Romantena 10

1Me tebia, kpene keŋ mɛɛ gyae me konↄↄ man te mɛɛ fane ke dↄↄ yɛna nyi, Wurubuarɛ waa lɛɛ me tebia Iseraetena pou nyee. 2Maa tale di ba wose man adansɛɛ nyi bɛɛ yase be sia lee Wurubuarɛ nombia ŋan dↄↄ nideli. Mↄna be sia keyase keŋ bɛɛ kyaa na Wurubuarɛ gbɛɛneŋ ya. 3Nawolo nyi bↄↄ gyeŋ gbɛɛ keŋ Wurubuarɛ na mo yela balaŋ gbɛɛneŋ na tenee ↄ siaman ya, te baŋ gbagba yase be sia be silana gbɛɛneŋ ŋan baŋ gyeŋ nyi ŋe gyae ke yela be gbɛɛneŋ ka tenee Wurubuarɛ siaman nɛ. Lee mena dↄↄ ba te yↄkↄse ba wose na baa sila Wurubuarɛ gbɛɛ keŋ ne yeli balaŋ gbɛɛneŋ na tenɛɛ ↄ siaman nɛ ya. 4Kristo yɛna mmaraase ŋan pou nyee, te ↄ kekↄŋ dↄↄ mmaraase ŋan kesila be dana tↄnↄↄ bela ya. Lee kei dↄↄ walaŋ kamasɛ ŋon ↄ lɛɛ e di na, ↄtenate gbɛɛneŋ gyae ka tenee Wurubuarɛ siaman. 5De naana Mosesi ŋmarasewↄ lee mena keŋ deniwalaŋ waa sila mmaraase ŋan na ↄ gbɛɛneŋ ka tenee Wurubuarɛ siaman nɛ nyiaa, "Walaŋ kamasɛ ŋon ↄ ne di mmaraase ŋan dↄↄ na ↄ gbɛɛneŋ ka tenee Wurubuarɛ siaman nɛ, akpaa ↄ kyaŋ ↄ wose di ŋe dↄↄ nideli keŋ ↄ te yale ŋe man dokoloŋ dↄↄ ya nɛ, kenaŋ na waa nyiŋ nyeedoŋ." 6Mↄna walaŋ ŋon ↄ lɛɛ Yesu di te lee ↄ kelɛɛdi dↄↄ ↄ gbɛɛneŋ da tenee Wurubuarɛ siaman nɛ, na ↄ na wolo baa nyi ta tekaa yɛɛ nyi ŋolo ke bↄↄse nyi, "Amↄte ne gyae la waa gyeŋ gyu adido" na ↄ kaa mo Kristo kↄŋ ya. 7Yaa ŋolo mↄ ke bↄↄse nyi, "Amↄte ne gyae la waa tisi gyu tɛɛle ateta" na ↄ kaa gyuusu Kristo lee woya man kↄŋ ya. 8Mↄna Wurubuarɛ nombia ne yako lee balaŋ baŋ bↄↄ lɛɛ Yesu di, te lee ba kelɛɛdi dↄↄ Wurubuarɛ be lɛɛ wↄ do nyi be gbɛɛneŋ tenee ŋon Wurubuarɛ siaman nɛ wose man nyiaa, "Wurubuarɛ nombia ŋan benaa na ŋon. Ŋe doo ɛ nↄↄse man, te ŋe doo ɛ konↄↄse man mↄ." Nombia ŋenaŋ yɛna kelɛɛdi nombia ŋan dɛɛ yako nɛ. 9Mena dↄↄ nyi akpaa n gyuusu n nↄↄ yako balaŋ man nyi, "Yesu yɛna de Gbeŋgyoo" te n lɛɛ di n konↄↄ man nyi Wurubuarɛ gyuusu e lee yeŋ man na, Wurubuarɛ waa lɛɛ n nyee. 10Nawolo nyi walaŋ konↄↄ man te ↄ ne lɛɛ di te Wurubuarɛ ne lɛɛ ↄtenate do nyi ↄ gbɛɛneŋ tenɛɛ ŋon Wurubuarɛ siaman. Walaŋ nↄↄ mↄ te ↄ na mo yako nyi Yesu yɛna ↄ Gbeŋgyoo te Wurubuarɛ ne lɛɛ ↄtenate nyee. 11Mena mↄ te Wurubuarɛ nombia aŋmaraseŋ see ŋan ne yako nyi, "Walaŋ kamasɛ ŋon ↄ lɛɛ Kristo di na, desɛŋ be gyae ke kyaŋ e korakora ya." 12N yɛɛ Gyuda