan pou. Maŋ maageŋ kooŋ kaa la, te bɛɛ kɛo maŋ gba koraŋ baa ko." 4Keŋte Wurubuarɛ tiranↄↄ fa Elia nyiaa, "Koa, na nyaŋ nyaageŋ kaa la ya. Nawolo nyi me ta lese balaŋ kakpoŋse nyetooro (7,000) see fa ma wose, keŋ be te buŋa ta som bane ŋon bɛɛ baake nyi Baal nɛ korakora ya." 5Mena mↄ te gyɛŋ wee kei nɛ, Wurubuarɛ te tɛɛ ↄ bɛrɛɛ keŋ dↄↄ lese balaŋ akalansɛɛ baale see fa ↄ wose. 6Akpaa Wurubuarɛ tɛe ↄ bɛrɛɛ keŋ dↄↄ lese balaŋ na, kenaŋ na te yɛɛ nyi ↄ tɛe ba tom keŋ bↄↄ yɛɛ nɛ dↄↄ lese wↄ ya. Nyi ŋon tɛe ba tom keŋ bↄↄ yɛɛ nɛ dↄↄ lese wↄ nɛ, kenaŋ na ↄ bɛrɛɛ keŋ ta tekaa yɛɛ bɛrɛɛ gbagba ya. 7Nɛnɛɛ sena yaa dɛɛ yako bela? Kpene keŋ Iseraetena be yase be sia kɛo nɛ, be te nyiŋ ke ya. Mↄna balaŋ akalansɛɛ baŋ Wurubuarɛ ba lese wↄ see nɛ, baŋ nyiŋa na ke. Balaŋ akaŋ baŋ dↄↄ, baŋ yɛɛ deŋele doŋ bo. 8Wurubuarɛ nombia aŋmaraseŋ see yako mena nombii kei nyiaa, "Wurubuarɛ te yeli ba nyeeya ta yem, mena dↄↄ bↄↄ ne nyii nombia ŋan man ya. Te kaa lii na gyɛŋ wee kei nɛ, be dana sia mↄna bↄↄ ne naa ya. Be dana deŋela, mↄna bↄↄ ne nyii Wurubuarɛ nombia ŋan man ya." 9Gyoo Defidi mↄ sola Wurubuarɛ nyiaa, "Wurubuarɛ yela be dedii ka bese ba deyalae. Yela baa naa diyem tↄ ba dukum kom. 10Yela be sia ke yɛlɛɛ na baa ta kpaŋte, na baa kyaa kaale man debaŋ kamasɛ." 11Ɛ yela maa bↄↄse ŋon bela nyiaa, ke yɛɛ ampaŋ nyi Iseraetena baŋ kpaŋtewↄ yala keŋ be ta bese tale koro yee? Koa, na mena ya. Mↄna kelɛɛdi keŋ ba te lɛɛ Wurubuarɛ di ya nɛ, keŋ toro na gbɛɛ fa balaŋ baŋ ba te yɛɛ Iseraetenawↄ ya nɛ, na Wurubuarɛ ke lɛɛ ba nyee na ke nyiŋ do Iseraetena benaŋ sibiiyam. 12Nombiakumɛɛ ŋan Iseraetena be yɛɛ nɛ, keŋ torona gbɛɛ fa balaŋ baŋ ba te yɛɛ Iseraetenawↄ ya nɛ te Wurubuarɛ hiraa wↄ. Iseraetena benaŋ keyala be Wurubuarɛ ↄsom man nɛ, ka moo tↄnↄↄ burum kↄna balaŋ baŋ ba te yɛɛ Iseraetenawↄ ya nɛ. Mena dↄↄ akpaa Iseraetena baŋ de kaa nyiŋ Wurubuarɛ nyeekelɛɛ na, kenaŋ na tↄnↄↄ keŋ balaŋ baŋ ba te yɛɛ Iseraetenawↄ ya nɛ baa nyiŋ na, ka te yɛɛ nsendee ya. 13Nɛnɛɛ ɛmɛɛ baŋ ɛ te yɛɛ Gyudatenawↄ ya nɛ ɛ tei nombii kei. Me yɛɛ Kristo kpilale e te ŋon kpila na maŋ ɛ gyaŋ nyi me kaa kolosi ↄ nombia ŋan fa ŋon. Mena dↄↄ mↄↄ na mo ma tom kei do nsendee ya. 14Nawolo nyi me loo gyakaa nyi me kyↄ ŋon na, gyae ka do me tebia Gyudatena baŋ sibiiyam na ke yela Wurubuarɛ ke lɛɛ ba nyee. 15Debaŋ keŋ Wurubuarɛ ba