Kalesewola 7

1Kɛŋa pou wↄle nɛ, me naa Wurubuarɛ kpilala banaara baale na ba seŋɛɛ tɛɛle kei yenaase anaara ŋan man. Te be tↄↄ feliŋse ŋan ŋɛɛ gyↄↄ lee tɛɛle kei yenaase anaara ŋan pou, na ŋↄↄ nyiŋ gyↄ tɛɛle dↄↄ yaa ɛpo dↄↄ yaa daŋ kamasɛ dↄↄ ya. 2Keŋte ma besewↄ naa Wurubuarɛ kpilale ŋolo, na ↄ ta lee weese dɛɛlee yenaŋ. Ↄ dana kpene keŋ Wurubuarɛ ŋon ↄ kyaa kekpaakekpaa nɛ na mo do ↄ balaŋ nso nɛ ↄ nyiŋmaa man. Botↄↄ te ↄ lↄↄ nↄↄ yako Wurubuarɛ kpilala banaara baŋ Wurubuarɛ be fa wↄ doŋ nyi baa mo kayeyɛɛ kↄŋ tɛɛle na ɛpo dↄↄ nɛ nyiaa, 3"Ɛ na wↄlɛɛ tɛɛle yaa ɛpo yaa daase ŋan ya, kelii debaŋ keŋ dɛɛ mo kpene keŋ de Wurubuarɛ na mo do ↄ balaŋ nso nɛ, fee baŋ pou bɛɛ som e nɛ tirinↄↄse dↄↄ pɛ." 4Botↄↄ te ba wola maŋ balaŋ baŋ Wurubuarɛ ba do wↄ nso nɛ be yaanↄↄle. Be yaanↄↄle yɛɛ balaŋ kakpoŋse kufu ala akpeŋ kufu ala (144,000). Mena balaŋ kɛwↄ pou lee Iseraetena akpaŋalaŋ kufu ala ŋan pou man. 5Balaŋ kakpoŋse kufu bala (12,000) lee la Gyuda duuluŋ man. Balaŋ kakpoŋse kufu bala (12,000) lee la Rubɛn duuluŋ man. Balaŋ kakpoŋse kufu bala (12,000) lee la Gade duuluŋ man. 6Balaŋ kakpoŋse kufu bala (12,000) lee la Asa duuluŋ man. Balaŋ kakpoŋse kufu bala (12,000) lee la Nafitali duuluŋ. Balaŋ kakpoŋse kufu bala (12,000) lee la Manase duuluŋ man. 7Balaŋ kakpoŋse kufu bala (12,000) lee la Simeↄn duuluŋ man. Balaŋ kakpoŋse kufu bala (12,000) lee la Lewi duuluŋ man. Balaŋ kakpoŋse kufu bala (12,000) lee la Isaka duuluŋ man. 8Balaŋ kakpoŋse kufu bala (12,000) lee la Sebulↄn duuluŋ man. Balaŋ kakpoŋse kufu bala (12,000) lee la Gyosɛfo duuluŋ man. Te balaŋ kakpoŋse kufu bala (12,000) mↄ lee la Bɛngyamɛn duuluŋ man. 9Kenaŋ wↄle me kɛɛ na, balaŋ burum baale seŋɛɛ laa keŋ ŋolo na ŋolo be tale kala wↄ ya. Mena balaŋ benaŋ lee tɛɛlese na debiise na deise na akpaŋalaŋse na balaŋ kpookpoo kamasɛ man. Mena balaŋ benaŋ pou seŋɛɛ gyooro gbeli keŋ na Nambu ŋon siaman. Ba doona kegbase wolomɛɛ wurikyim, te walaŋ kamasɛ mↄ dana ↄkɛɛ faareŋ ↄ nyiŋmaa man. 10Na bɛɛ fae yeesa keŋkeŋ yako nyiaa, "Wurubuarɛ ŋon ↄ kyaa gyooro gbeli keŋ dↄↄ nɛ, na Nambu ŋon ne lɛɛ na da nyee." 11Debaŋ kenaŋ na, Wurubuarɛ kpilala baŋ pou seŋɛɛ kilisi gyooro gbeli keŋ, na kegyiise sao banaara baŋ na wonise banaara baŋ. Be popou tisiwↄ buŋii mo be sia buŋ tɛɛle man gyooro gbeli keŋ siaman, te ba som Wurubuarɛ 12te be sɛɛwↄ nyiaa, "Amɛn. De Gbeŋgyoo Wurubuarɛ danaana doŋ na nyansa na gyoorobiiri. Mena dↄↄ ɛ yela dɛɛ do e nↄↄ lese ↄ yele kekpaakekpaa. Amɛn." 13Botↄↄ te kegyiise sao banaara baŋ man ŋolo bↄↄse maŋ nyiaa, "Balaŋ bomↄ yɛna baŋ ba doona kegbase wolomɛɛ wurikyim kɛŋa te aleŋ yaa ba leewↄ?" 14Keŋte me tiranↄↄ fa e nyi "Kegyia, nyaŋ gyeŋa la." Te ↄ yako maŋ nyiaa, "Balaŋ kɛwↄ yɛna balaŋ baŋ Wurubuarɛ ba lese wↄ lee kayeyɛɛ dinaa keŋ be kↄŋ be dↄↄ nɛ man. Baŋ yɛna balaŋ baŋ bↄↄ faafo ba kegbase Nambu ŋon fatabo keŋ man te ŋↄↄ lee wolose pareparepare nɛ. 15Mena dↄↄ, te be yela be kaa seŋawↄ Wurubuarɛ gyooro gbeli keŋ siaman nɛ. Bɛɛ som Wurubuarɛ ↄ deni dinaa keŋ man nelim na ka weese. Walaŋ ŋon ↄ kyaa gyooro gbeli keŋ dↄↄ nɛ, waa fɛlɛɛ ↄ kanyaŋ wuu wↄ na waa gyee wↄ. 16Tanam be gyae ka ko wↄ bela ya, te loŋboaneŋ mↄ be gyae ka ko wↄ bela ya. Weese be gyae waa nyakee wↄ ya, te duwulawula mↄ be gyae ke nyiŋ wↄ ya. 17Nawolo nyi Nambu ŋon ↄ seŋɛɛ Wurubuarɛ gyooro gbeli keŋ nsana nsana nɛ, ŋon ne gyae la waa kɛɛ be dↄↄ ŋgba mena keŋ namensekɛɛlere ne kɛɛ ↄ namense dↄↄ nɛ. Ŋon ne gyae la waa ta be siaman mo wↄ gyu nyeedoŋ loŋ keŋ gyaŋ. Te Wurubuarɛ gbagba ne gyae la waa feefo ba siasaraŋ pou lee be siaman."

will be added

X\