Kalesewola 9

1Kenaŋ wↄle te Wurubuarɛ kpilale banoŋte ŋon mↄ wola ↄ kaberɛ keŋ. Ↄ kawola ke nɛ, te me naa kyolobii ŋolo kuluwↄ lee adido kaa yala tɛɛle man. Botↄↄ te Wurubuarɛ moo safowaa keŋ bɛɛ mo toro disim keŋ tↄɛ bↄↄ kyilimkyilim keŋ ke taŋ ↄto ya nɛ fa kyolobii ŋon. 2Ↄ ka toro bↄↄ keŋ nↄↄ nɛ, nyↄↄse leewↄ ke man ŋgba mena keŋ nyↄↄse na lee boalaŋ degyapaa man nɛ. Te nyↄↄse keŋ yela weese na ŋↄma pou biriwↄ tuum. 3Keŋte akpataana leewↄ nyↄↄse ŋan man kaa yala tɛɛle dↄↄ. Te be faa wↄ doŋ keŋ baa mo tↄ balaŋ ŋgba kanase nɛ. 4Be yako wↄ nyi be na wↄlɛɛ tɛɛle kei dↄↄ ŋalese na daase na abↄↄ ŋan ne tuu tɛɛle dↄↄ nɛ ya. Mↄna baa naase balaŋ baŋ Wurubuarɛ ta do wↄ nso be tirinↄↄse dↄↄ ya nɛ diyem. 5Ba te fa wↄ doŋ nyi baa ko balaŋ benaŋ ya. Mↄna be faa wↄ doŋ bo nyi baa mo naase wↄ diyem gyaalaŋna banoŋ. Te diyem keŋ bↄↄ naa nɛ, wee wↄ ŋgba kana tↄↄ na walaŋ nɛ. 6Mena weeya ŋenaŋ man nɛ, balaŋ baa gyae yeŋ nyi baa yeŋ mↄ bↄↄ gyae baa yeŋ ya. Baa gyae nyi yeŋ de kaa mo wↄ, mↄna yeŋ be gyae waa benaa wↄ ya. 7Mena akpataana benaŋ yɛɛ ŋgba dɛɛkyↄŋse baŋ bↄↄ desina wↄ baa mo gyu yoo nɛ. Abↄↄ ŋaale gyakaa ba nyeeya dↄↄ ŋgba kotↄtↄↄse ŋan bↄↄ mo kↄba yayam yɛɛ ŋa nɛ, te be siagbɛɛ mↄ yɛɛ ŋgba denibalaŋ nɛ. 8Ba wose wona yɛɛ ŋgba ala nyeenyↄↄse nɛ, te be kela mↄ yɛɛ ŋgba dinaate kela nɛ. 9Na abↄↄ ŋaale mataa be konↄↄse dↄↄ, ŋgba nyeela pampasaŋ ŋan yoonↄↄtena na mo gyee be konↄↄ nɛ. Te be beŋkelɛɛ mↄ ne yɛɛ yeesa ŋgba dɛɛkyↄŋse burum ne tuu na be kↄtase bee gyu yoo nɛ. 10Na be dana gyuŋse ŋan ne tↄ balaŋ ŋgba kanase nɛ. Te doŋ keŋ baa mo naase balaŋ diyem gyaalaŋna banoŋ nɛ, doo bo be gyuŋse ŋenaŋ man. 11Be gyoo ŋon ↄ ne kɛɛ be dↄↄ yɛna ↄbↄnsam kpilale ŋon ↄ ne kɛɛ bↄↄ kyilimkyilim keŋ ke taŋ ↄto ya nɛ dↄↄ nɛ. Gyudatena dei man na bɛɛ baake e nyi Abadↄn, te Girikitena dei man na bɛɛ baake e nyi Apoliyↄn keŋ nawolo nyi Abↄↄwↄlɛɛre. 