besena ↄ wↄle tee Iseraetena nɛ, ke yela balaŋ baŋ ba te yɛɛ Iseraetenawↄ ya nɛ kaa bese Wurubuarɛ ↄ gyoona. Nyi akpaa mena te doo nɛ, kenaŋ na debaŋ keŋ Wurubuarɛ waa kaa lɛɛ Iseraetena baŋ do na, gyae ke yɛɛ balaŋ baŋ ba te yɛɛ Iseraetenawↄ ya nɛ gyoŋ ŋgba be foŋae lee yeŋ man nɛ. 16Akpaa n dana kolo te n lese ke man ŋaale deesi fa Wurubuarɛ na, kenaŋ na nawolo baa nyi kpene kenaŋ pou yɛɛ Wurubuarɛ wui. Mena mↄ te akpaa daŋ lila yɛɛ Wurubuarɛ wui na, kenaŋ na nawolo baa nyi daŋ kenaŋ pou yɛɛ ↄ wui. 17Gyudatena yɛɛ ŋgba oliifi daŋ keŋ Wurubuarɛ gbagba be duu nɛ. Te balaŋ baŋ ba te yɛɛ Gyudatenawↄ ya nɛ, baŋ yɛɛ yaa ŋgba ŋale man oliifi daŋ nɛ. Mena dↄↄ yɛɛ yaa ŋgba Wurubuarɛ te kara oliifi daŋ keŋ ↄ be duu nɛ tombia ŋaale leki, te ↄ ke kara ŋale man oliifi daŋ keŋ tombia ka towaa na ke nɛ. Kei nawolo baa nyi ɛmɛɛ baŋ ɛ te yɛɛ Gyudatenawↄ ya nɛ, ɛmɛɛ mↄ ɛ ke nyiŋ doŋ nawolo nyi ɛ ke nyiŋ loŋ lee oliifi daŋ keŋ Wurubuarɛ gbagba be duu nɛ man. 18Mena dↄↄ ɛ na gyↄ ɛ konↄↄ nyi ɛ kela tombia ŋan bↄↄ kare leki te bↄↄ mo ŋon towaa nɛ ya. Nawolo nyi na daŋ tombia danaana ke ka seŋɛɛ ya, mↄna ke lila danaana ke ka seŋɛɛ. 19Mberem na ɛ ke yako nyi, "Be keretii tombia ŋan bo leki na daa baŋ da te yɛɛ Gyudatenawↄ ya nɛ, ke nyiŋ gbɛɛ kaa towaa botↄↄ ne dee nyiŋ nyeedoŋ" 20Kei yɛɛ ampaŋ. Keŋ ba te lɛɛ di dↄↄ ya te Wurubuarɛ keretii wↄ leki, te keŋ ɛmɛɛ be kaa lɛɛ di dↄↄ te ɛ kaa seŋawↄ be nawↄↄ man. Mena dↄↄ ɛ na wola ɛ wose ya, mↄna ɛ kɛɛ ɛ wose dↄↄ nideli. 21Nawolo nyi Iseraetena baŋ be yɛɛ tombia gbagbawↄ koraŋ nɛ, be yɛɛ dukum na Wurubuarɛ te tina wↄ yela ya, mↄna ↄ wↄŋa ba deŋele. Mena dↄↄ akpaa ɛmɛɛ mↄ ɛ yɛɛ dukum na, ↄ be gyae waa tina ŋon yela ya. 22N kɛɛ nombii kei na, dɛɛ tale naa nyi Wurubuarɛ dana wↄe nideli te ↄ nombia mↄ dana doŋ nideli. Ↄ nombia dana doŋ fa baŋ bↄↄ ne yɛɛ ↄ kegyaebii ya nɛ, mↄna ɛmɛɛ balaŋ baŋ ɛ yɛɛ kakyeŋ te ɛ dↄŋ ↄ gbɛɛneŋ man keŋ ɛ te tina yela ya na, waa lese ↄ wↄe wola ŋon. Na mena ya na waa keretii ɛmɛɛ mↄ leki. 23Te akpaa Iseraetena baŋ bↄↄ tina ba kelɛɛdi yela nɛ da bese kↄŋ kaa lɛɛ Wurubuarɛ di na, kenaŋ na waa besena wↄ kaa see be daseŋae bene keŋ man. Nawolo nyi Wurubuarɛ waa tale mo wↄ kaa towaa na oliifi daŋ keŋ bela. 24Ɛmɛɛ baŋ ɛ te yɛɛ Iseraetenawↄ ya nɛ, ɛ yɛɛ ŋgba ŋale man oliifi daŋ tombia ŋan bↄↄ kare mo kaa towaa na oliifi daŋ gbagba