Romantena 1

1Tↄne kei lee maŋ Pↄↄl ŋon me yɛɛ Yesu Kristo tobaale e nɛ gyaŋ. Wurubuarɛ baake na maŋ nyi me kaa yɛɛ ↄ kpilale, te ↄ lese maŋ see nyi maa yako ↄ nombia kpaakpaa ŋan. 2Gyaŋgba gyaŋgba keŋ nɛ, Wurubuarɛ tɛɛwↄ wa akpeŋkpeŋgyↄↄra dↄↄ yako ↄ nombia kɛŋa see ↄ nombia aŋmaraseŋ see ŋan man. 3Nombia kpaakpaa kɛŋa yɛɛ ↄ bu Yesu Kristo ŋon ↄ yɛɛ de Gbeŋgyoo e nɛ nombia ŋa. Lee lolo gbɛɛ man na, Yesu kei lee gyoo Defidi duuluŋ man. 4Wurubuarɛ feliŋ ŋon doŋ keŋ ↄ ba mo gyuusu Yesu lee yeŋ man nɛ, keŋ lese la wola nideli nyi ↄ yɛɛ Wurubuarɛ bu e keŋ ayimɛɛ be doo ↄ man ya. 5Wurubuarɛ tɛe ŋon Kristo ŋonaŋ dↄↄ mo ↄ bɛrɛɛ boele daa nyi de kaa bese ↄ kpilala. Na ke yela tɛɛle kei dↄↄ balaŋ pou ke lɛɛ ŋon Wurubuarɛ di, na baa nyii ↄ dei na baa lese ↄ yele. 6Ɛmɛɛ Romantena baŋ Wurubuarɛ be baake ŋon te ɛ be kaa bese Yesu Kristo balaŋ nɛ, ɛmɛɛ mↄ kpuɛ mena balaŋ kɛwↄ man. 7Lee mena dↄↄ te mɛɛ ŋmarase tↄne kei mee yelee ɛmɛɛ Romantena baŋ pou Wurubuarɛ ne gyae ŋon te ↄ be baake ŋon nyi ɛ kaa bese ↄ balaŋ nɛ. De kya Wurubuarɛ na de Gbeŋgyoo Yesu Kristo baa mo be bɛrɛɛ boele ŋon, na baa fa ŋon wosefɛɛreŋ. 8Pɛ maa kolosi nombii daale nɛ, me dↄŋ Yesu Kristo dↄↄ mɛɛ fa Wurubuarɛ karaŋ lee ɛ popou dↄↄ. Nawolo nyi balaŋ ne nyii mena keŋ ɛ be lɛɛ Wurubuarɛ nombia ŋan di tɛɛle kei dↄↄ pou. 9Wurubuarɛ ŋon mɛɛ mo me konↄↄ pou som e te mɛɛ yako ↄ bu nyeekelɛɛ nombia ŋan nɛ, ŋon yɛna ma adansɛɛ nyi mɛɛ tↄↄse ŋon nideli debaŋ kamasɛ ma kefane man. 10Debaŋ kamasɛ keŋ mɛɛ fane na, mɛɛ sola Wurubuarɛ nyi waa toro gbɛɛ fa maŋ lee ŋon gbagba kegyaebii man na maa nyiŋ kↄŋ ɛ gyaŋ. 11Ɛ nombia ne gyↄ maŋ loo, mena dↄↄ mɛɛ gyae nyi maa kↄŋ ɛ gyaŋ na maa yela ɛ ke nyiŋ Wurubuarɛ feliŋ abↄↄ anefaŋ ŋan, na ŋe ka do ŋon doŋ ɛ kelɛɛdi man. 12Kei nawolo baa nyi akpaa me kↄŋ ɛ gyaŋ na, daa na ŋon pou kelɛɛdi gyae ka do dↄŋa kakyeŋ. 