Kalesewola 4

1Kɛŋa pou wↄle nɛ, ma besewↄ kɛɛ na te me naa disim daale adido Wurubuarɛ man na ka toroɛ. Keŋte ma besewↄ nyii woya ŋan be kolosi na maŋ kaalaŋ ŋgba kaberɛ te ba wolawↄ nɛ ne yako maŋ nyiaa, "Gyeŋ kↄŋ adido kɛbo, na maa lese abↄↄ ŋan pou kaboena nyi ŋe dɛɛ kↄŋ kɛŋa wↄle nɛ wola neŋ." 2Karatetee dokoloŋ te Wurubuarɛ feliŋ ŋon kaa gyoowↄ me man, te ↄ yela me naa gyooro gbeli daale adido, na ŋolo kyaa ke dↄↄ. 3Na walaŋ ŋon ↄ kyaa gyooro gbeli keŋ dↄↄ nɛ ne ŋalakee ŋgba boya kpaakpaa nyiŋan ŋan bɛɛ baake ŋa nyi Gyasipa na Kanelia nɛ. Te okyimaale ŋolo mↄ te kilisi gyooro gbeli kenaŋ gyaŋee, na ↄ ne ŋalakee ŋgba boe kpaakpaa keŋ bɛɛ baake ke nyi Emeradi nɛ. Boya kɛŋa pou yɛɛ boya kpaakpaa ŋan bↄↄ ne sɛɛ ŋe dↄↄ ya. 4Na gyooro gbelɛɛ sao anaara (24) ŋaale mↄ te kilisi gyooro gbeli dinaa keŋ gyaŋee, te kegyiise sao banaara (24) mↄ kyakɛɛ gbelɛɛ ŋenaŋ dↄↄ. Kegyiise benaŋ doona abↄↄ wolomɛɛ pareparepare, te be wuuna gyooro kotↄtↄↄse ŋan bↄↄ mo kↄba yayam yɛɛ ŋa nɛ. 5Na ↄga keŋmaale na ↄga kefae na lee gyooro gbeli dinaa keŋ dedoi man. Te kanease nyetooro mↄ baŋɛɛ gyooro gbeli kenaŋ siaman ŋɛɛ kpaa. Kanease ŋenaŋ yɛna Wurubuarɛ feliŋse nyetooro ŋan. 6Keŋte me naa kolo gyooro gbeli keŋ siaman ŋgba ɛpo loŋ nɛ. Na ke yɛɛ geleŋgeleŋ te kɛɛ ŋalakee ŋgba diiku nɛ. Na wonise banaara baale baŋ be dana nyeedoŋ nɛ dↄŋɛɛ nsana nsana kilisi gyooro gbeli keŋ. Be dana sia be siaman na be wↄle pou. 7Woni gyaŋgbate ŋon yɛɛ ŋgba dinaate nɛ, te balate ŋon mↄ yɛɛ ŋgba nunkyue baale nɛ. Batoorote ŋon siagbɛɛ yɛɛ ŋgba deniwalaŋ nɛ, te banaarate ŋon mↄ yɛɛ ŋgba otoloku ŋon ↄ ne furufu feliŋ man nɛ. 8Mena wonise banaara benaŋ pou dana beŋkelɛɛ looro looro. Be dana sia ba yenaŋ kamasɛ na be beŋkelɛɛ ŋan ateta gba. Bↄↄ ne tina nↄↄneŋ kekpee yela ya. Nelim na ka weese pou na bee kpee nↄↄneŋ lese Wurubuarɛ yele nyiaa, "De Gbeŋgyoo Wurubuarɛ Dekpatakpere, Ayimɛɛ kamasɛ be doo n man ya! Ayimɛɛ kamasɛ be doo n man ya! Ayimɛɛ kamasɛ be doo n man ya! Nyaŋ yɛna doŋ pou nyee. Nyaŋ yɛna walaŋ ŋon n be kyaa kaalaŋ. Nyaŋ yɛna walaŋ ŋon n kyaa debaŋ kei. Te nyaŋ yɛna walaŋ ŋon nyaŋ ke kyaa kekpaakekpaa." 9Wonise banaara baŋ ne kpee nↄↄneŋ kɛlɛɛ walaŋ ŋon ↄ kyaa gyooro gbeli keŋ dↄↄ kekpaakekpaa nɛ lese ↄ yele. Debaŋ kamasɛ keŋ be yɛɛ mena na, 10na kegyiise sao banaara baŋ te tisi buŋii walaŋ ŋon ↄ kyaa gyooro gbeli keŋ dↄↄ kekpaakekpaa nɛ siaman na be ta som e. Bee gyuusu be gyooro kotↄtↄↄse ŋan see gyooro gbeli keŋ siaman, na ba te yako nyiaa, 11"De Gbeŋgyoo, nyaŋ yɛna de Wurubuarɛ. N kaboena nyi baa lese n yele na baa mo obuo fa neŋ. N dana doŋ, nawolo nyi nyaŋ yɛɛna kpene kamasɛ. N yɛɛ kpene kamasɛ bo n kegyaebii man, te n kegyaebii man te ŋe popou mↄ kyaa nɛ."

will be added

X\