Kalesewola 5

1Kɛŋa wↄle nɛ, me naa tↄne debↄↄsa daale doo walaŋ ŋon ↄ kyaa gyooro gbeli keŋ dↄↄ nɛ dunoluŋ nyiŋmaa man. Ba te ŋmarase do tↄne keŋ siaman na ke wↄle pou, te ba moo kolo anemaataŋ ŋgba keeni nɛ tↄ ke nↄↄ betabonyetooro. 2Keŋte me naa Wurubuarɛ kpilale doŋte ŋolo fae yeesa keŋkeŋ bↄↄse nyiaa, "Amↄte kaboela nyi waa wolee keenise ŋan, na waa toro tↄne keŋ?" 3Mↄna, na ŋolo be kyaa adido yaa tɛɛle kei dↄↄ, yaa tɛɛle kei ateta keŋ waa tale toro tↄne keŋ na waa kala ke ya. 4Mena dↄↄ me wiiwↄ nideli, nawolo nyi be te nyiŋ walaŋ ŋon ↄ kaboena nyi waa toro tↄne keŋ yaa waa kala ke ya. 5Botↄↄ te kegyiise baŋ man ŋolo yako maŋ nyiaa, "Na wii ya. Kɛɛ, walaŋ ŋon bɛɛ baake nyi Dinaate ŋon ↄ ba lee Gyuda dekpaŋalaŋ man na gyoo Defidi duuluŋ man te ↄ yɛɛ walaŋ dinaa e nɛ te yoo di ↄbↄnsam dↄↄ. Mena dↄↄ ŋon ne gyae la waa tale wolee keenise nyetooro ŋan, na waa toro tↄne keŋ." 6Keŋte me naa Nambu ŋon ↄ yɛɛ ŋgba ba koo e bo nɛ seŋɛɛ gyooro gbeli keŋ na wonise banaara baŋ, na kegyiise sao banaara baŋ nsana nsana. Ↄ dana woo nyetooro na sia nyetooro. Sia nyetooro ŋan yɛna Wurubuarɛ feliŋse nyetooro ŋan ↄ be kpili kↄŋ tɛɛle kei dↄↄ yenaŋ kamasɛ nɛ. 7Botↄↄ te Nambu ŋon kↄŋawↄ kaa lɛɛ tↄne keŋ lee walaŋ ŋon ↄ kyaa gyooro gbeli keŋ dↄↄ nɛ nyiŋmaa man. 8Ↄ ke lɛɛ tↄne keŋ nɛ, wonise banaara (4) baŋ na kegyiise saobanaara (24) baŋ kaa buŋawↄ som Nambu ŋonaŋ. Na be man walaŋ kamasɛ dana adolɛɛ na kↄba yayam nyefale, na oliifi te wulu ŋe man. Oliifi keŋ seŋɛɛ baa fa Kristotena kefane keŋ bɛɛ fane fa Wurubuarɛ nɛ. 9Keŋte be kpee nↄↄneŋ wↄle fa Nambu ŋon nyiaa, "Nyaŋ kaboela nyi nya lɛɛ tↄne keŋ na n ke wolee keenise ŋan. Nawolo nyi ba koo neŋ, te n moo n fatabo lɛɛ balaŋ fa Wurubuarɛ. N lɛɛ balaŋ lee akpaŋalaŋ kamasɛ man, na deise kamasɛ na tɛɛle kei dↄↄ duuluŋ kpookpoo man, na tɛɛlese kamasɛ man fa Wurubuarɛ. 10N ta mo mena balaŋ benaŋ kpu n gyoori keŋ man, te n yela ba bese gyoorobia na saese na baa som Wurubuarɛ, na be kaa di gyoori tɛɛle kei balaŋ pou dↄↄ." 11Me ka bese gɛɛse kɛɛ nɛ, te me nyii Wurubuarɛ kpilala burum baale woya. Ba boe keŋ nyi ŋolo na ŋolo be tale kala wↄ ya. Na be te kilisi gyooro gbeli keŋ na wonise banaara baŋ na kegyiise sao banaara baŋ pou. 12Na bee kpee nↄↄneŋ keŋkeŋ nyiaa, "Nambu ŋon bↄↄ ko e nɛ, ŋon kaboela nyi dɛɛ lese ↄ yele na dɛɛ mo obuo fa nideli. Ŋon te doŋ na nyansa na wosekenyiŋ pou kaboena." 13Botↄↄ te me nyii kpene kamasɛ keŋ Wurubuarɛ be yɛɛ te ŋe kyaa adido, na ŋan ŋe kyaa tɛɛle dↄↄ na ŋan ŋe doo tɛɛle ateta, na ŋan ŋe doo ɛpo man nɛ pou kpee nↄↄneŋ yako nyiaa, "Walaŋ ŋon ↄ kyaa gyooro gbeli keŋ dↄↄ, na Nambu ŋon te kaboena nyi dɛɛ lese ba yele na dɛɛ mo obuo na gyoorobiiri fa wↄ kekpaakekpaa." 14Keŋte wonise banaara baŋ sɛɛwↄ yako nyi, "Amɛn." Te kegyiise sao banaara baŋ tisiwↄ buŋii ba doona dↄↄ, te ba moo be sia buŋ tɛɛle man te ba somwↄ.

will be added

X\