13Me tebia mɛɛ gyae ɛ ka gyeŋ nyi nafↄ me gyaewↄ agbaatee agbaatee nyi maa kↄŋ ɛ gyaŋ, na Wurubuarɛ ke ta me dↄↄ yela balaŋ ke lɛɛ Yesu di nideli ɛ man, ŋgba mena keŋ ɛ tebia baŋ ba te yɛɛ Gyudatenawↄ ya nɛ be lɛɛ e di debiise akaŋ ŋan man nɛ, mↄna gbɛɛ ta toro fa maŋ debaŋ kenaŋ man ya. 14Ke yɛɛ kpene keŋ doo me dↄↄ nyi maa kolosi Wurubuarɛ nombia fa walaŋ kamasɛ. Siakaralatena na ayiŋtena pou, balaŋ baŋ ba gyeŋ nombia na baŋ bↄↄ gyeŋ nombia ya nɛ pou. 15Lee kei dↄↄ te me sia yɛɛwↄ nyi maa kolosi Kristo nombia ŋan fa ɛmɛɛ baŋ ɛ kyaa Roman donↄↄ man mↄ nɛ. 16Kristo nombia kpaakpaa ŋan kekolosi be dana maŋ desɛŋ ya. Nawolo nyi ŋan yɛna Wurubuarɛ doŋ keŋ ↄ na mo lɛɛ walaŋ kamasɛ ŋon ↄ ne lɛɛ ŋa di nɛ nyee. Gyudatena taŋgbɛɛ la nyii nombia kɛŋa, pɛte balaŋ akaŋ baŋ mↄ kaa nyii ŋa. 17Kristo nombia kpaakpaa ŋan na wola na mena keŋ Wurubuarɛ ne yɛɛ pɛte balaŋ gbɛɛneŋ na tenee ↄ siaman. Nombia ŋenaŋ nawolo nyi akpaa walaŋ ŋon ↄ ne lɛɛ Yesu di nɛ de tale seŋ ↄ kelɛɛdi man lee kewalaŋ kelii ↄto na, ↄtenate gbɛɛneŋ gyae ka tenee Wurubuarɛ siaman. Be ŋmarase mena nombii kei Wurubuarɛ nombia aŋmaraseŋ see ŋan man nyiaa, "Walaŋ ŋon lee ↄ kelɛɛdi dↄↄ te ↄ gbɛɛneŋ da tenɛɛ Wurubuarɛ siaman na, waa nyiŋ nyeedoŋ kekpaa." 18Wurubuarɛ ŋon ↄ kyaa adido nɛ ta lese wola nyi ↄ ta gyeŋ baŋ balaŋ kumɛɛ na balaŋ baŋ bↄↄ ne nyii ↄ dei ya nɛ dↄↄ. Nawolo nyi be nombiakumɛɛ bee yeli Wurubuarɛ nombia ŋan ŋe doo na ŋe gbɛɛ nɛ ka lee debↄↄ ya. 19Wurubuarɛ ta gyeŋ baŋ nawolo nyi gbɛɛ keŋ man balaŋ baa mo gyeŋ e nɛ te yɛɛ nombia aweesesa ya. Ŋon Wurubuarɛ gbagba lese na ŋa wola wↄ. 20Wurubuarɛ wose man nombia ŋaale kyaa keŋ nyi walaŋ be tale naa ŋa na ↄ sia fonɛɛ ya. Ŋan yɛna ↄ doŋ kekpaakekpaa na ↄ dinↄↄ keŋ ↄ dana keŋ nawolo nyi ↄ yɛɛ Wurubuarɛ e nɛ. Mↄna n kɛɛ na leenaŋ tɛɛle keyɛɛ kewalaŋ keŋ na, Wurubuarɛ dinↄↄ kenaŋ ba weesɛɛ ya. Nawolo nyi abↄↄ ŋan pou ↄ be yɛɛ nɛ na lese ↄ dinↄↄ wola nideli keŋ balaŋ baa tale naa na baa lɛɛ di. Mena dↄↄ walaŋ ŋon ↄ te lɛɛ di ya na, ↄ taŋ nombii daale waa yako mo lɛɛ ↄ wose ya. 21Mena balaŋ kɛwↄ gyeŋ nyi Wurubuarɛ kyaa mↄna bↄↄ na mo obuo keŋ kaboena e nɛ fa e ya, te bↄↄ na lese ↄ yele mↄ ya. Nyansa nombii kamasɛ be doo ba agyueŋ man ya, te ditiŋtɛɛ wolowolo doo la be konↄↄse man. 22Bɛɛ yɛɛ ŋgba be sia te kare nɛ, mↄna be yɛɛ ayiŋtenawↄ. 