12Kayeyɛɛ gyaŋgbate keŋ kaalaŋa laa nɛ. Ala mↄ dↄŋ gbɛɛ ne kↄŋ. 13Keŋte Wurubuarɛ kpilale loorote ŋon mↄ wola ↄ kaberɛ. Ↄ kawola ke nɛ, te me nyii woya ŋaale leewↄ Wurubuarɛ kedeesa boe keŋ bↄↄ mo kↄba yayam yɛɛ ke te ka seŋɛɛ Wurubuarɛ siaman nɛ, ka yenaase anaara ŋan man. 14Woya ŋenaŋ yako Wurubuarɛ kpilale loorote ŋon ↄ dana kaberɛ keŋ nɛ nyiaa, "Tina ↄbↄnsam kpilala banaara baŋ bↄↄ bake wↄ do boo dinaa Efurate man nɛ yela." 15Mena dↄↄ be tinaa wↄ yela. Na Wurubuarɛ te desina wↄ see fa mena debaŋ kei, na mena wee kei na mena gyaalaŋ kei na mena kulutoo kei, nyi baa koe tɛɛle kei dↄↄ balaŋ kekpase atooro man dekpeŋ dokoloŋ. 16Keŋte ba wola maŋ balaŋ baŋ be kyaa dɛɛkyↄŋse baŋ dↄↄ nɛ be yaanↄↄle. Na be yaanↄↄle yɛɛ kakpoŋ kakpoŋse sↄŋonoŋse ala (200,000,000). 17Dɛɛkyↄŋse na balaŋ baŋ be kyaa be dↄↄ te mↄↄ naa wↄ ŋgba dosɛɛ man nɛ, be dinↄↄ yaa mɛɛ gyae maa wola ŋon nɛ. Nyeela pampasaŋ ŋan balaŋ baŋ be kyaa dɛɛkyↄŋse baŋ dↄↄ ba mo gyee be konↄↄse nɛ, ŋe ŋaale yasɛɛ ŋgba boalaŋ nɛ, te ŋaale mↄ birɛɛ yuu te ŋaale mↄ yɛɛ kegyim nuŋ ŋgba kpatakpela nɛ. Dɛɛkyↄŋse baŋ nyeeya yɛɛ ŋgba dinaate nyee nɛ. Na boalaŋ na nyↄↄse na kpatakpela na lee be nↄↄse man. 18Boalaŋ na nyↄↄse na kpatakpela ŋan ba lee be nↄↄse man nɛ, ŋan yɛna kayeyɛɛ nombia ŋan ba ko tɛɛle kei dↄↄ balaŋ kekpase atooro man dekpeŋ dokoloŋ nɛ. 19Dɛɛkyↄŋse baŋ doŋ keŋ bɛɛ mo koe balaŋ nɛ doe be nↄↄse na be gyuŋse man. Be gyuŋse yɛɛ ŋgba doma nɛ, te ŋe dana nyeeya ŋan bɛɛ mo gooli balaŋ. 20Balaŋ baŋ bↄↄ kaa tɛɛle kei dↄↄ keŋ be ta yem lee mena kayeyɛɛ nombia kɛŋa man ya nɛ, te tina be nombiakumɛɛ keyɛɛ yela ya. Ba te kyɛɛkee ba agyueŋ na baa tina abↄↄ ŋan baŋ gbagba ba mo be nyiŋmaase yɛɛ ŋa nɛ kasom yela ya. Be te tina feliŋkumɛɛ na bɛɛneŋ ŋan baŋ gbagba ba mo kↄba yayam yaa kↄba wolom yaa nyeela yaa boya yaa daase yɛɛ ŋa nɛ kasom yela ya. Mↄna mena bɛɛneŋ kɛwↄ bɛɛ naa ya, te ŋe bee nyii dei ya te ŋe bɛɛ tɛɛ mↄ ya. 21Mena ke mↄ te ba te kyɛɛkee ba agyueŋ na baa tina balaŋ kakoe, na ŋmeeseŋ nombia na kafoŋ nombia na ŋmɛɛleŋ nombia yela ya.

will be added

X\