baale e o, n te yɛɛ Gyuda baale e ya o, de popou yɛɛ dokoloŋ Wurubuarɛ siaman. Nawolo nyi Kristo ŋonaŋ yɛna de popou de Gbeŋgyoo. Walaŋ kamasɛ ŋon ↄ wii baake e na, waa mo wa abↄↄ kpaakpaa ŋan boele e. 13Nawolo nyi be yakowↄ Wurubuarɛ nombia aŋmaraseŋ see ŋan man nyiaa, "Walaŋ kamasɛ ŋon ↄ wii baake de Gbeŋgyoo Wurubuarɛ na waa lɛɛ ↄ nyee." 14Te sena yaa balaŋ baa tale wii baake de Gbeŋgyoo ŋon bↄↄ ne lɛɛ e di ya nɛ yele na waa lɛɛ ba nyee? Yaa akpaa be te nyii ta ↄ wose man nombia ya na, sena te baa tale lɛɛ e di? Te akpaa ŋolo mↄ te kolosi ↄ wose man nombia fa wↄ ya na, sena te baa yɛɛ na baa nyii ŋa? 15Te akpaa Wurubuarɛ te kpila balaŋ nyi baa gyu ke yako ↄ wose man nombia ŋenaŋ ya na, sena te baa yɛɛ na baa tale gyu ke yako ŋa? Wurubuarɛ nombia aŋmaraseŋ see ŋan ne yako nyiaa, "Akpaa balaŋ ne kↄŋ be kaa kolosi nyeedoŋ nombia ŋan na, ba keta na mo nombia kpaakpaa bo kↄŋ." 16Mↄna na baŋ pou bↄↄ nyii nombia kpaakpaa ŋan nɛ lɛɛ na ŋa di ya. Nawolo nyi Wurubuarɛ dekpeŋkpeŋgyↄↄre Yesaya yakowↄ nyiaa, "De Gbeŋgyoo, amↄte lɛɛ na de nombia ŋan dↄↄ yako nɛ di?" 17Mena dↄↄ lee Kristo nyeedoŋ nombia ŋan keyako man te balaŋ ne nyii ŋa. Mena mↄ te lee Kristo nombia ŋenaŋ kenyii man te balaŋ ne lɛɛ ŋa di. 18"Mↄna ɛ yela maa bↄↄse ŋon nyiaa, mena balaŋ kɛwↄ te nyii Kristo nombia ŋan baa yee?" Kenyii dↄↄ be te nyii, nawolo nyi Wurubuarɛ nombia aŋmaraseŋ see ŋan ne yako nyiaa, "Nombia ŋan te kili gyu tɛɛle kei dↄↄ pou. Te deniwalaŋ kamasɛ mↄ te nyii nombia ŋenaŋ." 19Ɛ yela maa bↄↄse ŋon bela nyiaa, mena dↄↄ ɛ ne yako baa nyi Iseraetena baŋ bↄↄ nyii nombia kɛŋa nɛ, be te nyii ŋe man yee? Kenyii dↄↄ be nyiiwↄ. Mosesi yɛna walaŋ gyaŋgbate ŋon ↄ be tira mena nombia kɛŋa nↄↄ nyiaa, Wurubuarɛ kpa, "Maa mo balaŋ baŋ ba te yɛɛ Gyudatenawↄ ya nɛ do ɛmɛɛ Gyudatena sibiiyam. Maa mo balaŋ baŋ bↄↄ gyeŋ daale lee ma wose man ya nɛ do ŋon baŋ." 20Wurubuarɛ dekpeŋkpeŋgyↄↄre Yesaya mↄ gyↄↄ ↄ konↄↄ yako nyiaa, Wurubuarɛ kpa, "Balaŋ baŋ ba te yase be sia kɛo maŋ ya nɛ, baŋ naa na maŋ. Te balaŋ baŋ mↄ bↄↄ ne bↄↄse me dↄↄ ya nɛ, baŋ te maa lese ma wose wola." 21Mↄna Iseraetena baŋ dↄↄ Yesaya yakowↄ nyi Wurubuarɛ kpa, "Wee na wee na mɛɛ kɛɛ gbɛɛ nyi baa kaa lɛɛ maŋ di na maa lɛɛ ba nyee, mↄna ba te yɛɛ deŋele doŋ koro seŋ tia maŋ."

will be added

X\