23Be te tina Wurubuarɛ ŋon ↄ kyaa kekpaakekpaa nɛ yela, gyu bɛɛ som banɛɛ ŋan bↄↄ maa yaa bↄↄ yae ŋa ŋgba balaŋ yaa gyebuse yaa wonembia nɛ. 24Mena dↄↄ Wurubuarɛ mↄ ta besena ↄ wↄle tee wↄ, te bɛɛ yɛɛ nombia nkaraŋkaraŋ ŋan ba lee baŋ gbagba be konↄↄse man nɛ. Be dana kewↄlɛɛ nombia bee fulu ba wose. 25Be te tina Wurubuarɛ nombia ŋan ŋe doo na ŋe gbɛɛ nɛ kelɛɛdi yela gyu bɛɛ lɛɛ akɛrɛɛ nombia di. Mena dↄↄ bɛɛ som abↄↄ ŋan Wurubuarɛ be yɛɛ nɛ bo tina Wurubuarɛ ŋon ↄ be yɛɛ ŋa nɛ yela. Ŋon Wurubuarɛ te kaboena nyi dɛɛ lese ↄ yele kekpaakekpaa Amɛn. 26Keŋ bɛɛ yɛɛ mena dↄↄ Wurubuarɛ ta besena ↄ wↄle tee wↄ te ba gyoo desɛŋ nombia keyɛɛ. Be man ala baŋ gba koraŋ te tina baala gyaŋ kedoo ŋgba mena keŋ Wurubuarɛ ba wolo nɛ yela gyu bee doo na dↄŋa. 27Mena mↄ te baala mↄ bɛɛ ala gyaŋ kedoo ŋgba mena keŋ Wurubuarɛ ba wolo nɛ yela gyu bɛɛ yeŋ dↄŋa yeŋ, te ba gyoo desɛŋ nombia nkaraŋkaraŋ keyɛɛ na dↄŋa. Mena dↄↄ Wurubuarɛ waa wↄŋ ba deŋela ŋgba mena keŋ kaboena nɛ. 28Keŋ bↄↄ bɛɛ Wurubuarɛ nombia ŋan kagyeŋ dↄↄ, ŋon mↄ ta besena ↄ wↄle tee wↄ. Mena dↄↄ nombia nkaraŋkaraŋ te bɛɛ gyueŋ te bɛɛ yɛɛ nombia ŋan tekaboena nyi nafↄ balaŋ baa yɛɛ ya nɛ. 29Nombiakumɛɛ te wulu be man. Akpanyaŋnyaŋ na nombiakumɛɛ na sibii na balaŋ kekↄla na sia keyɛɛ balaŋ abↄↄ dↄↄ, na balaŋ kako na kale nombia na akɛrɛɛ kedi na nombia ka mo gyakaa balaŋ dↄↄ te wulu be man. Mena mↄ te bɛɛ yako balaŋ wose man nombia. 30Bɛɛ mo nombiakumɛɛ gyakaa dↄŋa dↄↄ, te bɛɛ kↄla Wurubuarɛ. Be dana deboŋ te bↄↄ ne bu balaŋ ya, te bɛɛ wola ba wose mↄ. Bɛɛ gyae gbɛɛneŋ wↄlɛɛ ŋan baa mo yɛɛ nombiakumɛɛ debaŋ kamasɛ, te bↄↄ ne bu ba lolala mↄ ya. 31Bↄↄ dana nyansa ya te bↄↄ ne di nombia ŋan bɛɛ yako nɛ dↄↄ ya. Bↄↄ ne gyae balaŋ ya, te bↄↄ ne wii balaŋ waraŋase mↄ ya. 32Keŋ na keŋ ba gyeŋ nyi Wurubuarɛ mmaraa nawolo nyi walaŋ ŋon ↄ doo mena dinↄↄ kei man na ↄtenate be gyae waa nyiŋ nyeedoŋ kekpaa ya koraŋ nɛ, be gyakaa bɛɛ yɛɛ mena nombiakumɛɛ kɛŋa kpu. Kenaŋ wↄle koraŋ nɛ, bɛɛ bese do balaŋ baŋ bɛɛ yɛɛ mena nombiakumɛɛ kɛŋa mↄ nɛ kakyeŋ.

will be added

X\