keŋ nɛ. N kɛɛ na nafↄ bↄↄ ne kara daŋ daale tombii kaa towaa na daale ya. Mↄna Iseraetena baŋ dↄↄ, baŋ yɛna oliifi daŋ gbagba keŋ bↄↄ kara ke tombia leki nɛ. Mena dↄↄ be gyae ke yɛɛ Wurubuarɛ doŋ nyi waa bese mo tombia ŋenaŋ kaa towaa na ke naa keŋ ya. 25Me tebia, nombii daale weesɛɛ keŋ mɛɛ gyae ɛ ke nyii ke man. Akpaa ɛ nyii ke man na, be gyae ke yela ɛ ke yɛɛ ya agyueŋ nyi ɛ gyeŋ nombia gbaa ya. Nombii kenaŋ yɛna nyi Iseraetena dana deŋele doŋ, mↄna te yɛɛ nyi baa yɛɛ deŋele doŋ kenaŋ kekpaakekpaa ya. Baa yɛɛ deŋele doŋ kenaŋ bo kelii debaŋ keŋ Wurubuarɛ waa kaa lɛɛ balaŋ baŋ ba te yɛɛ Iseraetenawↄ ya nɛ yaanↄↄle keŋ ↄ ne gyae nɛ nyee pɛ. 26Dekↄŋ mena na Wurubuarɛ waa lɛɛ Iseraetena pou nyee ŋgba mena keŋ Wurubuarɛ nombia aŋmaraseŋ see ne yako nɛ nyiaa, "Siyↄn donↄↄ man te nyeelɛɛre ŋon waa lee kↄŋ, na ↄ kaa lese nombia nkaraŋkaraŋ pou lee Iseraetena man. 27Akpaa nyi ma lese nombiakumɛɛ pou lee be dↄↄ taŋ na, keŋ ne gyae la ka wola nyi nↄↄkebakesee keŋ doo daa na wↄ nsana nɛ te kↄŋ mena." 28Keŋ Iseraetena te lɛɛ nyeedoŋ nombia ŋan di dↄↄ ya, te be kaa bese balaŋ baŋ bɛɛ kↄla Wurubuarɛ. Mↄna kei kaa yɛɛ tↄnↄↄ fa ɛmɛɛ baŋ ɛ te yɛɛ Iseraetenawↄ ya nɛ. Te keŋ be yɛɛ balaŋ baŋ Wurubuarɛ be wulaa lese wↄ see dↄↄ, mena dↄↄ ↄ ne gyae be nombia lee be naanaↄ dↄↄ. 29Nawolo nyi akpaa Wurubuarɛ da lese ŋolo te ↄ mo kolo boele e na, ↄ bɛɛ kyɛɛkee wa agyueŋ bela ya. 30Debaŋ daale kaa laŋawↄ na ɛmɛɛ baŋ ɛ te yɛɛ Iseraetenawↄ ya nɛ ɛ yɛɛ deŋele doŋ Wurubuarɛ dↄↄ, mↄna nɛnɛɛ dↄↄ lee Iseraetena deŋele doŋ dↄↄ Wurubuarɛ te kaa wii ɛ waraŋase. 31Mena ke te nɛnɛɛ baŋ mↄ dana deŋele doŋ, na ke yela Wurubuarɛ ke wii be waraŋase ŋgba mena keŋ ↄ be wii ɛ waraŋase nɛ. 32Nawolo nyi Wurubuarɛ te yeli balaŋ pou te yɛɛ deŋele doŋ, na waa nyiŋ wii be popou waraŋase. 33Wurubuarɛ wↄe keŋ ↄ dana nɛ, be dana ke maa ya. Ↄ siakekara na ↄ nombia kagyeŋ dokoso be kyaa ya. Amↄte ne gyae la waa tale nyii Wurubuarɛ abↄↄ ŋan ↄ ne yɛɛ, na mena keŋ ↄ ne yɛɛ ŋa nɛ man? 34Amↄte gyeŋa na de Gbeŋgyoo Wurubuarɛ nyeeman nombia, te amↄte ne gyae la waa tale kolosi fa e? 35Amↄte faa na Wurubuarɛ kolo see, keŋ kaboena nyi ŋon mↄ waa tↄ ↄtenate kom? 36Nawolo nyi kpene kamasɛ yɛɛ ↄ wui. Lee ↄ doŋ man dↄↄ te kpene kamasɛ kyaa, te ŋe popou mↄ kyae fa e. Ŋon kaboela nyi dɛɛ lese ↄ yele kekpaakekpaa. Amɛn.

will be added

X\